PATTATN

'Is t woa zy j gy van Meulebeke?'
'Pardon?'
'Ze zeggn ier da j gy van Meulebeke zyt!'
'Aja, joak.'
'Ik zyn van Oastroazebeke.'
'Aja?'
'En k goa oalsan noa Meulebeke achter myn pattatn, in Oastroazebekestroate! T is doa ne boer mè vrée goe pattatn!'
'Aja?'
'Joaj. Gee van die minsn die under pattatn in de supermarkt koopn. Dedee zittn vul mè zworte plekkn uj ze skelt! En gee zukke up de markt wok! Moa t slichtste zyn die pattatn mè n groove péle, ut t nie ool géen zukke zyn! Dat is omda ze t land gevet een mè zwynoale! En uj die pattatn kokt, riek je dadde! Moe doa kée up lettn: héel t uus riekt ton noa zwynestroent! Tis doamee da k ik noa n boer goan in d Oastroazebekestroate. N deen zyn pattatn zyn skoane glets! En uj ze skelt nul zworte plekkn!'
'Da is nu néeste kée da k dà oarn!'
'Ja ze zeggn der da nie by née! Je zit in n droai doa oalverwege, alléz, oe noemt die stroate nu were... Wè, ge wit wel, sjuuste over die verbrasserie!'
'Bèjoak, k passere doa oole doage twi kéern! Allez mersie voe n tip!
'T is nietn joengne!'