GEJEUND

'De Kringloopwinkel, mè Rino'
'Alloo, mè de Kringloopwinkel?'
'Ja, mè Rino van de Kringloopwinkel'
'Zeg Rino, t is ier mè Marc ee! Wit je nog wien da k zyn?'
(Stilte)
'Alloo?'
'Ja, Marc, k zyn an t peizn'
'K zyn mè nieuwjoare achter diene piano gekomm, diene zwortn mè die kandeloars'
'Oeieioei Marc, k wete doa nog n twoa van moa...'
'Nu, ge kunt t nie oal antoedn é, en t doet r nie toe. Moa kee ton gezeid da j n twuk mochte verwachtende zyn van my! Gén belleke da rinkelt?'
'T zeg my lik n twuk...'
'Nu moa wi, t is zoverre! Myn tante Paula eet eurne lepel weggesmeetn, en dat uus stoa vul van up de zoldre toet in de keldre, moa echt: VUL ee! En méen wiedre, de famielje, doar ool ne kée in gesnuusterd en n poar dingn uuthoald moa ort, uus uus stoa zelve ool vul! Dus ge meug gy achter ool de réste komm! Moa mak moa da j ne groatn camion mee eet want tis de moeite wei! Die kassn zittn ploemmde vul! Zie j t een bitje voa joe? Ort, k moete der wok by zeggn dat r oaste achtre zit, t zoe moetn zére goan want dat uus is verkocht en t moe nu vaneigns ool in éne kée gebeurn, kej dadde! Zegge kée, wonneer kuj komm?'

'Marc, ge zit nu by ne wienkle. Voe n upoalinge moe j by n transport zyn. Ze goan zyder éest ne kée komm kykn en ton ofspreekn moa da wéerd oal geregeld vanuut Marke'
'A moa kee noa doa gebeld! En zeen my ton deure verboenn mè joe!'
'Da s omda j achter my gevroagd ee, kan t zyn?'
'Joak ee, en vaneignst! Zeg t is wel voe joene wienkle ee!'
'Dat is styf skoane Marc, moa ozoa werkt da nie. Dat goat oolemolle noa n depoo en z oan dat ton volgens de vroage oender ool de Kringloopwienkels van Zuud West Vloandern verdéeln'
'Wel mersie! En ka t joe zoa géern gejeund!'
'A moa Marc, voe my is dat t zelste wei! We werkn wyder ool toope ee! En doaby, z oan zyder wok wel n déel noar ier zenn'

'Aja? Nu, uj gyder ozoa overéen komt... Alliz, k moete dus nog ne kée noa diene nummre belln woa dak éest noa gebeld ee ton?'
'Ja, da zoed t beste zyn'
'En gy goa doa ton wok een déel van krygn?'
'Voe te verkoopn in myne wienkle ee Marc'
'Alliz, tis goed! En k goa ton nog n kée binnspriengn'
'Vrée wel Marc!'
'Moa t goa nie voe direct zyn wei, moa voe binn éenigte moandn! Kee nu tevele an myn ooft mè die begroavinge...'
'Ja sorry van da t oarn wei Marc'
'Sorry sorry, t wuufje wos verre oenderd joar oed! Ge moe toch ne kée doagoan ee! En k zyn der k ik verre t jeevntig! Nu, k goa je moetn loatn'
'Mersie ee Marc'
'Zoender mersie!'