Ga da verzekers wok nie verwacht
Controarje, we peizn ooles is voe oolsan
moa der komt ooverool n ende an
wok ool is t minste van uus gedacht
Ge wos stomweg vergeetn
gee noais zoverre gepeisd
of t koste joe nie skilln
da j éesn zoa oed gieng komm
en nu zit je an de pilln
Ool da j ad zy j kwyt
Joene band met de wéreld eej gelost
zelfs in je geheugn gapt er n gat
Ge zyt up joene latste post
Ge vergoat tussn joen weegoarde
ier in t containerpark voe d oede van doagn
Voe wie da z ofgeschreevn een
Woa da j stikkn van minsn kost
en van joe joenges nie meug kloagn
en woa da j ooléne nog
kunt twyfeln an je verleen
Wien at r kunn voarspelln
da j zoa dikke gieng komm
van de suuker gieng weetn
n twuk an joen erte
of n poar tromboosn gienk krygn
depressief gieng zyn
Ge zy gestopt me de pilln
daj doageluks moe pakkn te telln
T zyn vrée diengn
héle doagn deur de ruute kykn
ut r miskien nog n twien goa komm
oewel da j beseft dat r n kloove gapt
Wie ier weunt is uut t leevn gestapt
Dus ang je voa n tv
nu en ton ne kée kyknd in de gang
ut r n twien tyd ee voe
mè joe mee te goan noa de wc
of toet da ze teetn briengn
Of toet da ze joe in joen bedde komm steekn
Je leevn bestoat uut wachtn
en middn in nacht verdooln in joen gedachtn
Ge zoet r nog mee kunn lachn
aj nu nie noa bachtn gemoetn
Ge kunt ooléne moa hoopn da j dromt
en da j tefete were wakker komt
Geen opmerkingen:
Een reactie posten