VOE K.

Kee joe noais zien loopn of springn
moa niemand die zoa rap weg wos
lik gy

Twée, drie kéern te joare zoage k joe
dus kee j nie zoa goe gekend
moa éegluk géenéen van ool wie
dat r ier nu is, oore k -
nu da wier tegoare zyn 

Tis moeiluk voarn te stelln
da j gy nu in dien pot zit doa vanvoarn
Zukne skoane, streuske vint
en wuk dat r in da kopke omme gienk
goan we noais weetn

Tis de dagscheutel da ze serveern:
j ee zne kop geleid en oe
dat n nu noa boovn is
en van doa voe uus goa zorgn +
da w der nie mée moetn mee inzittn
wan j is were by voadre en by moedre

En dat n nu lichter is dan licht

Kée joe nie zoa goe gekend
en miskien zy k mis moa kunne nie geloovn
da n twien der ier beneen n ende an makt
voe doa boovn t erbegunn

'Ze zeidn skoane dingn' zeg ter n twien

Ze skuuvn t graf van voadre en moedre oopn
zittn in kostuume up under knien
en plantn joene pot der tussn

'Ze zeidn skoane dingn' zeg ter n twien
moa t gieng nie over gy

Kée joe noais zien loopn of springn
moa niemand die zoa rap weg wos
lik gy