Oovre postnatale stress, borderline en adhd
macramé, quinoa, pokern, skatsn, sarin en maté
Oovre Raspoetin, Charles Manson en Leopold n twiddn
De Bende van Nijvle, Freddy Horion en de CCC
Over de leevns van Jotie T Hooft, Boudewijn Büch,
Ann Christy, Louis Neefs en Luc De Vos
en héele doozn versleetn reisgidsn mè d adressn
van verloopn restaurants, dancings en cafees
voe uj wil weetn oe skoane dat de wéreld éesn wos
Over de plekke up t ooft van Gorbatsjov, d oare
van Van Gogh, de neuze van Cleopatra, de bulte
van John Merrick en de piet van Jimi Hendrix
Ge zoed oast peizn dat t off is tussn Justin Bieber
en zyn publiek en we zittn ier nog mè ool die boekn
van Timberlake, Helmut Lotti, Huysentruyt en K 3
Ge kunn meurn zettn mè ool d encyclopedien
da wier krygn en isoleern mè Readers Digests
en joene kelder kuj vulln mé Artis Historia en
Lecturama voe teegn dat n illetriek uutvoolt
Ool de boekn da j moa kunn peizn
Van de grotste skrievers, de beste koks; ja preus
da k woare toen da n éeste Meus ier voa myn neuze lag!
Eej nog ne n Aspe tekort? Ne Montefiore?
Moa van viftig tintn vienn j oolene d eeste drie
Bring moa je lystje voe de strips van Suske en Wiske
Jommeke, Nero, Urbanus of de Rode Ridder
Moa wok voe Mega Mindy, Jacques Vermeire
de Kampioenen, Bassie en Adriaan en Samson en Gert
En overlatst een we héel de reekse van Kwik en Flupke gét
De Koran en n Byble, de Kama Sutra en Kahlil Gibran
Vermandere en Eddy Merkx en de klassiekers van
Buysse, Claes, Timmermans, Gilliams, Conscience
Lampo, Hannelore, Geeraerts, Michiels en Durnez
Teirlinck, Schouwenaars, Streuvels, Walschap
Ivo Victoria en Elsschot – ja, t zyn ook n dezelste da j
teegnkomt, lik Mireille Cottenjé of Luuk Gruwez
moa wok ne kée Mutsaers, Hertmans of Vekeman
en soms zit er zels n bitje poëzie by moa vele moe j nie
verwachtn buutn Gezelle en Rodenbach
En oole doage minstens éne Brusselmans, n kée te weke
ne Verhulst, ne Campert en wok Moeyaert en Mortier
stoan in de top tiene van boekn da ze binnbriengn
Ort, t is géen skande uj ier arriveert; kyk noa Celine
Melville, Cervantes, Irving, Dahl, Kafka of Claus
Moa ge moe wok nie overdryvn lik Konsalik
ool is t da Agatha Christie noais teegn stikt
Nint, t is echt nie geweune wuk dat r ier ool passeert
moa k zoe toch wok zoa géern ne kée ne boek
zien arriveern van Koenraad Goudeseune
Geen opmerkingen:
Een reactie posten