HALLOWIEN

T wos vandjoare myne toer
voe r eur noa t kerkof t escorteern
We woarn nen dag te tieluk
en t rook r noa zéepe en blikwoatre:
ze woarn bezig mè de groate kuus
‘Tis woaterkoed’ zei ze
en k krége rilliengn us ze de boovnkant
van eur and teegn myn koake stak

Ier en doa stoenn der plakoatn
met n uutleg da ze plekke moestn moakn
woadeure da eur voadre en eur moedre
achter ool die joarn oliek nog
uut mekoar giengn goan
Wok n broere en n zustre
moestn were noa boovn
K keke noa ovoalne, geemajeerde fotoos
van joenge minsn da k juuste moa kende
van in ne n album
en van up ne koadre in de gank

T kwam doenker
moa twoa nog moa achternoene
en t begoste te woain
‘T goa mollejoengn rinn’ zei ze
binst da ze de kol van eur veste
teegn eur kele trok

We makten toern roend zworte plassn
en liepn gejoagd tussn skéefgezakte groavn
zoender noamn
Ne noedn treurwilg ield zyn wortels
boovn de groend

Toen da k eur were noar uus rée
liet ze me stoppn by ne bakkr
Dikke druppels klabbedderden up de kappe
‘Stik my moar in brande’ zei ze
en ze pakte n ferme beete uut ne n éclair