CONVERSOATJES ME N GLAS 7

'Eej oal ne kée noa d arloozje gekeekn?' zeg myn glas
'Van wuk tèh?' zegge k
'Wè, uj nu nie deure tert
goat de moeite nie mée zyn da j nog éen uut oalt!'
'Moa, tis wel gewist zeekre' zegge k
'T moe ny oale doage kermesse zyn'

'Méendje gy da nu?!' zeg my glas, lichtjes hysterisch
'Bajoak' zegge k, 'en doaby, k goa ton goan sloapn'
'Goan sloapn?' zeg myn glas, 'goan sloapn...
oe oed zyj gy oal dèh? Nog n bitje
en ge kruupt van n tienn in joen bedde!
En ge zy lik n oed vintje!' zeg myn glas

'Of zy j ziek miskien? Kee t lik oal willn peizen!
K zeije in myn n eign: j is èm verzekers ziek!'
'Moa k ben kik nie ziek!' zegge k
'Jamoa, zyj t zeekre?' zeg myn glas
'Tis wel nie normoal ee! De latstn tyde, alliz...
Miskien moe j ne kée noa n docteur goan!'

'Moa ba nink' zegge k, 'tis èt nietn verkéerd mè my'
'Jah? Wèh, ge zyt ton oalyk styf verachtert wi!
Goh, woar is n tyde van joen gloriejoarn
Joenges toch, welwelwel...
Nuja, tis dat ozoa moe zyn zeekre?
En te peizn da j doa nog ne Poapegoai ee zittn...
Aj doar oal an gepeisd? An diene Poapegoai?'

'Nink' zegge k, 'moa hort gy nie néeh!
K zegge da k ginne mée moete éen!'
'Ewel mersie!' zeg myn glas
'eej da nu nog van je leevn geweetn!
Ploajre!'

K zette diene Poapegoai neevnst myn glas mè ne buus
'MOA VINT TOCH' zeg myn glas
'da j nog zeije verskiet nie!
K woare oal héel in doalinge...
Aa... Ziej toet reedns gekomm dèh?
Zit er olyk nog n bitje gezoend verstand
in diene kop van joe?
Of wos t moa voe my te duuveln?
Ge kun gy n twien nog n bitje doen goan wi, gy!
Kwoare der bykans mee weg!'

Skienke myn glas oalfvul
'Alliz, santee ee' zegge k
'Jah, santee wig' zeg myn glas
'Poapegoai!'