CONVERSOATJES ME N GLAS 28

'Zeg' zeg myn glas
'Is da nu de nieuwe mode?
Hey! HALLO!'

'Ja?'

'Jamoa, da goat ier ozoa nie goan wi!
Gy en ik moetn ne kée klappn!'

'Oe?'

'How zeg, ge goa j nu toch nie
van n domm geboarn ee!
T joar is verre oavege en gee
nog nietn gedroenkn!'

Ja... K goa n moa were stille zettn zekers...

'Wuk is ter éegluk goande?
Oeveel joar zyn w ool toope?
Oe kuj zoa zwiegn teegn my?
T zoe moetn n twuk zyn mè my
k zoe t sebiet zeggn!
Moa gy... Ge zy lik ne geslootn boek!...
(zucht)
'MOA WUK GOA DAT IER VERDOMME ZYN VINT!
GOA J NOG JOEN MUULE OOPN DOEN OF WUK?!'

Zukn glas... Zoej da nie in de container smytn?!

(gesnik, twiss deur de kassedeure)

'Drienkn doe j wel mè twéenn ee...
Peis je gy éegluk wel up my?...
GY KIEST DER VOARN MOA IK NIE!'
Best da n glas géen tann ee...

'Ort, gee gelyk, k moeste derover geklapt een
moa t wos n impulsieve beslissinge...
Ee coroazje, t is moa tien doagn mée'

'WUK! TIEN DOAGN! GE VANG ZE GY ZEEKRE?!'

Moet er n twien n glas éen?

CONVERSOATJES ME N GLAS 27

'Goaj antoedn da k nog myn pille moete pakkn?' zeg myn glas
'Wuk?' zegge k, we zyn an t kykn noa de Illusionist
mè Edward Norton moa tis byzoenderluk Paul Giamatti -
de flik - die hypnotiseert, 'n pille?'
'Ja myn pille' zeg myn glas, 'teegn t zeur!'

'Oeie, moe k ik da mee antoedn?
En k moete ool uplettn da k myn eign pilln nie vergeete...
Zoe j ze nie beetre van néeste kée pakkn
binst da j der nu up peist?'
'Ja, t is woa' zeg myn glas, 'goaj ne kée stille zettn?'

CONVERSOATJES ME N GLAS 26

'Zeg' zeg myn glas, 'ool die toern da diene clow uutstikt
zoagezeid uut dommigheid, gelove gy dat eegluk nog?'

'Sssst!' zegge k, 'k zyn an t kykn noa t nieuws'

‘Wan k een n theorietje' zeg myn glas
j oar moa sjuuste wuk dat n wil oarn

‘Ge moe joe ne kée voarstelln da Trump éegluk n puppe is
up zunnénergie of up moanénergie, wativre
Zoe da nie ooles verkloarn?'

Ja myn glas is were up dreve
je moe nu en ton ne kée zyn erte luchtn

‘N prototype peisde k éest, omda der zoaveel foutn inzittn
Moa miskien doen ze deromme en een z em zoa slich gemakt
voe te zien oe verre ze kunn goan voa da der reactie komt!

Ge pak n poate Nixon, ne leeple Bush, ne bussle Reagan
n fak oar van John Wayne, en n bouillongske van Dolf,
Mao en Sjozif en ge lat da ne kée goe brobbeln!'

'Ge wit toch da j da in n Ameriek nie zoe meugn zeggen?'

'Skietre' zeg myn glas, 'wuk kan der wel gebeurn dè?
En doaby, ze zoenn moetn rap zyn wei voe my te pakkn
Wan k loate my geweune vooln! En ge zoe ton n twuk zien!
Uj bepeist oeveel minsn der nu ool up bedevoart noa ne glasbak goan...'

CONVERSOATJES ME N GLAS 25

'Zeg' zeg myn glas
'diene Bond, diene mins is toch ziek?'

Gistern een we noa Skyfall gekeekn
en vandoage kykn we noa Spectre

'Je drienkt en je drienkt en je ryd
ton teegn richtienge lik ne noove zot
en je vliegt mè illekopters en vliegers
en je moet em noais bloazn!
Volgens my is t n èm zwoar versloafd!
N skoan voarbeeld voe d joenge gastn...'

'Ge goat de filme ier toch nie were verpestn?'

'Oeieioei, sorry da k leeve ee!' zeg myn glas

'Moa nu nie voe téen of tandre
en k goa ton zwygn
moa n déen goa wok nog n bitje boffn
n dag da ze da goan verplichtn
zukn alcoholslot!'

Ge kunt oolene moa wachtn
toet dat t were stille is

K koste t overlatst nie mée luchtn
en ka t byna teegn de meur gesmeetn
'Skervn briengn oengeluk' zei myn glas

Nu stoat t doa te lachn in zyn eign
nietn da onnozelder is dan n glas
da lacht mè zyn eign kluchtn!
En géekn da zelste zinneke!
Téenigste da j dran eet
is dat r were n bitje skuum up komt

'My name is Bond! Ziek-n-bond!'

CONVERSOATJES ME N GLAS 24

We zittn voe n derde of de vierde kée
te kykn noa Gangs of New York
woarin da twidde géneroasje migrantn en veske migrantn
mekoar probeern uut te moardn
o fong voe groend van d Indioann

'De minsn goan noais verandern' zucht myn glas

Méer dan drie eurn loatr
achter héele beekn bloed, ne Quadruppel
van La Trappe en n Dulle Teeve
zie je déen die peist dat n gewoenn ee rechte kreeveln
en verwoenderd kykn noa de zée:

ool boatn gevuld mè minsn van n over t woater
ze begunn nog moa toe te komm
geréed voe under leevn doa t erbegunn

'Zie j dadde?' vroag myn glas
'Da zyn de klimoatvluchtelingn...'

CONVERSOATJES ME N GLAS 23

Zap moa deure uj téer zyt want ze goan ier over lykn

We zittn te kykn noa 'Miern up n Garnoale'
over ne chefkok die mè zyn personeel
up retraite noa Tokio trekt en t is nie voe de klucht
moa teegn de vervelinge up zoek noa n uutdoaginge:

ne menu van véertien gangn moakn in ne keukne
da j nie kent – stress, miseerje, veel zoaginge
en nu en ton spring n een gat in de lucht
en up t ende ist n suukses

Zeg' zeg myn glas, 'N Deen van t Noma,
héele doagn mè smoakn bezig,
sabbeln up takkn, kookn mè ges en mos
en ooles leevnde ves -

ge ziet de béestn beevnd in de talloarn
want ut t beter smakt eetn ze ze leevnd -

en k wil ier nu niet hautain klinkn
moa uj zoa mè smoake bezig zyt
oe kan da ton da ze doa
in z ne keukne oolemolle
Red Bull drinkn?'

CONVERSOATJES ME N GLAS 22

'Die zombies' zeg myn glas
'wuk is der doa zoa anders an?
O fong zyn da toch wok moa geweune minsn?'

'Nie begunn ee' zegge k
'Ge ziet toch dat der n twuk mis mee is'

'Née, moa serieus' zeg myn glas
'Ze peizn sjuuste moa up under zelvn
U ze n twuk zien moetn ze t sebiet een
Gelyk wuk da j der teegn zegt
ze doen ookn under gedacht
Ge kunt der nie up reeknen
Z een ne n echte kuddegéest
In doenkern zien ze géen steeke
Ze zyn nie styf by de pienkn
Ze weetn up géen oenderd joar woa da ze
goan uutkomm moa ze doen moa voars
Wok ool zien ze da j up joe gemak wil zyn
ze loatn joe nie grust
En zittn z up ne tring, willn z ookn ofstappn
ool de verkéerde kant...'

'Ge vergit n twuk' zegge k
'Doeke?' zeg myn glas

'Z een noais dust'

CONVERSOATJES ME N GLAS 21

'Zeg' zeg myn glas
'Meuge k ne kée n twok vroagn?'

'Wuk is t?' zegge k, binst da k
de filme up pauze zette

We zitten nog ne kée te kykn
noa Barfly mè Mickey Rourke
voa dat n in ne plastiekne
karikateure veranderde

'Eej wok nog ne reserve oopndoendre?'
'Joak, voe wuk?'

‘Geweune… Voe te weetn'

CONVERSOATJES ME N GLAS 20

'K zoe der nie roar van doen dat t komt
deur da héel t zuudn in brande stoat
dat ier zoa warme is' puft myn glas

We kykn noa de busbrandn in Portugal

'En t bier verskoalt binst daj t uutskienkt!
Ka noais gepeisd da k da nog gienge zeggn
moa ke kunn t byna verstoan dat r minsn zyn
die Westmalle mè ne n ysblok drienkn!'

CONVERSOATJES ME N GLAS 19

We zittn te kykn noa ne saains fiction filme

‘K goa my noais an de minsn verstoan’ zeg myn glas
‘Ge kunn gy de minsn nie verstoan, ge zy n glas’ zegge k

‘Néen, serieus’ zeg myn glas

‘Ze zyn biekan mè acht miljaar en u ze ne nufo zien in de lucht
krygn ze troann in under oogn en ze zeggn: ‘We zyn nie ooléne!’’

CONVERSOATJES ME N GLAS 18

'Amai' zeg myn glas
'Brad Pitt is styf veroederd!
En der is lik n twuk mè zyn oogn
zyn oogleedn zyn lik anders...
En der is wok n twuk mè zyne moend!'

'Goat t goan joat!'
K ben vrée an da glas moa sommigte
kéern zoej t de nekk omme droain!

'Kweete t!' zeg myn glas
'T is an gewerkt!
Jee zyn oanzichte loatn doen'

Kykt doamee noa ne filme

CONVERSOATJES ME N GLAS 17

‘Dat is toch n twuk roars ee...’
zeg myn glas

‘U zukkn ruumteskip landt
makke t, voa da t de groend kust
éest nen droai in de lucht!’

‘Wè? En ton?’ zegge k
‘Zukne droai is sexy. En doaby,
uk k ik myne noto in de garage zette
ry k ik wok achteruut in’

‘T akkoard’ zeg myn glas, ‘moa u ze wegvliegn
moakn ze were nen droai!’

Ee ne kée zukn glas…

‘Of aj doa nog nie up gelet miskien?
Zeg, kyke gy éegluk wel noa ne filme?’

CONVERSOATJES ME N GLAS 16

We zittn te zappn, tis were nietn up héel dien bak -
da gebabbel, ge zoed r de krul van kriegn

'Wit je woa da k ik ool n ende goeste in ee?'
zeg myn glas – lichtjes bedoamd
'Voe nog ne kée te kykn noa 'Die Hard', die néestn!'

Oeveel kéern kuj joene pap koeln mè deselste filme?

'Ort, Bruce Willis wos ton echt up zyne top
en k weete t, tis ne kerstfilme
moa tis éen van de wienige woa
da j zels middn de zoomre koed van krygt!'

Nu, tis weer ool n ende geleen da k em zoage
en ujje twien n twuk kun jeunn,
woarom zoej t nie doen?

'Moa vint toch' jubelt myn glas
uk n dvd insteke – t begunt zels
were n bitje te skuum
'k meuge der nie an peizn of k voele t
oolachtre an myn billn...

Da moment dat n up zyn bloate voetn
deur ool da glas lopt!'

CONVERSOATJES ME N GLAS 15

'Echt' zeg myn glas
'geet ter gén gedach van

Voe sommigte is éne kée
ool n héel drama...

Moa oo-le doa-ge moe k ik
uut de kasse komm!'

CONVERSOATJES ME N GLAS 14

'De logica woamee da de sterrn verdéeld
over n eemle angn is puur toeval'
zeg myn glas binst dat n oavnd voalt
en we buutn an toafel zittn
mè up n achtergroend Frank
die bezig is me t weerbericht

'Sjuuste lik de verwachte liters woatre
per vierkante meter vannacht, eurn zunne
van de zoomre, ut de roave nu wel
of nie noa Vloandern komt
en n inoed van de volgende
vuuf twiets van Trump

Of de voarspellingn voe van t weekend:
k goa moa gerust zyn uj genoeg drank ee
want t zoed néeste kée nie zyn dat n
der neevnst zit en oales ier verbloeit
en k meuge t nie gedromd een da w
doa moetn vooln van n dust'

CONVERSOATJES ME N GLAS 13

'Voe my nie, moa voe joe
toch wok nie?'
zeg myn glas

'Voe wie ton wel?

Dus myn conclusie is:
Zwoar overskat, voals
en méer zels, ne
regelrechte leugne, die spreuke'
zeg myn glas

'Skervn briengn geluk...!'

CONVERSOATJES ME N GLAS 12

'Kére kée were' zeg myn glas
'ja doa, wachte, moe kykn, moa mins toch
wuk n spel da ze doa nu van moakn!
Sjuuste lik of da ze t nie weetn! Aja, t is sjuuste
ze weetn t nie want ze willn t nie weetn!'

'T goa goan zeekre' zegge k
'en tis toch nie omda ze doad moetn
voe up t eetn da ze moetn ofzien wok?'

'Gyne skienilligoard!' zeg myn glas
t skuumt van koleire
of miskien is t nie goe gespoeld
'Ge wilt oolsan t beste van t beste
moa t moet ool van t goekopste zyn
en ton zoej willn dat die béestjes
nog n goe leevn een wok
en ten langn latste up n minselijke maniere
n bol of gedoan!

Ge zy gy wok gene héeln fyn ee gy
of anders eej ze nie oal toope,
meug kiezn!' zeg myn glas

Stel je voarn da j twée zukke gloazn zoed een!

'Moa ik weete éen twodde' zeg myn glas
'Tis oal n héel ende dak derover peise
moa nu goa k der n gedacht van moakn:
k moete géen vlées mée een!'

CONVERSOATJES ME N GLAS 11

We zoatn te kykn noa 'Trapped'
n misdoadserie uut Ysland
Der wos ne moard gebeurd –
'n leak' zeit n docteur –
over n lyf woa da der géen leevn in zat
Yslands gelykt soms vrée goed up West-Vlams

'Nen doan in Ysland is pissn in Amerika'
zei myn glas

'Wacht ne kée...'
myn glas wos were in forme

'Halvar zit up zyn knien te kykn oender t bedde
woa da Wickie de viking sjuuste in gepisd ee
en je zeg: 'Wickieleaks!''

Echt, t latste da j wilt is n glas da lacht
mè zyn eign kluchtn

CONVERSOATJES ME N GLAS 10

'Moe kykn wi, joa van zyn péerd voaln'
zei myn glas

'Goaj t were verpestn?' zeie k

'Moe zoa vies nie doen wi' zei myn glas
'Tis n derde kée da w noa die filme kykn
dus ge wit moa oal te goed oe da t skid!'

'Moe kykn wi, joa t doa indeluks
up zyn muule krygn' zei myn glas

CONVERSOATJES ME N GLAS 9

'Meuge k n twée n twuk zeggn?'
vroag myn glas

'K wille joe bedankn!

K weete da k vrée kunne zoagn
moa kee kik mezelvn wok nie gemakt
en u kik da oal oare in diene ofwosbak
beseffe k moa oal te goe da k
éegluk nie meuge kloagn...

En k zoe doa géern up klienkn:
eej nog t wodde voe t drienkn?'