FRIETN

'Allez, best da da nog bestoat!'
'Oe bedoel je?'
'Wel ja, de Kriengloopwinkel née!'
'Ja een skoane uutviendinge ee!'
'Joat, en oolesies voe my, ik ee mezeerje mè me skildkliere, vierntwientig kilo vervet in vier joar tyd! En ge meug doen wuk da j wilt, ge kryg da nie oender controle ee...'
'Moh! En van wuk eej dadde?'
'Ja, das een ziekte ee... Da kan erfelijk zyn... Of deur te lettr zoet t eetn... Of oenregelmoatig t eetn, nie ookn gezoend t eetn, stress...'
'Wel mersie!'
'Ja, gee doa twée soartn in, gee der die vele moetn beweegn, anders vervettn ze, en gee der die nie meugn beweegn of ze vermoagern... En ik zitte vaneigens by d éeste ee!'
'En kuj doa n twuk an doen?'
'Bè néeg! Pilln pakkn zeggn ze! En vele beweegn! En goed up joen voedinge lettn... En k doe kik da wei! Moa tis ool géen avance...
Moa kop da ton ne kée nieuwe oolemolle! Ge zoe nog n bitje an ne prys liggn! En noaste weke kant ool were te kléene zyn!'
'Oeieioei! Goat t zoa zére?'
'Tis ool te ziene... T bluuft n héel ende gelyk, en ommèdekée kuj nie mée in je kléern... Ge moe vele wandeln zeg n docteur en kee ne noend dus da komt goed uut... Moa k zyn zoa skuw dak n twien zoen teegn komm dak kenne ee... Dat eej ton wok nog ne kée!'
'Woa da j gy achter kykt, iedereen ee toch n twodde! En van sommigte zit t oolbinn en kuj t nie zien! En ge zy gy nie moagre, moa zoa dikke zy j gy nu toch wok nie!'
'Ja, gee gy my vroegre nie gekend ee! Kwoare kik n spriete wei! Ja, k ben doa vrée gezjeneerd van...'
'En kuj dervan geneezn?'
'Tis néen by n andern... Voe my ziet ut der oolesies nie goed uut... En ik die zoa géern oate! Noais géen tartje mée! Noais géen oliebolln mée! En nog éene kée frietn te joare!'
'Ee-ne kée frietn te-joa-re!'
'Ja, en kee nog vrée moetn zoagn teegn docteur doavoorn! Ge moe veel zoet eetn zeit ne, en k zegge jamoa, en k meuge géen frietn eetn! Ja man! Moa ton geniete k wei! En t stik nie up n bakte!'
'En eej z ool geetn voe vandjoare?'
'Nink, en k goa nog n bitje wachtn... Anders is t joar nog zoa lank! Nu k zyn deure... Dus bluuf moa bestoan ee!'
'Zeker en vaste, ge meug derup reekn! We goan nie derik stoppn!'