maandag 9 november 2020

CHIEN FLAMBEE

 'Elks ne goen dag!’

‘Wok ne goen dag!’
‘Zeg, kyk ne kée, kee ier n stoande lampe mee, zee verzekers moa twée kéern gebrand! Zie j gyder doa n twuk mee?'
'Jow née, zeker en vaste!’
'Ja myn vrouwe ad da noadig peisde ze! Ze zei da ze tonne gieng kunn leezn in de zeetle in eurne boek moa kej t? Da kom der nie van née! Kyk, téenigste dat deran is, is n droad doa vanoendre, uuzn oend eetn doa kapot gebeetn!'
'Aja, moa ze goan in uus hergebruukcentrum wel ne kée kykn oe da ze da t beste kunn vermoakn, géen probleem. En oe ist met n oend? Dat wos wok zyne beste kée nie zeekre?'
'Jah da wos nie geweune wi! Echt, we zoatn in uuzne zeetle te kykn noa n tilleviesje en ommèdekée, nen indeluksn buus! En we zoatn wyder doa, in n pietjepekdoenkre! Nu, ke koste k ik de plong were anleggn en ton zoagn we t ee, j ad up diene droad liggn bytn! Meen ton zére de pryze uutgetrokkn!’
'Jamoa, en n oend?'
'A niet ee! T wos doa niet an! Zukkn klintje, ge zoe peizn da goa chien flambee zyn, alléz, twéetwintig, das goed voe ne hot dog t een! Moa t lag èt doarachter schoane te sloapn in zyn mande! Ge verstoa joe doa niet an!'
‘Wukn chanse!’
'Ja, t wos nie wel wi van de vrouwe dak eurne lucht weg deie! Moa k zeie, géen rieske mée, k meuge t nie gedromd een, uus béestje!'
'Wel, witje wuk, miskien kuj nog n bloemtje oaln voe t goe te moakn, ze goa zoa bly zyn!'
'N bloemtje oaln?! Joak, k goa doamee begunn! We zyn véertig joar getrouwd en kee doa noais géen mode van gemakt! Ze mag ool bly zyn da ze oole doage teetn krygt! Allez, salu ee!'
‘Ja… Salu…’

Geen opmerkingen: