VERANDERD

We zoatn in n tring in de gazette te leezn

Voar uus zat r n koppel Russisch te klappn
of n twuk dat r up gelykt
T woarn géen snotneuzn nie mée
moa ze kéekn noa mekoar
en t wos lik of da ze droenke kwoamn
van t éne da ze zoagn

Oal n andern kant zat r n oogbejoard stel an t roam
noa buutn an t kyknd de wéreld
mè veel geboarn en woordn in t Frans t evalueern
Underne n oend zat in n tasse die up de groend stoend
toegetrokkn toet an z ne nekke
J oenk mè zen n ooft boovn de vloer
vanwoa dat n bezig wos de schoenn te bestudeern
van de twée joenge gastn die by under zoatn
mè mutsn mè droadjes die noa de gsm in under andn liepn
en woarup da ze in trance zoatn te tikkn en te wryvn
lik of da ze n deen voar under –
of miskien wel under zelvn -
zoatn te programmeern

T wos doenker bewolkt moa de zunne skéen
boovn n groate famielje zworte Afrikoann
geklid in oal de kleurn van de reegnbooge
en de vintn ann van die zwoare stemm
en de vrouwn zoatn te lachn lik of da ze gedroenkn ann
en d joenges woarn stille ann t speeln en ann t zingn
en ze sproakn van da smoakeluk Frans
n bitje lik of da Manolito in Bonanza Ingels sprak
Van bachn uus kwam ter hynotiseernde Oosterse muziek

In Brussel-Zuud ploaidn w uus uutgeleezn gazette toe
De Russn stapten of en n groepke oedere Chineezn
mè lange mantels en ne bevroorn glimlach stapte up
Der kwam ne upgeskootn student by uus zittn
die begoste te studeern mè papier en fluo stiftn
In Centraal moestn we deruut

'Ke kunne nie zeggn wonneer dat t de laste kée wos
dak met n tring zyn meegewist'
zei ze binst da we liepn noa n Bozar -
we woarn up weg noa Picasso

'moa der is nog nietn veranderd'