RIMPELS

Binst n dag is t laf moa s nachs is t fris
en t zoe wok nog durvn dundern
Ge moe uplettn woa da j lopt
want der kruupn vette slekkn over n dam
Iederéen is uut congé en ooles slabakt
en t verkéer slibt were toe

In t zuudn bluuvn de parasols noa beneen
en zyn de blauwe zwemboadn leeg
Zels de skoolméesters zyn weg
D uutboaters sluutn en telln t geld
en vertrekkn noa de beweunde wéreld

Benauweluk groate kruusspinn weevn
webbn an de ruute en angn te wachtn
ge kunt der nie neevnst kykn
Oe wanhopig moe n vliege nie zyn -
zoa goe zien en je toch loatn vangn?

D appels woa da j nie by koste
vooln up de groend
De druuvn zyn rype en de plantn zyn moe
en de takkn van n treurwilg angn toet in t ges
up zoek noa zyn wortels
In n Aldi verkoopn ze snoeischoarn

De bloadn an de boamn weetn van nie beetre
of dat noais goa verandern
T oenweert en d éeste rinne ee warme
Ze trekkn nieuwe streepn up de boane
Géeneen die nog upkykt
noa ool die bloate meisjesbilln

Kannasjéern wéern uutgekuust -
hopeluks zat r géne n appel mée in -
pochettn gesorteerd, veloos in orde gezet
Moeders een were n poar nieuwe
gebruunde rimpels roend under oogn
z oedn under léege en verlangn in stilte