CONVERSOATJES ME N GLAS 6

'Wuk? Ne n Omér!' zei myn glas
'wuk goa j ier nog oal in gietn?'

'K a nietn anders mée' zeie k

'Ja?' zei myn glas, 'ewèl, ge goa ton moetn
prioriteitn stelln zekers? En morrn
éest en voarool kommisjn doen? Of wuk?'

Die stemme! Sommigte kéern is
t héel Freddy de Vadder dak oore!

'Tis nu wok géen zoa slicht zeekre' zeie k

Twos éegluk bedoeld voe te sussn
moa t a lik n oavereks effect –
je skuumde van kolére en ne moment
zoate k der zels mee in dat n gieng spriengn

'WUK! Nie zoa erg? Ka joe ooger up wei!
Kpeisde da j ne mins mè smoake wos
Omér...
NE MISLUKTE DUUVLE ZEGGE KIK DOA TEEGN!'

'Vint gy kunn ard zyn! zeie k

'Gee gelyk' zei myn glas, 'tis miskien nie zoa slicht...
Moa zeg ne kée: woarom zoej n twuk
drienkn da nie slicht is
ujje n twuk kunn drienkn da goed is!'

Ee da glas oal up myn zenuwn gewerkt!
Tis oal méer of n kée gebeurd dak my
ofvroage woarom da k toch ookn
were noa da glas grype
Ja, tee oal n poar kéern nie vele geskild
of t vloag teegn de meur!

Moa nu en ton
is n der toch wok ne kée
rechte up