KLYTOARN

'Pardon, is t woa, zy j gy ier de chéf? Wel, menére, mè me klytoarn, wuk da k ik nu teegn gekomm ee! Ge wit wel an Bossuit, diene textielcontainre die doa stoat? Ewel, kee doa sjuuste n poar zakkn mè kléern in gesmeetn, en doa per oengeluk myn otosleutels by gewupt! Alléz, k peise t toch, wan ka wok nog n lege floske van Ricard da k ool n ander kant in de glasbak een gesmeetn dus ze zoenn wok doa kun liggn! Moa kee pittn in d éerde gezocht en ze zyn weg. T moet dus téen of tandre zyn!'
'Oeieioei! En wuk eej ton gedoan?'
'Ja, sjanse da t nie te verre van myn deure is, k zyn noa ruus geloopn achter de reservesleutels, en k passeerde lans myne vint die up t land zat en k zeie t èm in n noastje, jah! Je kost er nie mee lachn wei! En kzyn ton lik ne noalve zot mè de vélo were geréen.'
'En ge zy zeekre dat éen van uuze textielcontainers is? Want k zyn kik nie van oolier en k weete ze nie oolemolle stoan.'
'Jejoat, t is zeekre éen van de kringloop! Zoe j gy doa de sleutel van een? Kzoe joe voern en ton werebringn!'

'Ik ee sjuuste moa ne sleutel van uuzne container ier, moa k goa belln noa myne collega die voe de textielcontainers kykt. Tis nu achter de viern dus z een ool gedoan mè werkn, t is géen avance da k da nu nog probeern, t goa mornuchnd zyn. Goaje joen noame en tillefonnummre up da kartje ier skryvn?'
'Ja, k goa géen ooge toedoen vannacht, k ziet ool gebeurn! Wit je wuk da da kost zukne sleutle? Nu, t is nie van da geld moa ool die miseerje voe doa weer an te groakn! Mè diene chip die doar in zit... Mè me klytoarn olyk!'
'Wuk eej wel teegn gekomm teh madam?'
'Ewel madam, da k sjuuste zegge da k in Bossuit myn otosleutels in de container mè kléern een gesmeetn!'
'Oe? En voe wuk?'
'Aja, we zyn wyder tuus van me moedre an t leegmoakn en kzyn k ik ool géekn over en t were an t rynn mè ool die zakkn kléern en kee kik nu per oengeluk die sleutels doa by gesmeetn!'

'Ewel mersie! Das direct ne héel noop miseerje ee! Weet je wuk da k ik ne kée teegn gekomm een in de supermarkt? Myn sjakosse loatn stoan!'
'Tis géen woa zeekre? En eej ze were gèt?'
'Joak. Moa achter drie weekn! Ja, da wos ool veels te loate ee! Ka kik ooles ool by loatn moakn teegn ton! Da ee my véél geld gekost wei, da grapke! Nu moa wi, k hoope da t helegans in orde komt voe joe!'
'Allez mersie madam! Ja woa woarn we? Kweet oast nie mée woa da myn oofd stoat menére! Ier n tillefonnummre. T adres moej nie een zeekre?'
'Nink, n tillefonnummre is genoeg. Moa kyk nog ne kée, want t moe wel de sjuustn zyn!'
'A moa mins toch! Eej da nu oolyk nog geweetn! Ewel mersie!'
'Wuk madam?'
'Wè kykt ier! Kée ier nu twi kéern myn otosleutels liggn! K taste in myn zakkn en k oole doa nu myn sleutels uut! Zoej olyk nie omme voaln?!'
'Ja, t is beetre ozoa née madam!'
'Goh, moa k zyn bly wi! En ge wos gydre oolemolle zoa vriendluk!' (begint te snikken)

'E moa madam toch, t is et niet gebeurd, controarje méen joe ozoa ne kée gezien, miengn anders nie weetn wie da we moestn bedankn voe ool die kléern!'
'Ga ja (snikt), k zyn kik pertank géen zukkn trunte wei, (haalt een papieren zakdoekje uit haar handtas) moa tis van neutroasje! Goh, k zyn zoa bly da k ze were een! (snuit haar neus)
Allez zeg ne kée, wuk is myn boete?'
'Boete? Voe wuk? En meen nietn moetn doen!'
'Toetoet, g ee my holpn!'
'Tee zezelvn upgelost!'
'Wel, k goa da antoenn wei!' (dept haar ogen) 'Ja, de myn hoa were zeggn… Nu je mag zeggn wuk dat n wilt, kee z oalyk were! Allez, bedankt ee!'
'Jow...'