ZOMERTYD

Gelukkeluk woarn we joenk u wier kwamm weunn
want der wos veel werk an
U we buutn zoatn uut te bloazn - ge zag binn
géen n and mée voa joen oogn van t stof -
wos ter in ne nof n bitje voddre n twien
die zyn trompette uutprobeerde:
de perfecte soundtrack by de bergn
stéenbrokkn en gebrookn dakpann
d oede pannelattn en d uutgesmeetn roamm
D oolve, skéeve en kromme klankn kletsten
teegn de veske, recht gemetste meurn
en voe der van of te groakn stoakn
we de betonmeulne were in gank

T ee zne tyd gedeurd, meen lange mè zakkn
mè stéens gesleurd moa nu is t werk gedoan:
overoal nieuwe roamm mè dubbel glas woarachter
da de katte bestudeert wie da der ool passeert
D oede pann mè nieuwe gecombineerd
t dak giesoleerd, de woaterleidinge erleid
d ofvoerbuuzn geskid, de meurn vanbinn mè koolk
geplakt in t wit en ool buutn gecimenteerd, nieuwn
illetriek en in uus lig ter nu van enstends ne parket
en ten lange latsn een we nof er an geleid
En binst da we nu buutn kaffie zittn te drinkn
in de skowte woa dat der n doaze in myn kietn byt
speelt da trompetiestje ‘zomertyd’