TYD VAN DE KOBBN

Rino: 'Bjorn, en ge zy lik zoa ant peizn?'

Bjorn: 'Ja Rino, eej gy wok kobbn in joen uus?'

Rino: 'Vaneigenst, een n uus woa dat r géen kobbn zittn is nie gezoend wi!'

Bjorn: 'En wuk doe j ton uj n kobbe ziet?'

Rino: 'N bitje achteruut goan da ze géen attakke doet! Moe kée peizn wuk da ta moe zyn voe zukkn béestje ut r doa ommèdekée zukkn indelukske béeste voa n dag komt!'

Bjorn: 'Joah verzeekre! Ge sloa da toch plat?'

Rino: 'Voe wuk? Ge zoe moetn bly zyn da ze der zyn, da pakt de vliegn en de muggn. Doaby, tis géen avance van éen doad te sloan, t zittn miljoenn kobbn in joen uus! Mak moa da ze t nie zien want uj ze dul makt, zyj der wel mee!'

Bjorn: 'Moa gow, serieus!'

Rino: 'Us echt te groat is noa myn goeste, en ze zit in myne weug goa k ze buutn zettn, mè n glas en n papierke.'

Bjorn: 'Is t echt? En gy Marjan, wuk doe j gy doamee?'

Marleen: 'Ik loate da wok loopn. Teegn da j nog ne kée kykt is z olyk weg. Tis n tyd van de kobbn ee, ze komm binn omdat snachs begunt te verkoeln.'

Bjorn: 'Ja santé, dus t goan der nog by komm?'

Marleen: 'Moa das oole joare ozoa! Ge moe doa nie mee inzittn!'

Bjorn: 'Zy j nie benauld das in je bedde kruupn snachs?'

Marjan: 'In je bedde? En ze kruupn zels in j ne moend binst da j slapt!'

Bjorn (geschrokken): Tis géen woa!'

Marjan: 'Tis beweezn dat ne mins oole joare acht kobbn upit! Ze kruupn in jne moend en ge voelt n twuk woadeure da je smekt en hup, gee ze binn!'

Arno: 'Ze kruupn in jne moend omda ze dust een, ze drienkn n bitje en ton moakn ze doa n kobbenette, wan vliegn moetn wok drienkn en t moment datr n vliege in jne moend vliegt, grak ze vernesteld in die kobbenette…'

Bjorn (in paniek, kijkt naar mij): 'Tis géen woa!'

Rino: 'Moa bè nint née, ge goa joe toch nie loatn doen ee! Kobbn kruupn nie in joen bedde, ze zyn veel te benauld van gie, zukkn posteure!'

Bjorn: 'T zat éen in myne living, ke koste byna nie mée beweegn! K zoate der éest n héel ende noa te kykn en kee ton myne gebeur moetn oaln voe ze doad te doen!'

Marleen: 'Och héere da beestje…'

Bjorn: En gy Kurt, zet je gy n kobbe buutn?'

Kurt: 'En ge zy zot zeekre! K zyn ool bly da ze willn binn komm! Voe ne kée dak n bitje company een!'