maandag 27 januari 2020

GRAVEE

'Zeg joengne, mersie da j doa ne kée n bitje gravee by gesmeetn ee née!'
'Ja, tis géerne gedoan wi! K peisde, k goa moakn dat toe ligt teegn dat diene mins nog ne kée komt, dat n nie up ze neuze stekt up uuzne n uprit!'
'Ewel tis skoane van joe! Want t wos serieus ee! Zukke pittn! Moa moest je der nog n bitje stabiel by smytn, t zoe nog veel beter zyn! Alléz, t is moa ne kée zeggn ee!'
'Ja moa, k doe k ik da nie zelve wi. Ze komm zyder da doen ee.'
'K weete t, k weete t, of beetre, k weete t nie! Moa ge moet da ne kée vroagn an diene entrepeneur, dat n doa n bitje stabiel tussn smyt, da goa veel langer meegoan. Wan nu, ze rynn doarover, ze geevn goaze èj ne gravee vliegt ooverool roend, en in de kortste kéern is t were weg! En mé n oenderviftig kilo stabiel zoedn ool toekomm, da moe nie vele zyn wi! Ne kortwoagne of twée, drie.'
'En goan ze da ton nie kapotrynn, ozoa in d éerde?'
'Moa t is géne macadam ee da j doamee goa leggn! T is geweune omdat n bitje zoe toope bluuvn. En ge goa doa n héel ende geniet van een! Moa diene n entrepeneur goa da wel weetn!'
'Typ my da j gy nog n bitje van ooles kent, née?'
'Ja, kee oolsan als méestergast voe de meetroo gewerkt in Brussel! Alléz, éest als dommestiek en loatr ton upgeklomm toet méestergast! Moa nu zyk gepensioneerd ee!'
'Wel, uk diene gast van de gravee zie, k goa t èm ne kée zeggn van diene stabiel!'
'Jamoa, k wille my nie updringn wi! T is moa ne tip da k geeve!'
'T is vrée wel!'
'Ort, t is van ne n oedn da j kun léern!'
'K leere ier héele doagn by!'
'Wel, gy goa ne slimme mins zyn uj zoa oed en léluk zyt lik ik!'
'Mersie! K goa nog n bitje voarsdoen, zoa da j kun roendkykn, da w nog n twuk verdien an joe!'
'Ziej t! Ge verslimt binst da k der by stoa!'

Geen opmerkingen: