maandag 18 december 2017

KASSE

'De Kringloopwinkel in Avelgem, mè Rino!'
'Alloo? Is t mè de Kriengloopwienkle?'
'Ja, mè de Kriengloopwienkle in Oavelgem!'
'Ja menéer, k zy k ik doa zjuuste gewist ee, en kee k ik doa n groate kasse gekocht!'
'Aja? Allez, proficiat!'
'En die kasse zoe moetn uut mekoar hoald zyn en gréed stoan teegn da myne vint - allez, myne ex-vint - derachter komt!'
'En die kasse kan uut mekoar madam?'
'Ja t is toopn! Nu, die vint die my holpn ee zei van wel. Ze zoe moetn gréed stoan teegn zoaterdoage ten n elfnoalf. Goa da lukkn?'
'K vréese der voarn madam!'
'Oe? Van wuk?'
'T is zoaterdoage ne feestdag madam!'
'En zy j nie oopn miskien?'
'Madam, t is nelfstn novembre, t is nietn oopn!'
'Ja! Tomme! K goa moetn were belln! Kyk, binn vuuf mnuutn belle k were!'


'De Kringloopwinkel in Avelgem, mè Rino!'
'Ja, t is ik ee! Van die kasse! Zeg, myne vint - allez, ex-vint - goa tre moandagvoarnoene teegn te n elvn achterkomm! Zoe j da kunn grée zettn teegn ton?'
'Oeie! Da goa nie goan wei madam!'
'Oe, da goa nie goan!'
'De moandoage zyn wydre geslootn!'
'E moa gow! Ku j da ton nie zeggn! K goa nu nog ne kée meugn belln!'
'Ja madam, we zyn wydre ier in Oavelgem oalsan geslootn de moandag!'
'Jah... Nu kyk, k goa k ik nog ne kée belln... Jamoa, en diesndag zy j toch oopn ée?'
'Jejoaw, en woesdag, dunderdag, vrydag en zoaterdoage wok! Lik oole weke! Buutn ut r ne féestdag tussn zit!'
'Ewwè kyk, k goa sebiet nog ne kée were belln!'

'De Kringloopwinkel in Avelgem, mè Rino!'
'Hahahaha zeg! T is nog kée ik ee! Ort, myne vint - allez, ex-vint - goa diesndag komm, teegn ten twéenn! Moa die kasse zoe ton wel moetn gréed stoan ee!'
'Géen probleem madam, da komt in orde!'
'Jamoa, ge zyt zeeker ee, wan je kom èm specioal of wei, en jee nie veel géen tyd!'
'Meug der up reekn madam, da goa doar ool skoane up èm stoan wachtn!'
'Allez, t is toopn dat t woar is! Allez bedankt ee!'
'Zelve bedankt!'
'En sorry voe ool de tillefons wei!'
'Géen probleem!'
'Allez, mersie ee!'
'Jow...'

Geen opmerkingen: