VERBRAND

K zoate in n bak van de sitekarre
en kéeke in n afgroend
die nu en ton vrée dichte kwam
Myn skoanvoadre versméet
geregeld van vietisse
gaf goaze en joeg da spel omoge
in droais woa dat r lik géen ende an kwam

‘Doe moa n twuk mè lange mouwn an’
at n gezeit binst dat n kéek
in de verte up de koarte
‘wan ge zoe joe léluk kunn verbrann!’
K zwéege en k hoopte ooléne moa
dat n nietn gieng krygn an zyn erte

Nu en ton checkte k mè mu selfiecamera
u Frank en Thomas mee woarn en van t moment
da we n twoasn boovn kwoamn
parkeerdn w in de geskant
trokkn uus ooft uut diene elme
en ne foto van die oenderdduuznden boamn
woarin dat der oenderdduuznden
veugels zoatn te skuufeln

en k besefte daj mè ne foto miskien
méer kun zeggn dan duuznd woordn
moa wok da j ooléne moa mè woordn
uut kun leggn wuk da j nie kun zien

En toen da we snoavns arriveerdn
loagn der n poar te broadn neevnst t zwembad
En wos t up n termometer die der neevnst oeng
nog oolsan méer dan dertig groadn
Snachs loage k tortn in me bedde
noa d oendn die uuldn
of woarn t wolvn?

Oléne t vel van myn andn wos verbrand