VLOAGE

We bluuvn beter binn
wan ze zeggn da t goa rinn
De zunne zit nog uut
moa de wind komt oal uut t zuudn
T is nu miskien nog blauwe lucht
moa da kan rap verandern
Nint, t is géen were voe te pandern
Ort noa da gerucht
En kée doa ves ne flits gezien
T zoe my nie verwoendern
Miskien da j oal n veste an doet
u t moet, moa beetre bluuf je binn
wan ze zeggn da t goa rinn

Pak ne boaj wan t goa verkoeln
ge kun zels oal ne spetter voeln
Kyk oe doenker da t doa zit
doa verreweg in de verte
Ge goa moetn brilln u j da nie ziet
Ge moe nie doen lik da j verskiet
Ze voarspelln t ieder eure
Oenderd liters en derdeure
Der liggn oal zandzakkn an myn deure
Lop noa buutn moa kom ny kloagn
Ut n déen ierboovn de kroane oopn droait
T goa vloagn dus bluuf moa binn
Ze zeggn oal géekn da t goa rinn

Nu is de zunne nog an t skynn
moa nat toet up je vel goai zyn
en voa da j t wit ee je n ploage
zels oal droag je je beste rinneveste
ge ku j nie kléedn teegn zukkn vloage
dus osjeblief bluuf binn
t is omda k joe géern ee da k t vroage
Want nu goat miskien nog wel
moa de wind is gedroaid
en t begun oal te woain
Ge moe de bloemm géen woater geevn
of ze goan t nie overleevn
en kom binn voe t nieuws:

t goa rinn

KAUWEJOENK

K komme an de Goethalsploatse en k zie oe da der ne veugle huppelt over de boane. Ik moete doa noa reks, en binst da k droaie zie k oe da der ne noto over ryd. T gebeurt in ne secoende en t volgende moment is die veugle doa were, an t huppeln.
T is nog n joenk. N kauwe doe léluk vanuut de lucht – krààà!, krààà!, krààà! (nie up de boane bluuvn, z oan joe doaryn, goat an de kant, gy n uul!) - en de kléen roept were – krééé!, krééé!, krééé! (an de kant, an de kant, gée gy gemakkeluk klappn, t is ier géen gés nog nietn en die wieln zyn bréed wei, en k zyn k ik géne n uul!) – en je bluuft up de boane huppeln dus k parkéere an Seysekens, de bakkery. K zie t veugeljoeng upspriengn, oal fladdernd voe voaruut te groakn binst dat n bykan veroengelukt over zyn poatn moa je sloagt der nie in voe van de groend te komm. K loope de boane up en t kauwejoenk kykt omoge, noa my, en zit ton oender myne blauwe sweather. K pakke t bundelke voarzichtig up, tastnd noa n verdikkiengske, en k pele myne boai oopn. T kopke komt voa n dag: twée lichtblauwe oogskes die curieus kykn noa wie da der em komt moein mè zyn bestoan. Uk myne viengre uutsteke noa diene bek, goatn hélengans oopn (zukne worme!) en k viene da n goe téekn. Moa k stoa doa nu…

Up ne normoaln dag zoe k de veugle nere zettn an t monument achter de bushalte, dichte by voadre of moedre die toezicht oed vanuut de lucht, moa t dundert en bliksemt en der voaln van die indelukske druppels, en in de plekke van platgeréen, goat n ton verzuupn…
K ee der n slicht gevoel by. Zyn borstbéen stikt nogoal skerp noa voarn, en da s oal géen goe téekn. Kee dat oal ne kée gezien by n kroaiejoenk, en ton a da te moakn mé n bepoalde ziekte, eek my loatn wysmoakn. D oeders zoe n djoengn doavoarn zels uut t nest smytn.
T béestje oenn in ne koaie toet da t n ne bitje ansterkt, is géen opsie. Kee oal geléerd da zukn veugeljoenk héel specifieke voedinge noadig ee, en tyd, en dat t ton nog Russische roulette is. Ge doet ookn wel n twuk verkéerd. En kee géen voedinge, en wok géen tyd voe der my mée bezig t oedn. At nu ne kée n poar weekn loatr gewist, k zyn ton in congé!
T noa Béernem, t veugelasielcentrum briengn is wok géen uplossinge; teegn da t er doa morrn éen tyd eet voe der noa te kykn, is t n oal lange mè zyn oar… En ge meugt der nie te lange mee in je n andn stoan, of t is wok foetuu... Dus weete k nie beetre wuk d ermee gedoan dan t noa t geméentepark te briengn, n kléen bitje voddre. Doa stoan der van die groate boamn woa da t oender kan zittn, beskut teegn de rinne, en mè n bitje sjanse vienn d oeders em doa were, zodoanig dat n were teetn krygt. En voe de koede moete k nie skuuw zyn vannacht.
K ry noa doa, achter t staduus, en k loope noa diene machtign boam. K geeve t béestje n zetje, zodoanig - a t erin gezeetn - dat n weg is, de lucht in... Moa je dwarrelt noa beneen en vul coroazje begunt n em deur t gés te worsteln - weg van my - stapnoalf woaby dat n poar kéern up zyne bek goat toet dat an diene boam komt.

Oaloendern, teegn de stam, komm de wortels boovn de groend. Je springt der up en t is direct n héel twuk anders. Zyn klauwn éen greepe, en je skud em n poar kéern uut, lik of da t ergste achter de rugge is. K loope were noa myne noto, kruupe d erin, en k doe de ruute oopn. K oare em roepn - Krééé! Krééé! Krééé! (Woa zit je tèh? Kée k ik oenger wei!) En ommèdekée droait n em, en zittn te kykn noa myn cammienitte, lik of dat n wil zeggn: ge peis toch nie da ze goan komm zoalange da j gy ier stoat?
Da kléen zwort veugelke, mè zyn doenkerblauw, grysd kopke, in mekoar gedookn up die twée potjes, oaloendern an diene groatn boam…
J is gestopt mè roepn. K pakke myn floske woatre, k sprienge were uut myn cammienitte en k loope der noar toe binst dak t dopke van myn floske vulle; k goa mè me n éne nand noa t kopke, en je doe were zyne bek oopn zoadoanig da k der n bitje woater in kunne gietn. Je verskiet, moa je zwelge t in. K doe da nog ne kée of twée, en ton loope k were weg.

S nachs komt ne n poar kéern goendag zeggn in myne droam, moa k weete s neuchens nie mée oe da t sjuuste in mekoar zit, en wuk dat n gezeid ee. In oale gevoal ry k nog ne kée noa doa voa da k anzette noa myn werk. J is weg. Der zit nietn by n boam. Kyke nog ne kée goe roend. En ton zie em liggn. N meter of tiene vodder up n dam die deur t park lopt. Zyn oogskes toe.
Jee getjoald. En voadre of moedre éen em nie mée gevoenn...

Der gebeurn héle doagn nateurrampn, groate accidentn, en van die oengelooflukke toern dat de minsn uutsteekn mè mekoar, o fong for no reason. Ge kun t oarn in ieder nieuwsbericht. Moa k zyn voaroal mè da veugeltje bezig, up weug noa Aovelgem. Zukkne skoane joenge veugle die noais goa vliegn...
T is mè n oalf oare da k oare da Frank zegt dat t ergste gepasseerd is, qua rinne.

ZIEK

‘K voele my nie goed
Myn erte bokt, myn ooft doe zéer
T snot lopt uut myn neuze
K zwéete en kee koed
en k oeste, k pisse en k kakke bloed

Myn oar voalt uut
Myn oarn voaln of
Myn téenn zyn zwort
Myne rugge zit blok
en k kunne me nie beweegn

Kée géen oasme
K zie oal vlekkn
Kée oaveroal t skurft
Myne derme stikt uut
en myne perluut moe gén mée een

Myne leevr doe zéer
Myn niern blokkeern
Myn loengn zyn vort
Myn eetn wil moa nie zakkn
en k moete kilo’s pilln pakkn’

‘Wel goa j zorgn
voe n briefke van n dokteur?
Allez, verzorgt joe goed,
drinkt moa ne grog
en toet binnkort!’

‘Ja ei, t is goed wei
Zet de muziek moa were luwre
Ge meug z ier oal éen geevn
Moa géne grog voe my...
Gif moa ne duuvle!’

RIFRAF

Ik verzamelde enkele stukjes die ik voor het Wekelijks Nieuws schreef en stuurde ze op naar de RifRaf. Een paar weken later belde ik op. Een zekere Carlo aan de lijn. Dat er veel medewerkers waren. Maar dat er altijd nog eentje bij kon. En zo begon mijn avontuur bij RifRaf in 1992 ofwel 24 jaar geleden... Interviews met Gumball, Lloyd Cole, The Posies, Sophia, The Jayhawks, Teenage Fanclub, The Skatalites, Bettie Serveert, Can, Giant Sand, Chris Cacavas, Joseph Arthur, The Ugly Papas, Los Lobos, Pavement, Luka Bloom, Garland Jeffreys, Vic Chessnut, Suede, The Manic Street Preachers, The Walkabouts, enz... Onvergetelijke tijden... Mijn hart bloedt... Grote dank en het ga jullie goed Filip, Mieke, Peggy en iedereen bij RifRaf

TENN DIE STROATE

We zoatn tegoare up n notobuus
Up weg noa skoole of noa r uus
Zy wos t meiske van neevnst de deure
Oaleman kéek moa niemand anders a keure

Ze kwam oalsan speeln in de vakanse
Achternoa kej joen chanse
Ze gieng mé my trouwn
En ik gienge n uus voer uus bouwn

En up ne dag gieng z up kot,
K rée d meurn up en kwoame bykan zot
N eeste moand kréege k nog ne brief
En ton wos t gedoan: z a doa n lief

N dag van vandoage weunt z in Gent
T doe nog ookn roar moa k zyt gewend
K bluuve in myn doaloopnde stroate
Voe wok te veruuzn is t nu te loate

En k zyn oal vele met tring noa Gent gereisd
Doa roendgeloopn en intussn gepeisd
Up wuk da voarby is kuj nie bluuvn tèern
En k goa nie veruuzn, k weun ier te gèern

K vroage my soms of oe dat mè joe is
Uj nog an ton peist, en of da j uus mist
Ge doe wuk da j wilt moa t is nie te loate
Ge kunt my ookn vienn tenn die stroate

Moa k goa nie veruuzn, k weun ier te gèern

TUUS

Der zyn véel cafées in t stadje by gekomm. In t weekend komm ze van oale kantn t caféleevn verkenn. K moete zeggn lik of da t is: t spel droait. Moa oeveel bewoenderinge d joenge caféboazn van nu bewéern t een voe de vedettn uut voarige generoatjes, vele een ze der – up n uutzoenderinge noa – nie van geléerd. Ge moe oal véel chanse uj n boas n kée ziet. Ze zyn vergeetn wuk da ne café vroeger wos: nen twiddn tuus, byzoenderluk voe d anciens. Vroeger gieng je noa Luc, éen van de Ronny's, Sirre, Henk of Dirk. N dag van vandoage wit je méestal nie mée wie da j achter n toag goa zien. In t beste gevoal n twien da j oal ne kée zag, in t slichtste gevoal ne upgeskootn jobstudent die verleegn wegkiekt, en der mè moeite in sloagt een goe pinte te tappn. En die n programma up de compjuuter in gank stikt omdat n géen noote muziek kent. Wuk ku j wok verwachtn van zukn gastje? Over t algeméen nog géen greintje persoanlukheid in uus. En in de plekke da j joe tuus voelt, zy j nog noais zoa oalene gewist...
Ik goa nie vele mée up café dus sorry an dedee da k nie kenne en die t anders doen. En an de réeste: trek joe myn zoaginge nie an, en noem my moa ne n oede zak. Moa k misse de cafees uut myne jeugd. En k moete nog dikkenst ne kée peizn an de Combi.

VIDEO

Wuk is t er gebeurd, woa zyn we gebleevn
Is da nu oal da w over éen, ne glimp van oe da t wos?
Iederéen is weg, en oales is gewist

Wuk zyn we vergeetn, ee we n twuk gemist?
Oelange is t oal geleen, wuk ee w overgesleegn?
Is dat éenigste dat er nog is?

Oeveel kéern ee w an dien toafle up die stoeln gezeetn?
Gekeekn noa de kriekeboam die bloeide...
De takkn die weg en were woaidn
Oaléne ier kann t tyd nog stille stoan

Oales is zoalange geleen
Géen mins die wit oe dat t nog skid
nu oales oalene nog ne droam is

Ier, t bewys van ne wéreld die bestoan é,
in ne nandern tyd, lange geleen
toet dat n twien em weg smiet, of em wist

OE IS JOENE NOAME WERE?

K weete wie da j zyt wè,
moa … kyk, kunne der nie up komm
Meug my da nie kwoaluk pakkn,
moa kunne …
kunne vrée slicht noamm antoedn

Oanzichtn vergeete k zeldn moa noamn...
Kée oal oalsan da probleem gèt
Moa k weete t wè, nie zeggn
T is nie da k nie weete wie da k zyt wè!

Oe is joene noame were?

Kyk, en k kunne t byna vaste pakkn!
T lig up t puntje van myn toenge...
K zoe t duusd kéern zeggn...
K ben t nie vergeetn wè
Alliz, ee j da nu nog geweetn!

Oelange zoe t geleen zyn oal tegoare?
K zoe t wok nie mée kunn zeggn...
Zyn da joe joenges?
Eej gy wok oal zukke groate gastn?...
En n oedstn gelykt up joen broere!
Oe, gee géen broere?...

Oe is joene noame were?

Zwiegt, lat my peizn...
Kweete t, kweete t...
Kweete t da da zéer doet zukke dingn
Moa ja, t is wok lange geleen é
Goh, woar is n tyd...
Moa gy zy nog géen oar veranderd!

Moa zoe t kunn da j gy n zuster ee die joenger is?
Alliz, oe noem ze were...
T lig up t puntje van myn toenge
Ewwè, t is myne dag nie wè vandoage!
En k zoe t duusd kéern zeggn...

(zucht)
K goa uut myn gedachtn zettn,
da komt ton van t selst, kej t
Moa k ben t nie vergeetn wè
Meug my da nie kwoaluk pakkn
K goa der nie up komm, k voele t
Moa k weete t wè, nie zeggn!

KOEKSKE

'Moa godver, wie da der doar is!'
je stoa rechte in slow motion
'Wien is da wel dè?'
'T is Rino', zegge k voe n éestn te zyn,
'zyne n oedste zeune'
My meetre kykt noa voadre
'Is da woa?' vroag ze, ze klienkt nydig, lik of da ze gestoard is
deure wuk da der nu ommèdekée uutkomt
'Joat moedre', zeg ne
'Oevéel joenges éej gy wel dè?' vroag meetre
'Viere' zeg me voadre
'En k wiste k ik da ny' zeg meetre

'Moe ze zien zittn' zeg me voadre,
'zessnneegntig kom ze tenn de moand…
En ze kruup nog ookn oalene in en uut eur bedde!'
Meetre skipt mè eur ene béen in de lucht
Der komt n vrouwe binn mè n loaprek
en ze wyst noa my en ze knikt
'Kenne joe wei!' zeg ze, 'moa kweete joene noame ny mée!'
'Rino', zegge k
'Ge goat n bitje luwre moetn zeggn wei', zeg me voadre
'Z oard ny mée goed'
'Rino', zegge k, n stik luwre nu
Z oend n and by eur oore en ze nypt mè eur oogn
'RINO', zegge k, nog luwre en ze nypt nog méer mè eur oogn
'RINO! RINO! RI-'
'Rino!' zeg ze ommèdekée, en ze lacht
lik of da ze der zelve up gekomm is
Twee reekn veel te witte tann komm voan dag,
ze steekn of lik nieuwe ruutn in n n oed uus

'Wuk goai doen dè' roept vrouwe mè eur loaprek
binst da ze bachn eur kykt
'Moa vint toch, z oa ne kée veroenglukkn!' zucht me voadre
'Ze stikt were toern uut', zeg dedée mè eur loaprek
'En t is erg de latstn tyd' zeg me voadre
'Ze trilt up eur beenn en t is lik of da ze der ieder moment
deure kan zakkn, moa toch is t ookn oal skoffelienge',
en ze roept: 'Woa moej wel zyn tèh,
wachtn ze n twoasn up joe miskien?'
'Wel mersie', zeg me meetre verskrikt, binst da ze kykt
noa my en mè eur ooft knikt noa de gank,
'da s nu n éeste kée da k ik da zien van eur!'

'EEJ JE JOE GAZETTE MEE TEH', zeg me voadre
en ze lachn oender mekoar, zels my meetre lacht mee
'Joak' zeg dedée mè eur loaprek, 'ge ken my née!
Oe min da z ier weetn oe beetre da ze sloapn!'
K zegge: 'stoat r n twuk in miskien?'
'K weete t nie' zeg myn voadre, 'moa t is doa nie voarn
da ze ze mee éet, ze goa der n twuk ingestookn éen'
'Kykt ne kée ier sig', zeg dedée mè eur loaprek,
en z oalt der n koekske in n papierke van tussn
en ze droait eur noa my: 'K moete da n bitje wegsteekn é!
Moestn ze zien da k myn koeke oalsan an je voadre geeve,
ze zoenn géen mée geevn an my, verstoaj t?
En kée k ik wok recht up n koekske, sjuuste lik ne n andern
K betoale k ik ier wok oale moande myn deel-'
'MOAN DA ME PLEZIER UPEETN!' zeg me voadre

My meetre is upgestoan en noa de wc gegoan,
myn voadre goa ne kée goan kykn
'Moa moedre toch', zeg ne, 'ge moe je n oar nie kamm,
T is nog moa gebusteld, t goa were hélegans plat liggn'
en je skud zyn nooft
Meetre komt were voan dag, en eur oar ligt siekeplat
Achter da z eur were in n eurne zeetle ée gezet,
woelt myn voadre der ne kée deure mè zyn and
Meetre recht eur met eur oogn toe

'Oe joe kloek ée broere' zeg ne um up stroate stoan
en nog ne kée héel de boane ee uutgeleid,
je gif my nog n and, 'seentje en bewoar je,
en goe uplettn lans de boane'
en k kyke in myne speegle uk weg ryn
en uk tenn de stroate komme
stoatn nog ookn te kykn
zyn oarms gekruust

MENEER

'T moet r éegluk omme doen é!'
K liepe gejoagd deur de rinne, en k kéeke kée achter my, voe zeker te zyn dat t wel teegn my wos dat die joengne t ad. Moa der wos niemand anders te zien. Je stoend n stik ooger dan ik up n gèspling, blinknd in zyn rinnekléers, mè achter em n groat staketsel da bestoend uut verskillnde oetne klimrekkn die mè loapbruggn mè mekoar verboenn woarn. K ken der nie vele van, moa in de g otomatiseerde digitoale tyd woarin da w leevn dei t surrealisties an; zels voe my wos lik antiek en k koste my nie voarnstelln dat r doa n twuk anders up kroap dan oederske joenkheedn die kiends gebleevn woarn.
'Uj ier begunt moej ookn up de parking stoan, en das zukkn soai werk... Achter n ende stikt da verskrikkeluk teegn. Kée ier indeluks achter verlangd. En nu meuge k voe n éeste kée n twuk anders doen en t rint ton!'
Je kwam n bitje dichtre.
'Peise gy da der minsn up die rekkn goan klimm in zukkn were? Da s toch véel te gevoarluk? Oe zot kuj zyn?'
K koste em géen oengelyk geevn. T glinsterde van de natte en k zoage mezelvn in gedachtn ne post pakkn dus oal wos t moa voe èm troastn, toch gienge k der nie up!
'Moa k moe k ik ier gelykoloe n héeln dag stoan… Gèja, t is werk é. En ge moe n dag van vandoage bly zyn uj werk éet né menéer?'
T is my oal n poar kéern upgevoaln de latstn tyd, da ze my menéer begunn te noemm… Zoek were kée myne board ofdoen? Of is t géen avanse mée? De joengne kéek noa my.
'Zyj oalene gekomm menéer?'
K woare k n fractie van n secoende up myn nest gepakt, moa t wos geweune n vroage. Der zat nietn achter.
'Nink' zeie k, 'k ben ier mè de gastn van me werk, moa iederéen is ier up zyn eign an t roendloopn.'
'Oeioeioei, gee wok géen chanse mè t were giedre!'
'Eégluk' zeie k, 'moej de minsn n bitje coroazje geevn in de plekke van of te pakkn.'
'Wuk?'
'Uj ier stoat, moej probeern er t beste van te moakn en positief te bluuvn. En uzze zien da j gy zels in zukkn were bluuf lachn goa j gy van lans of méer géestige werkskes meugn doen.'
'Jamoa, k zyn k ik positief wei menéer! K goa k ik noais zoagn, ge meuge t vroagn an oal de réeste die ier roendlopt, en k ee ookn leute.'
En voe n éeste kée dien dag kwam ter n lachske up zyn noanzichte.
'En ge moe zeker ne kée komm ut skoan were is' riep ne binst dak nu weer oastig deure liepe want t wos lik of dat r ierboovn éen oales at oopngezet, en twos tyd da k n twoasn binn grochte.
Moa k kéke nog ne kée achter my en je stoend nog ookn te lachn, doa in de gietnde rinne, en je zwoaide.

ALLOO

Alloo menier?
Ja, alloo?
Alloo menier?
Ja? Alloo?
Alloo?
Ja?
Menier?
Ja?
Alloo?
Alloo?
Zén k iek ien de Kriengloopwienkel?
Ja?
A menier, iek goan ver-huizn!
Aja?
En iek heb hier veul spuulen stoan!
Aja?
En die meugen weggg!
Wel da s goe nieuws madam! K goa t nummer geevn van uuzne n uphoaldienst
Welkne nummre?
Van uuzne n uphoaldienst
A, n minuutje… Ja, ja…
Nul zessnviftig, drieën-
Wachte menier, wachte, ja, ja…
…
Ja?
Nul zessnviftig, drieëntwientig, negenen-
Wachte menier, wachte, ja, ja…
…
Ja?
Moe k nog ne kée erbegunn madam?
Ja?
Nul zessnviftig, drieëntwientig, negenentwientig, véertig
A ja menier
Osjeblieft madam
En woannier goan ze ton komm menier?
Doavoarn goaj moetn belln madam
Aah, k meuge k iek belln noa dees nummre?
Joah madam
A ja, tis wel, danke menier
T is nietn madam

YABBA DABBA LABADOUX!

T is toch n wuk roars voe ne Busmins voe up n festival te stoan. Ja, t is nie voe iederéen - bedenkienkskes up n muziekske - ge moet doa goeste voarn éen. En t is ton wok zoa géestig uj de minsn up under gemak zie zittn kykn mè ne groate smile up under oanzichte, en de respons da j krygt... En dat r achternoa kléene minsn, groate minsn, joenge minsn, oede minsn komm zeggn oe géestig da ze t voenn en oeveel diengn da z erkendn... En we woarn zwoar gesoigneerd: eet en drienkn a volontée, uuzne n eign weunwoagne voe ne héeln dag en dadde binst dat t grand-cru zomerwere wos/is: ne dikke mersie Labadoux!

EEST OF LATST

K liepe verloorn
in t Shoppingcenter

Oenderd kéern passeer je doa
Je skud je n ooft uj die parkings ziet
Oal die otos die stoan an te skuuvn
(of ge skud ut nie)

Moa éest of latst
ee j jezelvn wysgemakt
da j doa wok moe zyn
voe téen of tandre

Eest of of latst kom je jezelvn doa teegn
zit je doa vaste lik ik, vannuchtnd
Uj slapt zy j doad zeggn ze
Wel, doar ak t gevoel da k sliepe

Moa vint is dat ton géestig!
Were van die parking ryn

BRIL

Oales wos ter

-teetn en drank
-minsn die der goeste in an
-muziek a volontee

Moa k a compasje mè
de bril van die wc

SMS TO DJ SNS

DJ SNS, k wille my excuseern
Kee my vergist by t presenteern
Moaja, ze klappn van de C&A
Van de KGB
Van de SPA
Van de NMBS
Oe koste k ik da weetn?
Moa t is nateurluk
DJ ESSENCE!

Sorry!
K kende myn geskiedenisse nie

POEPKE

Ik ée oal n doeske gepakt, zy is zjuuste uut bedde en ze zit achter my up de wc
K smoete n bitje zoalve an myn voarooft
Das n skoan broekske zeg ze, binst da z over n béen vrieft
Joat é, zegge k - ommédekée preus lik véertig - t is éentje da k gét é van Bert en k zwichte t n bitje

Joat, t is n skoantje zeg ze nog ne kée. Gee ter n kléen poepke mee
Moa ja zeg ze, gee gy wok n kléen poepke née
Is da goed vroage k, n kléen poepke?
Bajoat née zeg ze, k zie da nie géern wei, n dik gat!

Moa wuk is dadde zeg ze, en ze vrieft n bitje léeger over n béen, en ja, t voelt roar an
T zit nogoal dikke, en up n roare plekke, zjuuste an myn knie
Myne frang voalt
Oeie, da s myne sliep van gistern zegge k, binst da k myne broek oopn doe en t stikske textiel der uut trekke

Sjanse zeg ze, da t géne spatoader is
en
moa t is wel ne n anticlimax wei
en
best daj t ier ziet, da je ne nie moet uutoaln up n tring teféte
en,
binst da k wegloope

ofgang wei, Busmins...

DIENE TYD VAN T JOAR

De fazantn steekn underne kop boovn t ges
en coureurs skéern under beenn
en ier en doa rillnde lichtflitsn
van witte meiskesbilln
en de zunne skynt binst da t oagelt
en overoal magnoliabloemen up de groend
en kroain vliegn mè takkn deur de lucht
en de blauwreegn lopt uut
en ne twien die vier makt ten zyne lochtink
en fabriekn die under vlaggn vernieuwn
en overoal leggn ze de boann oopn
en stadswerkers zittn vaste up roende puntn
en trekteurs briengn de maximum snelheid
wok buutn de bebouwde kom
noa dertig per eure

De wéen loopn vul mé lamsvlées
en boern ploegn de maïsveldn
van verleen joare en voern oale
en plakoatn mè recloame
voe rommelmarktn skietn uut de groend
en veugels verduukn under in boamn
die nog skier in underne bloatn stoan
en in ne bréedn dyk vul oore
zit r n wit éende up eur nest
en ier en doa kuj oal n twie
zyn karavanne zien ofspijtn
en giroos kuusn de dykn
en minsn underne dam
voa under deure mè blikwoatre
en smytn ton zoet teegn t kruud

Olieveldn stoan in vulle bloei
en overoal groate bendn kletsekoppn
en oede minsn mè blauw en grys
en paars, roas oar mè fluovestn
up illetrieke veloos die stroatn ofzettn
en t verkéer saboteern deur over te steekn
en in n Aldi verkoopn ze tuunstoeln
en de tarwe kruupt stille uut de groend
en cafees zettn under terrassn buutn
en cirkussn zettn under tentn nere
en d éeste festivals breekn uut
en de velomoaker ee n oopndeurweekend
en ge zie weeroal ne kée n dikke vliege
en in nof angn der groate zwermm muggn
en de gebeur ryd voe n twidde kée t ges of

PRESIDENT POETIN

Is t woa da j géen kluchtjes meug moakn over joe
of da j kunt n boetin?

Uk ik joe zie up n tilleviesje is t lik of da j gy lacht
wok oal lache gy nie, doa zie j gy echt vrée goedin!

Ik peise da j gy stief bespoart up goaze en illetriek,
uk ik de minsn roend joe zie, t is lik of da ze oalemoale koedin

En k eet hoard van die Panamagazette
daj gy zukn spoarpotje ée en noa da t skient zit er doa veel poetin

Moa ge kun nie geloovn wuk n deugd dat t doet
te weetn dat j gy wok ne kée te doage noa de wc moet
wok moe goapn uj moe zyt en voe te kunn sloapn
sjuuste lik wieder wok je n oogn toedoet

In de joarn tachtig woarn we benauld van de Russn
moa noa da t skynt zyn nu zels de Russn benauld van president Poetin

T skynt da ze nietn verkéerd meugn zeggn of skrievn over gy of da j gy
ze voe oalsan lat zwygn en vodder wok nog da j gy ne dictator zoezin

Der zyn véel minsn die zeggn da j ze nie oals toape éet
en da j gy oalene moa dingn doe voe macht of mè winstgeevnde bedoelin

En da j zoa goed in judo zyt, en up joen duuzndn gemakkn van iederéen wient
moa mè zukkn reputoaje, t zoe toch roar zyn uj gy nie zoewin

Moa ge kun nie geloovn wuk n deugd dat t doet
te weetn dat j gy wok ne kée te doage noa de wc moet
wok moe goapn uj moe zyt en voe te kunn sloapn
sjuuste lik wieder wok je n oogn toedoet

Want soms is t lik da j gy n machine zyt
diene mins up n tilleviesje, t zit doa lik géen bloedin

Eétje gy wel gezoend?
Of eej gy n twien die let up joen voedin?

K oore da j geskid zyt; ne vint in zukk posiesje die oalene moe weunn
en snoavns nog eetn moe kookn, en wosn en strykn, da kan toch ny goezin

President Poetin, doet e kée nie zoa roar, de mins komm benauld,
binst da z t oal zoa moeiluk éen, sprikt uus ne kée n bitje moedin

Moa ge kun nie geloovn wuk n deugd dat t doet
te weetn dat j gy wok ne kée te doage noa de wc moet
wok moe goapn uj moe zyt en voe te kunn sloapn
sjuuste lik wieder wok je n oogn toedoet

VESTJE

Ik was aan het opruimen rond de inkom van de winkel en zag Jacqueline naderbij komen. Ze was op korte tijd erg verouderd. Maar nu liep ze nog meer voorovergebogen dan anders, zette kleine, onzekere stapjes en maakte een vermoeide, verkrampte indruk. Haar blik was op de grond gericht waardoor ze me niet zag, zelfs niet toen ze bijna voor me stond.

'Jacqueline!' riep ik; ze richtte zich op en meteen kwam er een brede glimlach over haar oude, benige gezicht, die echter onmiddellijk weer verdween.
'Aah, menere!' zuchtte ze (ik had haar al vaker gevraagd me bij mijn voornaam aan te spreken maar ze bleef meneer zeggen) 'moa ik zyn bly da k ik ier zyn! Mins toch, mins toch…' Ze legde een hand op mijn arm voor wat steun en schuifelde verder, richting deur.
'Oh jujuj oalyk, wuk da k ik nu teegngekomm zyn, k durve t byna nie vertelln…' En ze schudde haar oude hoofd terwijl ze met een gekwetste, kwade blik voor zich keek.

'Ge wit wel, da beigne, leerne vestje da k ier gekocht éen?'
Jacqueline en haar leren jasjes… Iedere week vindt ze wel eentje, maar telkens zijn ze te groot of te klein. Het zijn koopjes, maar ze zou zich blauw betalen om ze te laten verstellen tot ze haar passen. Aandoenlijkst is haar ongeloof wanneer we er haar op wijzen dat je iets dat te groot is kunt verkleinen, maar iets dat te klein is niet kunt groter maken…
Ze is heel erg mager, en klein van gestalte, maar doordat ze zo krom is gegroeid moet ze haar gading tussen de iets grotere maten zoeken. En ze kan haar kledij hier niet passen, daar heeft ze hulp bij nodig. Dus neemt ze alles mee met de afspraak dat ze het terug kan brengen om te ruilen. Wat ze nadien meestal ook doet.

'Ziej t voa joe? Da zat echt perfect é? Wel, k benne t kwyt!' En ze keek naar me, met een hysterische blik vanuit die opengesperde ogen. Zo had ik haar nog nooit gezien.
'K zyn kwoad! menere, kwoad, kwoad, goh, echt, k zoe moetn kunn...' en ze balde haar vuisten terwijl haar ogen zich vernauwden, maar toen ontspande ze zich, liet haar blik zakken en zei: 'jah, en k moete pertanks up niemand dul zyn buutn up mezelvn...

Ze richte zich weer naar me op: 'Oale weke, oale weke komm n em achter zyne n aperitief, zukke gloazn' – ze hield haar duim en wijsvinger van haar rechterhand zover mogelijk uit elkaar – 'oale weke, en nie oalene by my wei! By véél minsn in de stroate! En oale weke zitn doa, in myne beste zetel, en verleen weke, ja zeg ne, wuk n skoan vestje dat r doa an die stoel angt! En k zegge nog: Jamoa, t is t myne wei, oal lachn. En k zegge, moej t ne kée passn? En je doet em da an, en k moete zeggn: je wos t er echt skoane mee. Doet moa weer of wei, zegge k, were oal lachn moa je zegt: zeg Jacquelientje, meuge k t ne kée mee doen voe te toann tuus? Da ze weetn wukn vestje dat t is da k zoeke? Ge wit gy toch wok oe moeiluk dat is teegn da j n twuk teegn komt da noa je gedacht is. En jée t em da vestje meegedoan, moe joenk toch, mè myn klietoarn! Oe dom, oe dom kuj toch zyn!' En ze sloeg met haar hand tegen haar eigen hoofd.

'Zoe j nog zuk éentje een menere? Ge wit wel, da beigne vestje da k ier overlatst gekocht een, zukn skoan vestje! Kée t joe ton komm toan! Of wil je kykn ut er nog zuk éentje binn komt, voe t upsiets t oedn? Ge wit, k komme oale weke, en oaltemets n poar kéern te weke…' Ik vroeg haar wat er nu eigenlijk precies gebeurd was.

'Ewél' zei ze, 'ja, je wos em doa mee weg née! En vandeweke, j is em doa ommédekée were, en je zit em were in die zeetle, en skienke k ik zyne n aperitief uut, t wos de réeste van de floske, en je pakt em ne goe slok en je geboart em van niet. K zegge jamoaja in myn eign, da goat ier géen woa zyn wei! En k zegge: éwel? Woar is myn vestje? Wit je wuk dat n zei? Wuk n vestje? K weete k ik van géen vestje! Jacqueline, ge zy gy n bitje an t deuresloan wei! Kee k ik ier géen vestje gezien, k loate voarn, meegedoan!'

'Eej da nu nog va j leevn geweetn! K zegge: Wuk! Gyne vuuln dief! De floske ier is uut, ziej t? Wel, t wos de latste! En t is gedoan mé ier aperitief te komm drienkn, ge moe moa elders goan voe je gat te warmm!' Ze raasde, ze was buiten zinnen, maar ondertussen haalde ze een grote zakdoek uit haar handtas en depte haar ogen.
'Ooh menere toch, ge zyt olyk noais t oed voe te léern né…'

'Jamoa, verleen weke, k a zukkn zéer am myn tann, wit je t nie mée da k ier roend liepe mé n and an myn koake? En k zoate doa an toafle binst dat n em in myne zeetle zat, en echt, k vergienge k ik van t zéer, en k zegge: Géet oaltemets nietn by joe zeekre? N Dafalgan of zoa? En nei, nateurluk ad n nietn by em, en k zegge: T is kart voa te zessn, ge zoe nie noa n apoteeker willn goan zeekre, ier n poar uuzn voddre, teegn da k ik doa zyn is t oal geslootn… Oeieoei, k a tonne twuk gezeid! Wuk? Is t oal zoa loate? In éne kée zyn glas uut en je moeste zéere weg, want je moeste éegluk oal in Ronse zyn! J ah voe nietn géen tyd mée, en in géne wiend wos t n weg…'

'Kée der noais nietn van gét, en kée oalsan gegeevn, an diene gierigoard, diene krebbebietre, goh, k meuge der nie an peizn, oal die joarn… En ik, domme lutte, k geeve ton nog myn skoan vestje mee! K ligge snachs wakker van d erup te peizn!' Haar zakdoek ging gedurig heen en weer, van oog tot oog.

'Orte kée Jacqueline' zei ik, 'g goa gy da géen twée kéern teegn komm!' ('Oalesies niet' mompelde ze.) 'En we goan wieder ier wel were zukkn vestje binnkriegn; miskien nie in t selste kleur, of t selste model, moa n skoantje da joe goa zittn lik gegootn! Ge wit, véel geld goat nie kostn, t éenigste da ier moet éen is tyd van wachtn.'
'Moa dat éek wi' zei ze, 'kée oal n tyd van de wéreld! En k goa nog méer komm nu!'

'En kée noa de gebeurs gewist en verteld wuk dat er gebeurd is, en zyder éen t wok were deure gezeid, en in uuze stroate moetn nie mée zyn, de niewéerd!
Moa vanneuchnd, uk upstoene stoend t skréemm my noader dan t lachn en k kunne zoa moeilijk weg voe t moment, myn béenn zyn gezwolln, en ka géen vervoer, moa k zeie, dat t is da t wilt! K moete noa de Kringloopwinkle! En kée n stik mét n otobuus kunn doen, en de réeste te voete, en kée der wel lange over gedoan, moa k zyn ier oalyk né! En binn n eurenoalf komt myn gebeursvrouwe my oaln, dus doa moe k ny mée inzittn!'

En door haar tranen heen lachte ze naar me en ze greep naar mijn armen en ze zei: 'Goh, ge goa t oalichte geloovn zeekre? Uk zegge da k ier géern komme?' En toen liet ze me los, nam de tas op die ze had neergezet en zei: 'Kyk, en kée nog n poar diengn méegebrocht voe of te geevn…'

ZWEMBROEK

We zoatn te kykn noa ne filme
D joenges sproengn in t zwembad
Moa vint toch, zei ze, t is lange geleen
da we da nog gedoan éen!

Joat wi, zeie k
Woa n da were kée doen ée, zei ze
Zoe j die zwembroek nog éen?
Nu, kop toch moa ne kée ne nieuwn...