ZENUWN

Ge wos nie an de kerke
Ge werkte oole doage en de zundag
ging je noa de vinkezettinge
Snoavns zat je t liefste oolene
in de keukne mè j ne muziek
Ge a niemand noadig
en ge lachte mè de minsn
die van de zenuwn wistn
T wos joe ool gelyk

Nu oare k da je vele scréemde
en gebeedn las in bedde
omda j nie koste sloapn
Da j héele doagn
pilln pakte teegn de zenuwn
die joe ploagden en da j
de radio luwe zette
voe joe te verdoovn en da j
snachs verdoolde in je n uus

Doa lig je nu
(up joene buuk, oe méer da j skart…
éen van joen favoriete kluchtn)
Joen oogn zyn toe
joen koakn zyn ingezakt
géen muziek mée voe joen oarn
Joen zenuwn zyn stille gevooln
géen mins da j nog moe luchtn
en joen lippn
een z an mekoar geplakt