TWIENTIG CENT

‘Uj nie kunn zwemm, kruup ton nie up ne boat’ zei me voadre
‘En uj nie kunn vliegn, kruup ton nie in ne vliegre!’
Je zat vul mè van die spreukn

‘Ak moa de zeune gewist van ne ministre’ zeit n up ne kée,
binst dat n zyn plakkerskostuume an trok
Of, ‘in de lucht is t er nietn te vienn!’ uk stoene te droamn
K moeste lachn

‘Ja moa ja, wachte moa! Toe da noedn der nie mée is…
Meziele, goa j zeggn: je wos t r verdomme recht up!’
Ja me voadre… T wos by momentn ne n echtn filosoof

We liepn up ne kée up de markt in Diksmuude
j a congé en da wos uus reize
en ommèdekée stuupte n èm en je rapte
n briefke van oenderd frank up
We stoenn oolemolle te kykn lik van t lam gods gesleegn
Ga zyn n oanzichte moetn zien!

T is n éeuwigheid geleen moa k moeste der an peizn
binst da k noa de gazettewienkle liepe
Voa de deure lag ter twientig cent up de groend