VERANDERD

Ka der oal van hoard. Dat n zoa veranderd wos. Dat ne héeln n andern wos. Dat n der bykan nie mée up geléek. En k an vaneigns nie erkend, toen da k èm zoage.
Je kwam kykn noa de tentoanstellinge in Brugge woa dat r wok werk van Greet stoend. T wos de latsn dag.

Je kwam binn, Greet zei 'Moa hey!' en je lachte en kwam dichtre. K peisde éest nog dat n twien van eur werk wos. Moa je zei 'Dag Rino!' en ton moeste k nog ne kée goe kykn.
Moa godverdomme! Wos dat èm? T wos nie te geloovn! Echt, en k voene èm bykan nie mée were!
Zukne snelle vint dat r ier stoend! Myn erte makte ne sproeng. Pas up, vroegre wos da wok ne skoane joengne, moa nu wos t echt n prente! K moeste peizn up Clark Gable. Of up Errol Flynn. Up George Clooney in 'Monuments Men'. Ja, zukne klassieke karakterkop dus.

K wiste nie sebiet wuk zeggn, zoa van myne melk woare k! Kej dadde; ge wit dat t ambetant is en toch kuj niet loatn van kykn.
'Da snorreke is moa tydelijk wei' zei t ne. Voe n rolle dus. Ja, t is wok nie roar da zukn twien acteur is.
'Is da de catalogus?' vroeg ne. Moa je gienk éest ne kée roend kykn.

N ende loatr zoage k èm loopn in de verte. Kykn noa n skildery. Stille stoan by n beeld. Myn oogn an in tussntyd n bitje kunn wenn. Lik uj van n doenkern in de kloarn komt. K begoste were te zien. K erkende èm zels ool n bitje! Oe da ne mins toch kan verandern.
En da oole molle mè n bitje te vermoagern. N serieus bitje!