MISSE

'De Kringloopwinkel in Avelgem, met Rino!'
'Alloo, is t met de Kriengloopwienkle?'
'Ja, met de Kringloopwinkel in Avelgem, met Rino!'
'Alloo menéer, k zitte k ik ier ool héeln achternoene te wachtn, moa ze komm zyder nie of!'
'En up wuk zy j an t wachtn, madam?'
'Up uuzne slapkoamre! Ween wydre doa ne slapkoamre gekocht en ze giengn da vanachternoene briengn moa t is ool byna viere en meen wydre nog niemand gezien!'
'Ier stoat der in oole gevool géne slapkoamre gréed wei madam... En woa gingn ze da moetn leevern?'
'In de Woumnstroate in Oetulst!'
'Madam, dat is verzekers n misse, ge zit gy ier wel in de Kriengloopwienkle van Oavelgem ée!'
'Aja, is da t zelste nie miskien?'
'Nint madam, da s ingedéeld in regioos. Ge zit nu in de Krienloopwienkle van Zuud West-Vloandern moa éegluk moe j in Kriengwienkle West zyn.'
'Oeie! En zoe j gy doa ne tillefonnummre van een?'
'Oe zy j gy an uuzne nummre gegrocht madam?'
'Wè, geweune oender Kriengloopwienkle up tinternet!'
'En zit je voe t moment an j ne compuutre?'
'Joak menéer, t stoa nog oopn!'
'Wel, kéert ne kée were noa Goegle, en typt ne kée Kriengwienkle West in'
'N momentje wei, k goa doavoarn ne kée moetn nere leggn ...... A ier sig, kee t gevoenn!'
'En zie j doa ne nummre stoan?'
'Jjjjjjjj......joak! K zoe dus beetre ne kée noa doa belln?'
'Wel, normoal zoenn zydre van méer moetn weetn madam!'
'Aa, kgoa ton ne kée probeern!'
'Veel succes ee madam!'
'Ja, mersie wi menéer!'
'Jow...'