NUMMRE

'De Kringloopwinkel in Oavelgem, mè Rino'
'Alloo, is t mè de Kringloopwinkel?'
'Ja, mè Rino van de Kringloopwinkel in Oavelgem'
'Zeg, méen wydre n vrée skoan skoolbankske stoan moa we veruuzn wiedre noa n appartement en méen doa gén plekke voe da te zettn! En t is toch veels te jammre voe doamee noa t containerpark te goan ee... Zy j gyder doan t wuk mee?'
'Ba joaw née! Zeker en vaste!'
'Haja, zie wel, k zeie t nog teegn myne vint! Zeg, en moeste k ik da nie in myne noto krygn, zoe j gyder doa oaltemets kunn achter komm?'
'A, k goa t nummer van de ophaaldienst geevn...'
'A ja, want da s moa n kléen otootje en t is oal n oed wei moa meen doa nog noais géen kostn an gèt, oed vastoedn, en da s nog mè ne koffre, nie lik nu ee, uj dat oopn doet da j derikt in noto zit - ja! Zeg moa!'
'Nul zessnviftig –'
'Nul zessnviftig...'
'Drientwientig –'
'Drientwientig...'
'Neegnentwientig –'
'Neegnentwientig...'
'Véertig...'
'Véertig! Alliz, k goa ne kée probeern voe da in myne koffre te kriegn en ut t nie goat goa k belln noa diene nummre!'
'T is vrée wel! Bedankt en ne goen dag ee!'
'Ja bedankt ee!'

'De Kringloopwinkel in Avelgem, mè Rino'
'Alloo, is t mè de Kringloopwinkel?'
'Ja, mè Rino van de Kringloopwinkel in Avelgem'
'Alloo, t is nog ne kée mè ik ee! Zeg, diene nummre, deen bestoa nie mée zeggn ze!'
'Oe je bestoa nie mée?'
'E bè neij, kée sjuuste gebeld en ze zeggn da diene nummre nie mée bestoat!'
'Zoe t kunn zyn da j verkéerd gedoown é? Want ut r nu ne kée n twuk is woa dak zeekre van zyn is da diene nummre nog bestoat!'
'A ja, da zoe wok kunn zyn! Alliz, k goa nog ne kée probeern!'
'T is vrée wel! Bedankt en ne goen dag en véel succes ee!'
'Ja mersie... Want t is echt nietn an ee, en d joenges moetn t wok nie een, z een wok géen plekke voe te zettn, alliz, bedankt ee, k goa nog ne kée probeern!'