SKOAN MATERIOAL

'De kringloopwinkel in Avelgem, met Rino!'
'Alloo, is t mè de kringloopwinkle?'
'Joat, mè Rino van de kringloopwinkle in Oavelgem!'
'Meuge k ik ne kée n twuk vroagn? Oale gyder wok meubels up?'
'Zeker en vaste!'
'K zoen veruuzn en kee t éen en t andre da j meugt een!'
'Aja? Wè, k goa ne kée n nummre van de transportdienst geevn! Moe moa zeggn uj gréed zyt voe te skryvn!'
'Ja wachte wei... En jamoa, zoen ze zyder ton morrn kunn komm?'
'Morrn! Dat is wel styf rap! Ge goa veel sjanse moetn een doavoarn… Moa ge kunn noais weetn! Miskien da ze doa in t roende moetn zyn mè ne camion! Ge kun moa probeern ee!'
'Zeg moa wei!'
'Nul zessnviftig, drientwientig, neegnentwientig, véertig!'
'A, moa kée sjuuste gebeld noa doa, en t pakte niemand up!'

'Ja, t is ool n bitje loate ee… Miskien moe j nog ne kée probeern?'
'Ja, t moe morrn oolesies weg zyn wan k moete myne sleutel ofgeevn an n eigenoare!'
'En over wuk goat t sjuuste?'
'Twoalf skoane, sterke stoeln, moa z een in t duuvekot gestoan en ge goa z éest ne kée moetn ofspijtn! En ne vrée skoane sterke toafle in éen stik, woa daj mè twoalfn an kunn zittn! N deen goa wok ne kée n wreeve moetn een, wan je stoenn by die stoeln… En ton nog ne stofne canapee, meen der verre noais in gezeetn! Splinterniewe! En gee gyder toch zukne n atelier née? Woa da j retoechn doet? Wan ge goat ne wel ne kée moetn èr overtrekkn! Jee n bitje ofgezien van uuze kattn!'
'Oeie… Da klinkt éegluk nie zoa goed... Z oan da verzeekre nie willn meepakkn, uuze chauffeurs...'

'Moh! Van wuk nie? Alliz, zukkn skoan materioal!'
'Jamoaja, der is wel veel werk an, ee?'
'Jah! En ge zy gy nog van ne goe joar gy! Ge zoe gy verzekers willn da t nog ool niewe is!'
'Eégluk moej t ozoa zien menéer; moest je gy t in ne kringloopwienkle zien stoan, zoej t zelve nog willn koopn?'
'Ba nink née! Wan k geeve t weg! Moa ge moe t nie een! Kee t ool dikknst hoard, dat de kringloopwienkels zoa zindelijk gekomn zyn! Ge goa doamee moetn uplettn wei!'
'Nu moawé, menéer, weet je wuk? Bel gy moa nog ne kée noa transport! Miskien springn ze doa wel n gat in de lucht van contentement!'
'Aja, k zoe nog n bitje peizn! Alliz, k goa nog ne kée probeern!'
'En u ze vanoavnd nie mée uppakkn, moej morrnnuchnd tieluk nog ne kée belln ee!'
'K goa da zeekre doen! Bedankt ee!'
'Geirne gedoan, en ne goe n oavnd ee! En véél succes!'