KOEKSKE

'Moa godver, wie da der doar is!'
je stoa rechte in slow motion
'Wien is da wel dè?'
'T is Rino', zegge k voe n éestn te zyn,
'zyne n oedste zeune'
My meetre kykt noa voadre
'Is da woa?' vroag ze, ze klienkt nydig, lik of da ze gestoard is
deure wuk da der nu ommèdekée uutkomt
'Joat moedre', zeg ne
'Oevéel joenges éej gy wel dè?' vroag meetre
'Viere' zeg me voadre
'En k wiste k ik da ny' zeg meetre

'Moe ze zien zittn' zeg me voadre,
'zessnneegntig kom ze tenn de moand…
En ze kruup nog ookn oalene in en uut eur bedde!'
Meetre skipt mè eur ene béen in de lucht
Der komt n vrouwe binn mè n loaprek
en ze wyst noa my en ze knikt
'Kenne joe wei!' zeg ze, 'moa kweete joene noame ny mée!'
'Rino', zegge k
'Ge goat n bitje luwre moetn zeggn wei', zeg me voadre
'Z oard ny mée goed'
'Rino', zegge k, n stik luwre nu
Z oend n and by eur oore en ze nypt mè eur oogn
'RINO', zegge k, nog luwre en ze nypt nog méer mè eur oogn
'RINO! RINO! RI-'
'Rino!' zeg ze ommèdekée, en ze lacht
lik of da ze der zelve up gekomm is
Twee reekn veel te witte tann komm voan dag,
ze steekn of lik nieuwe ruutn in n n oed uus

'Wuk goai doen dè' roept vrouwe mè eur loaprek
binst da ze bachn eur kykt
'Moa vint toch, z oa ne kée veroenglukkn!' zucht me voadre
'Ze stikt were toern uut', zeg dedée mè eur loaprek
'En t is erg de latstn tyd' zeg me voadre
'Ze trilt up eur beenn en t is lik of da ze der ieder moment
deure kan zakkn, moa toch is t ookn oal skoffelienge',
en ze roept: 'Woa moej wel zyn tèh,
wachtn ze n twoasn up joe miskien?'
'Wel mersie', zeg me meetre verskrikt, binst da ze kykt
noa my en mè eur ooft knikt noa de gank,
'da s nu n éeste kée da k ik da zien van eur!'

'EEJ JE JOE GAZETTE MEE TEH', zeg me voadre
en ze lachn oender mekoar, zels my meetre lacht mee
'Joak' zeg dedée mè eur loaprek, 'ge ken my née!
Oe min da z ier weetn oe beetre da ze sloapn!'
K zegge: 'stoat r n twuk in miskien?'
'K weete t nie' zeg myn voadre, 'moa t is doa nie voarn
da ze ze mee éet, ze goa der n twuk ingestookn éen'
'Kykt ne kée ier sig', zeg dedée mè eur loaprek,
en z oalt der n koekske in n papierke van tussn
en ze droait eur noa my: 'K moete da n bitje wegsteekn é!
Moestn ze zien da k myn koeke oalsan an je voadre geeve,
ze zoenn géen mée geevn an my, verstoaj t?
En kée k ik wok recht up n koekske, sjuuste lik ne n andern
K betoale k ik ier wok oale moande myn deel-'
'MOAN DA ME PLEZIER UPEETN!' zeg me voadre

My meetre is upgestoan en noa de wc gegoan,
myn voadre goa ne kée goan kykn
'Moa moedre toch', zeg ne, 'ge moe je n oar nie kamm,
T is nog moa gebusteld, t goa were hélegans plat liggn'
en je skud zyn nooft
Meetre komt were voan dag, en eur oar ligt siekeplat
Achter da z eur were in n eurne zeetle ée gezet,
woelt myn voadre der ne kée deure mè zyn and
Meetre recht eur met eur oogn toe

'Oe joe kloek ée broere' zeg ne um up stroate stoan
en nog ne kée héel de boane ee uutgeleid,
je gif my nog n and, 'seentje en bewoar je,
en goe uplettn lans de boane'
en k kyke in myne speegle uk weg ryn
en uk tenn de stroate komme
stoatn nog ookn te kykn
zyn oarms gekruust

MENEER

'T moet r éegluk omme doen é!'
K liepe gejoagd deur de rinne, en k kéeke kée achter my, voe zeker te zyn dat t wel teegn my wos dat die joengne t ad. Moa der wos niemand anders te zien. Je stoend n stik ooger dan ik up n gèspling, blinknd in zyn rinnekléers, mè achter em n groat staketsel da bestoend uut verskillnde oetne klimrekkn die mè loapbruggn mè mekoar verboenn woarn. K ken der nie vele van, moa in de g otomatiseerde digitoale tyd woarin da w leevn dei t surrealisties an; zels voe my wos lik antiek en k koste my nie voarnstelln dat r doa n twuk anders up kroap dan oederske joenkheedn die kiends gebleevn woarn.
'Uj ier begunt moej ookn up de parking stoan, en das zukkn soai werk... Achter n ende stikt da verskrikkeluk teegn. Kée ier indeluks achter verlangd. En nu meuge k voe n éeste kée n twuk anders doen en t rint ton!'
Je kwam n bitje dichtre.
'Peise gy da der minsn up die rekkn goan klimm in zukkn were? Da s toch véel te gevoarluk? Oe zot kuj zyn?'
K koste em géen oengelyk geevn. T glinsterde van de natte en k zoage mezelvn in gedachtn ne post pakkn dus oal wos t moa voe èm troastn, toch gienge k der nie up!
'Moa k moe k ik ier gelykoloe n héeln dag stoan… Gèja, t is werk é. En ge moe n dag van vandoage bly zyn uj werk éet né menéer?'
T is my oal n poar kéern upgevoaln de latstn tyd, da ze my menéer begunn te noemm… Zoek were kée myne board ofdoen? Of is t géen avanse mée? De joengne kéek noa my.
'Zyj oalene gekomm menéer?'
K woare k n fractie van n secoende up myn nest gepakt, moa t wos geweune n vroage. Der zat nietn achter.
'Nink' zeie k, 'k ben ier mè de gastn van me werk, moa iederéen is ier up zyn eign an t roendloopn.'
'Oeioeioei, gee wok géen chanse mè t were giedre!'
'Eégluk' zeie k, 'moej de minsn n bitje coroazje geevn in de plekke van of te pakkn.'
'Wuk?'
'Uj ier stoat, moej probeern er t beste van te moakn en positief te bluuvn. En uzze zien da j gy zels in zukkn were bluuf lachn goa j gy van lans of méer géestige werkskes meugn doen.'
'Jamoa, k zyn k ik positief wei menéer! K goa k ik noais zoagn, ge meuge t vroagn an oal de réeste die ier roendlopt, en k ee ookn leute.'
En voe n éeste kée dien dag kwam ter n lachske up zyn noanzichte.
'En ge moe zeker ne kée komm ut skoan were is' riep ne binst dak nu weer oastig deure liepe want t wos lik of dat r ierboovn éen oales at oopngezet, en twos tyd da k n twoasn binn grochte.
Moa k kéke nog ne kée achter my en je stoend nog ookn te lachn, doa in de gietnde rinne, en je zwoaide.

ALLOO

Alloo menier?
Ja, alloo?
Alloo menier?
Ja? Alloo?
Alloo?
Ja?
Menier?
Ja?
Alloo?
Alloo?
Zén k iek ien de Kriengloopwienkel?
Ja?
A menier, iek goan ver-huizn!
Aja?
En iek heb hier veul spuulen stoan!
Aja?
En die meugen weggg!
Wel da s goe nieuws madam! K goa t nummer geevn van uuzne n uphoaldienst
Welkne nummre?
Van uuzne n uphoaldienst
A, n minuutje… Ja, ja…
Nul zessnviftig, drieën-
Wachte menier, wachte, ja, ja…
…
Ja?
Nul zessnviftig, drieëntwientig, negenen-
Wachte menier, wachte, ja, ja…
…
Ja?
Moe k nog ne kée erbegunn madam?
Ja?
Nul zessnviftig, drieëntwientig, negenentwientig, véertig
A ja menier
Osjeblieft madam
En woannier goan ze ton komm menier?
Doavoarn goaj moetn belln madam
Aah, k meuge k iek belln noa dees nummre?
Joah madam
A ja, tis wel, danke menier
T is nietn madam

YABBA DABBA LABADOUX!

T is toch n wuk roars voe ne Busmins voe up n festival te stoan. Ja, t is nie voe iederéen - bedenkienkskes up n muziekske - ge moet doa goeste voarn éen. En t is ton wok zoa géestig uj de minsn up under gemak zie zittn kykn mè ne groate smile up under oanzichte, en de respons da j krygt... En dat r achternoa kléene minsn, groate minsn, joenge minsn, oede minsn komm zeggn oe géestig da ze t voenn en oeveel diengn da z erkendn... En we woarn zwoar gesoigneerd: eet en drienkn a volontée, uuzne n eign weunwoagne voe ne héeln dag en dadde binst dat t grand-cru zomerwere wos/is: ne dikke mersie Labadoux!

EEST OF LATST

K liepe verloorn
in t Shoppingcenter

Oenderd kéern passeer je doa
Je skud je n ooft uj die parkings ziet
Oal die otos die stoan an te skuuvn
(of ge skud ut nie)

Moa éest of latst
ee j jezelvn wysgemakt
da j doa wok moe zyn
voe téen of tandre

Eest of of latst kom je jezelvn doa teegn
zit je doa vaste lik ik, vannuchtnd
Uj slapt zy j doad zeggn ze
Wel, doar ak t gevoel da k sliepe

Moa vint is dat ton géestig!
Were van die parking ryn

BRIL

Oales wos ter

-teetn en drank
-minsn die der goeste in an
-muziek a volontee

Moa k a compasje mè
de bril van die wc

SMS TO DJ SNS

DJ SNS, k wille my excuseern
Kee my vergist by t presenteern
Moaja, ze klappn van de C&A
Van de KGB
Van de SPA
Van de NMBS
Oe koste k ik da weetn?
Moa t is nateurluk
DJ ESSENCE!

Sorry!
K kende myn geskiedenisse nie

POEPKE

Ik ée oal n doeske gepakt, zy is zjuuste uut bedde en ze zit achter my up de wc
K smoete n bitje zoalve an myn voarooft
Das n skoan broekske zeg ze, binst da z over n béen vrieft
Joat é, zegge k - ommédekée preus lik véertig - t is éentje da k gét é van Bert en k zwichte t n bitje

Joat, t is n skoantje zeg ze nog ne kée. Gee ter n kléen poepke mee
Moa ja zeg ze, gee gy wok n kléen poepke née
Is da goed vroage k, n kléen poepke?
Bajoat née zeg ze, k zie da nie géern wei, n dik gat!

Moa wuk is dadde zeg ze, en ze vrieft n bitje léeger over n béen, en ja, t voelt roar an
T zit nogoal dikke, en up n roare plekke, zjuuste an myn knie
Myne frang voalt
Oeie, da s myne sliep van gistern zegge k, binst da k myne broek oopn doe en t stikske textiel der uut trekke

Sjanse zeg ze, da t géne spatoader is
en
moa t is wel ne n anticlimax wei
en
best daj t ier ziet, da je ne nie moet uutoaln up n tring teféte
en,
binst da k wegloope

ofgang wei, Busmins...

DIENE TYD VAN T JOAR

De fazantn steekn underne kop boovn t ges
en coureurs skéern under beenn
en ier en doa rillnde lichtflitsn
van witte meiskesbilln
en de zunne skynt binst da t oagelt
en overoal magnoliabloemen up de groend
en kroain vliegn mè takkn deur de lucht
en de blauwreegn lopt uut
en ne twien die vier makt ten zyne lochtink
en fabriekn die under vlaggn vernieuwn
en overoal leggn ze de boann oopn
en stadswerkers zittn vaste up roende puntn
en trekteurs briengn de maximum snelheid
wok buutn de bebouwde kom
noa dertig per eure

De wéen loopn vul mé lamsvlées
en boern ploegn de maïsveldn
van verleen joare en voern oale
en plakoatn mè recloame
voe rommelmarktn skietn uut de groend
en veugels verduukn under in boamn
die nog skier in underne bloatn stoan
en in ne bréedn dyk vul oore
zit r n wit éende up eur nest
en ier en doa kuj oal n twie
zyn karavanne zien ofspijtn
en giroos kuusn de dykn
en minsn underne dam
voa under deure mè blikwoatre
en smytn ton zoet teegn t kruud

Olieveldn stoan in vulle bloei
en overoal groate bendn kletsekoppn
en oede minsn mè blauw en grys
en paars, roas oar mè fluovestn
up illetrieke veloos die stroatn ofzettn
en t verkéer saboteern deur over te steekn
en in n Aldi verkoopn ze tuunstoeln
en de tarwe kruupt stille uut de groend
en cafees zettn under terrassn buutn
en cirkussn zettn under tentn nere
en d éeste festivals breekn uut
en de velomoaker ee n oopndeurweekend
en ge zie weeroal ne kée n dikke vliege
en in nof angn der groate zwermm muggn
en de gebeur ryd voe n twidde kée t ges of

PRESIDENT POETIN

Is t woa da j géen kluchtjes meug moakn over joe
of da j kunt n boetin?

Uk ik joe zie up n tilleviesje is t lik of da j gy lacht
wok oal lache gy nie, doa zie j gy echt vrée goedin!

Ik peise da j gy stief bespoart up goaze en illetriek,
uk ik de minsn roend joe zie, t is lik of da ze oalemoale koedin

En k eet hoard van die Panamagazette
daj gy zukn spoarpotje ée en noa da t skient zit er doa veel poetin

Moa ge kun nie geloovn wuk n deugd dat t doet
te weetn dat j gy wok ne kée te doage noa de wc moet
wok moe goapn uj moe zyt en voe te kunn sloapn
sjuuste lik wieder wok je n oogn toedoet

In de joarn tachtig woarn we benauld van de Russn
moa noa da t skynt zyn nu zels de Russn benauld van president Poetin

T skynt da ze nietn verkéerd meugn zeggn of skrievn over gy of da j gy
ze voe oalsan lat zwygn en vodder wok nog da j gy ne dictator zoezin

Der zyn véel minsn die zeggn da j ze nie oals toape éet
en da j gy oalene moa dingn doe voe macht of mè winstgeevnde bedoelin

En da j zoa goed in judo zyt, en up joen duuzndn gemakkn van iederéen wient
moa mè zukkn reputoaje, t zoe toch roar zyn uj gy nie zoewin

Moa ge kun nie geloovn wuk n deugd dat t doet
te weetn dat j gy wok ne kée te doage noa de wc moet
wok moe goapn uj moe zyt en voe te kunn sloapn
sjuuste lik wieder wok je n oogn toedoet

Want soms is t lik da j gy n machine zyt
diene mins up n tilleviesje, t zit doa lik géen bloedin

Eétje gy wel gezoend?
Of eej gy n twien die let up joen voedin?

K oore da j geskid zyt; ne vint in zukk posiesje die oalene moe weunn
en snoavns nog eetn moe kookn, en wosn en strykn, da kan toch ny goezin

President Poetin, doet e kée nie zoa roar, de mins komm benauld,
binst da z t oal zoa moeiluk éen, sprikt uus ne kée n bitje moedin

Moa ge kun nie geloovn wuk n deugd dat t doet
te weetn dat j gy wok ne kée te doage noa de wc moet
wok moe goapn uj moe zyt en voe te kunn sloapn
sjuuste lik wieder wok je n oogn toedoet

VESTJE

Ik was aan het opruimen rond de inkom van de winkel en zag Jacqueline naderbij komen. Ze was op korte tijd erg verouderd. Maar nu liep ze nog meer voorovergebogen dan anders, zette kleine, onzekere stapjes en maakte een vermoeide, verkrampte indruk. Haar blik was op de grond gericht waardoor ze me niet zag, zelfs niet toen ze bijna voor me stond.

'Jacqueline!' riep ik; ze richtte zich op en meteen kwam er een brede glimlach over haar oude, benige gezicht, die echter onmiddellijk weer verdween.
'Aah, menere!' zuchtte ze (ik had haar al vaker gevraagd me bij mijn voornaam aan te spreken maar ze bleef meneer zeggen) 'moa ik zyn bly da k ik ier zyn! Mins toch, mins toch…' Ze legde een hand op mijn arm voor wat steun en schuifelde verder, richting deur.
'Oh jujuj oalyk, wuk da k ik nu teegngekomm zyn, k durve t byna nie vertelln…' En ze schudde haar oude hoofd terwijl ze met een gekwetste, kwade blik voor zich keek.

'Ge wit wel, da beigne, leerne vestje da k ier gekocht éen?'
Jacqueline en haar leren jasjes… Iedere week vindt ze wel eentje, maar telkens zijn ze te groot of te klein. Het zijn koopjes, maar ze zou zich blauw betalen om ze te laten verstellen tot ze haar passen. Aandoenlijkst is haar ongeloof wanneer we er haar op wijzen dat je iets dat te groot is kunt verkleinen, maar iets dat te klein is niet kunt groter maken…
Ze is heel erg mager, en klein van gestalte, maar doordat ze zo krom is gegroeid moet ze haar gading tussen de iets grotere maten zoeken. En ze kan haar kledij hier niet passen, daar heeft ze hulp bij nodig. Dus neemt ze alles mee met de afspraak dat ze het terug kan brengen om te ruilen. Wat ze nadien meestal ook doet.

'Ziej t voa joe? Da zat echt perfect é? Wel, k benne t kwyt!' En ze keek naar me, met een hysterische blik vanuit die opengesperde ogen. Zo had ik haar nog nooit gezien.
'K zyn kwoad! menere, kwoad, kwoad, goh, echt, k zoe moetn kunn...' en ze balde haar vuisten terwijl haar ogen zich vernauwden, maar toen ontspande ze zich, liet haar blik zakken en zei: 'jah, en k moete pertanks up niemand dul zyn buutn up mezelvn...

Ze richte zich weer naar me op: 'Oale weke, oale weke komm n em achter zyne n aperitief, zukke gloazn' – ze hield haar duim en wijsvinger van haar rechterhand zover mogelijk uit elkaar – 'oale weke, en nie oalene by my wei! By véél minsn in de stroate! En oale weke zitn doa, in myne beste zetel, en verleen weke, ja zeg ne, wuk n skoan vestje dat r doa an die stoel angt! En k zegge nog: Jamoa, t is t myne wei, oal lachn. En k zegge, moej t ne kée passn? En je doet em da an, en k moete zeggn: je wos t er echt skoane mee. Doet moa weer of wei, zegge k, were oal lachn moa je zegt: zeg Jacquelientje, meuge k t ne kée mee doen voe te toann tuus? Da ze weetn wukn vestje dat t is da k zoeke? Ge wit gy toch wok oe moeiluk dat is teegn da j n twuk teegn komt da noa je gedacht is. En jée t em da vestje meegedoan, moe joenk toch, mè myn klietoarn! Oe dom, oe dom kuj toch zyn!' En ze sloeg met haar hand tegen haar eigen hoofd.

'Zoe j nog zuk éentje een menere? Ge wit wel, da beigne vestje da k ier overlatst gekocht een, zukn skoan vestje! Kée t joe ton komm toan! Of wil je kykn ut er nog zuk éentje binn komt, voe t upsiets t oedn? Ge wit, k komme oale weke, en oaltemets n poar kéern te weke…' Ik vroeg haar wat er nu eigenlijk precies gebeurd was.

'Ewél' zei ze, 'ja, je wos em doa mee weg née! En vandeweke, j is em doa ommédekée were, en je zit em were in die zeetle, en skienke k ik zyne n aperitief uut, t wos de réeste van de floske, en je pakt em ne goe slok en je geboart em van niet. K zegge jamoaja in myn eign, da goat ier géen woa zyn wei! En k zegge: éwel? Woar is myn vestje? Wit je wuk dat n zei? Wuk n vestje? K weete k ik van géen vestje! Jacqueline, ge zy gy n bitje an t deuresloan wei! Kee k ik ier géen vestje gezien, k loate voarn, meegedoan!'

'Eej da nu nog va j leevn geweetn! K zegge: Wuk! Gyne vuuln dief! De floske ier is uut, ziej t? Wel, t wos de latste! En t is gedoan mé ier aperitief te komm drienkn, ge moe moa elders goan voe je gat te warmm!' Ze raasde, ze was buiten zinnen, maar ondertussen haalde ze een grote zakdoek uit haar handtas en depte haar ogen.
'Ooh menere toch, ge zyt olyk noais t oed voe te léern né…'

'Jamoa, verleen weke, k a zukkn zéer am myn tann, wit je t nie mée da k ier roend liepe mé n and an myn koake? En k zoate doa an toafle binst dat n em in myne zeetle zat, en echt, k vergienge k ik van t zéer, en k zegge: Géet oaltemets nietn by joe zeekre? N Dafalgan of zoa? En nei, nateurluk ad n nietn by em, en k zegge: T is kart voa te zessn, ge zoe nie noa n apoteeker willn goan zeekre, ier n poar uuzn voddre, teegn da k ik doa zyn is t oal geslootn… Oeieoei, k a tonne twuk gezeid! Wuk? Is t oal zoa loate? In éne kée zyn glas uut en je moeste zéere weg, want je moeste éegluk oal in Ronse zyn! J ah voe nietn géen tyd mée, en in géne wiend wos t n weg…'

'Kée der noais nietn van gét, en kée oalsan gegeevn, an diene gierigoard, diene krebbebietre, goh, k meuge der nie an peizn, oal die joarn… En ik, domme lutte, k geeve ton nog myn skoan vestje mee! K ligge snachs wakker van d erup te peizn!' Haar zakdoek ging gedurig heen en weer, van oog tot oog.

'Orte kée Jacqueline' zei ik, 'g goa gy da géen twée kéern teegn komm!' ('Oalesies niet' mompelde ze.) 'En we goan wieder ier wel were zukkn vestje binnkriegn; miskien nie in t selste kleur, of t selste model, moa n skoantje da joe goa zittn lik gegootn! Ge wit, véel geld goat nie kostn, t éenigste da ier moet éen is tyd van wachtn.'
'Moa dat éek wi' zei ze, 'kée oal n tyd van de wéreld! En k goa nog méer komm nu!'

'En kée noa de gebeurs gewist en verteld wuk dat er gebeurd is, en zyder éen t wok were deure gezeid, en in uuze stroate moetn nie mée zyn, de niewéerd!
Moa vanneuchnd, uk upstoene stoend t skréemm my noader dan t lachn en k kunne zoa moeilijk weg voe t moment, myn béenn zyn gezwolln, en ka géen vervoer, moa k zeie, dat t is da t wilt! K moete noa de Kringloopwinkle! En kée n stik mét n otobuus kunn doen, en de réeste te voete, en kée der wel lange over gedoan, moa k zyn ier oalyk né! En binn n eurenoalf komt myn gebeursvrouwe my oaln, dus doa moe k ny mée inzittn!'

En door haar tranen heen lachte ze naar me en ze greep naar mijn armen en ze zei: 'Goh, ge goa t oalichte geloovn zeekre? Uk zegge da k ier géern komme?' En toen liet ze me los, nam de tas op die ze had neergezet en zei: 'Kyk, en kée nog n poar diengn méegebrocht voe of te geevn…'

ZWEMBROEK

We zoatn te kykn noa ne filme
D joenges sproengn in t zwembad
Moa vint toch, zei ze, t is lange geleen
da we da nog gedoan éen!

Joat wi, zeie k
Woa n da were kée doen ée, zei ze
Zoe j die zwembroek nog éen?
Nu, kop toch moa ne kée ne nieuwn...

N MURKE LIK IN DE PROVENCE

De kunst is te wachtn
Joe nie te loatn upjoagn

Ge miengt joene moartle n bitje te drooge
Doamée vul je de pittn uut
En ge smoet n der oalekére were an
wok oal voalt n der duusd kéern of
en ton doe j n twuk anders

Uj derover kunn vrievn zoender skreevn te moakn
mak je n saulse die sjuuste nie van je truwéele sléert
en ge smoet n loage - nie oal te dikke -
over héel d uppervlakte
Zoa gelykmoatig meugluk uutsméern
en moakn da d oekn goe gedekt zyn
en ton doe j n twuk anders

Uj der oast nie mée kunt in duwn
- nie te rap probeern é! Wacht moa n bitje -
gif je de latste loage - nie oal te dikke -
over héel d uppervlakte
Zoa gelykmoatig meugluk uutsméern
en uplettn da j nie teveel sloagn makt
Doarachter sny je n groa stik juute
en ton zy j gréed;
drienkt éen, doe miskien n kommisje,
moa ge moe geduld éen
ofwachtn en up joen tann bytn

En ten lange latste, ut n skier drooge is
beguj te vryvn - in roendekes en niet t ard
Joen juute antienn uutsloan
en uplettn voe kléene stéentjes
Géen skreevn trekkn!
Ja, t is n werkske da j nie oale doage doet
en ge zoed oal ne kée durvn twyfeln
moa ge meug ny toegeevn

Ort, t is nie moeiluk, iederéen kann t
De kunst is te wachtn
joe nie te loatn upjoagn wuk da ze wok zeggn
Te loate is nie goed moa te vroeg is nog slichtre
en tenn de reke eej zukn murtje
lik in de Provence

Woa da j vanup joen terrasse
toet da j nie mée ziet omda te doenker is
noa zit te kykn en woa da j noais
up tenn gekeekn zyt

PAPIERKIE

De stoave grakt were nie in gank zei ze Wachte, zeie k
K goan ne kée probeern mè n papierkie
Zie j da vierkie?
Eést droaie k da blokskie
Doa teegn nu da papierkie
en k legge der nog n blokskie by
En hupla, t is vertrokskie!

Jaja, zei ze, verzekers, ge ziet da van ier
Moa ze bléef kiekn noa t vier
da n bitje mè ne kée grodder wier

Da mè zyn oranje lyf kroenkelde
En mè oal zyn toengn lekte en lekte
En zyn toengn kwamm grodder en grodder
T wos n plezier voe te zien
oe da ze mekoar gevoenn an
Die twée giengn noais mée uut mekoar!
T begoste deugd te doen

Moahow zei ze, oe eej da nu gedoan?
Ewel, zeie k, geweune...
Mè n papierkie

DE LUCHT ZIT ROAR

De lucht zit roar
Doenkere wolkn zyn an t noazn

Oeieioei, kykt u kée doa
Zie j dadde?
Oe da t oal dundert
en vier spuugt in de verte?

Da t goa rinn zeg Frank
Da t woatr goa gietn
lik ne zondvloed zeg Frank

K weet nie ut woar is
moa de klokkn luuwn
de rattn kruupn weg
de veugels zyn vertrokkn
en de lucht zit roar

Moa noa woa ku j goan
ut de wéreld goa vergoan?

Nu, vandoage is eevn goed
lik gelyk wukne n andern dag
en t is géen avance van te kloagn

Zoen z uus vergeetn zyn ierboovn?

Eew ton oalemoale geleezn
en gebeedn toet de verkéerdn?
Is t nog avance da w uus bekéern?

Of is t moa n vloage?

WOLKN

Z an gezeid da t bewolkt giengk zyn
moa t wos ne blauwe lucht
T wos wel géen koed
moe k droeie de verwarminge oopn
en k stoake de radio an binst dat r
in de verte n wolke uut n fabrieke kwam

T wos wéreldwoaterdag zei n z in t nieuws
en dat de prys van t woater
in tien joar tyd verdubbeld wos
‘deur da z uus rioolwoater moestn zuuvern’
zei t r n gespésjaliseerde madam
K zoate achter ne lange camion
en k zoage in de droais
da t achterwieln apart kostn droain
De fabrieke kwam dichter
en k kéeke noa de wolkn

Z oederbroakn t nieuws
d r wos n oentploffinge gewist
Oal de ruutn woarn der an
en der kwam roak uut n gebouw
Je zei da w der sebiet
méer over giengn oorn
moa ze vréesdn t ergste
De fabrieke spoag wolkn
De mins van t nieuws
wos lik zyne droad kwyt

K rée achter ne camion
oender ne lucht vul mè wolkn
en k moeste peizn an joe
oe da j doa stoend in j ne pyjoar
en dat gienk deurn toet vanoavn
voa da k je were zag

WILDE LIEBILLN

Ne vrydagoavnd roend n elvn. De toafels woarn bezet, n toog zat vul en in t middn stoend r n bende volk. G oarde oal oale kantn véel toateringe, en nu en ton minsn lachn. Kléene lachskes, korte lachskes, lange lachskes en zels ne kée ne skruwle moa die éegluk wok ne lach wos. De keukne wos upgekuust. K a de frigoos angevuld, en k kwoame van Jackie McLean en Gene Ammons en k gienge lanst Lou Donaldson en Les McCann noa Jimmy McGriff en Grant Green. D joenges bachtn toog an oales oender controle, en k liepe juste deur de café ut r ne vint in z ne trainienk binn kwam. Roend ooletwée zyn oarms at n bandeke mè n lampe da flikkerde. K a die vint nog noais gezien moa an z ne blik zoage k da t n my zochte. K liepe noar em toe en je pakte myne noarme vaste en je zei: ‘Joengne, joengne, ze zyn ier buutn n twien an t doa sloan, ge goa moetn de poliesje belln, z goan n doa sloan, z goan n doa sloan!’ en je droei em omme, en je kéek verskrikt noa de deure.
‘Woa?’ vroege k. ‘Wel, ier voa de deure!’ Zyn luchtjes flikkerden zenuwachtig.

Jah myne oarme goe vaste en t ei géen deugd moa k trokke my nie weg, en we liepn toape noa buutn. Ze stoenn roend em, joenge gastn mè gloazige blikkn moa ze zoagn uus komm en t liepn der direct oal n déel weg. En ton zette de réste wok an, t skipte nog éen n gat in de lucht en ze woarn weg. T woarn lafoards, ze woarn mè n héle bende binst da wieder moa mè twéen woarn. K erkende de mins die upgekruld up de groend lag, oal is t dat n zyn andn roend zyn oofd ield. Twos Marnik.

‘Moa Marnik toch’ zeie k, n bitje lullig éegluk, en k zoage oe da de vint in zyne trainienk - toen dat n oarde da k de mins die up de groend lag kende - weg liep. Achternoa ak der spyt van da k em nietn getrekteerd a want t wos lik t verskot van z n leevn gewist. Moa je wos te rap weg.
‘Woa zyn ze, die laffoars, is t oal da ze kunn?’ riep Marnik die ommédekée in bewegienge kwam en k ielp em rechte stoan. K weete t, t wos doenker moa éegluk zag n der nog goed uut – zyn lippe wos wel geskeurd, en j a ne krabbel up zyn voaroofd en zyn linkerooge zat dikke – moa t a veel erger kunn zyn. K kéeke kée noar em, je stoend doa mè ne dwoaze grijns – zukkne vint! Myn voader at n moetn zien, j ienk zeggn: ‘J is dubbel gelet’. Je zei da van minsn die n kasse an voe bokseur te zyn. Marnik a zukkn kasse. Gelukkulluk wos t oo fong ne froaie kirle, moa je kost nie teegn drank. Allez, t is te zeggn, ut n em sméet en ut n over n grenze gienk, kost n nie mée stoppn en tenn de reke kost je d r ton géen weug mée mee wan je droenk ut oal deur mekoar.

‘Kom’ zeie k teegn Marnik, komm binn ne kaffie drienkn, en wost ne kée joen oanzichte’. Moa je lachte en je zei binst dat n mè ne vinger wées oal woa da ze weggeloopn woarn: ‘Moet ne kée goed ortn: ge meug noais, noais, NOAIS! benoald zyn van de wilde liebilln!’ En je bléef lachn, en ton zoage k dat n éegluk oal goe zochte wos. ‘Goan we ze were goan pakkn?’ ‘Wie?’ vroege k. ‘Wel! Oal die gastn in Billy Jean né!’ zei t ne. Da wos ne café een poar uuzn vodder woa da w legendarische tydn meegemakt éen mè Fredje, moa we goan doa nu nie over begunn, da s voe ne noaste kée. Ten de reke liet Fredje zyne café over, en van ton voars gieng t niveau zere noa beneen. Je gaf my ne djok, ‘goan we ze pakkn?’
‘Wuk is t r wel gebeurd da z achter joe zittn?’ vroege k. Je kéek noa my, je begoste were te lachn en zyn oogn vieln toe, en k moest em vast oenn want je wankelde up zyn beenn. ‘Ge moet ortn!’ zei t ne. ‘Ge meug noais, noais, NOAIS! benoald zyn van de wilde liebilln!’

K koste my oal perfect voarnstelln wuk dat r gebeurd wos. Je wos verzekers begunn zoagn, rekesteekn of dubbelzinnige upmerkingn moakn, en héel woarskynluk at n were zyn andn nie kunn tuus oedn - t wos ne gezoende joengne moa nie oaleman is doamee gediend. ‘Kom’ zeie k, ‘drinkt éest ne kaffie da je der n bitje deur komt’ moa j oenderbrak my ‘K goan ze goan pakkn, k goa ze goan pakkn, ge peist toch nie…’ en je waggelde mè groate stappn van my weg richting n Billy Jean en t deurde n ende moa k oarde ommédekee muziek, nuja, t wos méer kaboal, in de verte - n poar secoenn lange - en ton viel t were stille. K gienge noa binn. K zoage em nie géern goan, moa kende em oal n bitje: der wos niemand in stoat voer em teegn t oedn. Moa k woare der nie gerust in, ge meug gy nog zukne n béer zyn, u ze mè genoeg zyn moej gy ploain, en k moete zeggn da k die noavnd toch nog een héel ende mè da voarvool bezig gewist zyn.
Een poar doagn loatr kwam n were binn, en éegluk zag d r redeluk goed uut voe n twie die zoa teegn z ne kop gét a. En vele kost n der nie van voars vertelln, wan je wiste der nietn mée van.

Joarn loatr zat r ne geméenschappelukke moat by uus an toafle, en m an t over Marnik. Dat n intussn getrouwd wos, kindjes a en véle gekalmeerd wos. Je vertelde dat n ne kée mè Marnik en zyn vrouwe wos goan fietsn. En da Marnik up bepoald moment oal fietsn lik éen die deure sloeg roend em wos begunn sloan en in éne keer oenderd meter vodder wos. Zyn vrouwe lachte. ‘Verzekers een liebillle’ a ze gezeid. Een liebille! ‘Moe kée peizn’, zei ze, ‘en t is blykboar n twodde van ut n nog kléene wos: j is em van nietn en niemand benauld, buutn van wilde liebilln...’

TERRORIST MC

T wos Men At Work mè ‘Down Under’ up Joe FM uk binn kwoame. Vrée roar: da groen skerm an de meur wos oast geruststellnd. Der zat nie veel volk en der wos géen puree mée voe by de sjikongs mè espe. Moa ze vieln lik de duuvn en za n nog krokettn. Oales pakte ne droai toen da Tom (k a oendertussn oal hoard dat de kletsekop achter n toog Tom noemde) de radio wisselde voe n tilleviesje. Ommédekee zoatn we te kykn noa t nieuws up VTM.
Kwoame rechte van myn werk en k at nog nie hoard, moa t voelde lik geschiednisse, t éne da k zoage. Z an em gepakt, de grotstn terrorist van Europa, t moenster van Molenbeek!

Ik weune in Meulebeke - ‘t is were nie roar’ zei Clara - n stokoed wuuveke da dikkns noa de wienkle komt - u ze t oarde van die ansloagn, ‘da j gy wok gunter weunt!’ Ze peisde da Meulebeke West-Vlams wos voe Molenbeek.

K kéke nu en ton ne kée noa da skerm binst da k kléene slokskes van myne Le Fort pakte - mannekes, da is toch echt ne vultreffre! T is nie moeiluk voe n goe bierke te moakn mè n alcoholgehalte van tien groadn en d r boovn (en ton nog!). Mè suukre mak je ne stroent goed, zei me meter oalsan. Moa da is ier acht groadn n oolf! N bitje bittre, n bitje zoete, lichtjes verbrand en gekarramelliseerd, en k smoake zels peern...T meugn d r véel achterkomm, ut over n bruun bierke goat... En nink, k zyn nie gesponserd!

K zoate roend te kykn en k peisde: oe da zukn twuk léluks zoa gezellig kan zyn... Groate keramiekne tegels in doenkergrysd voe vloer, n zworte rustieke lambriséeringe, en doa boovn oales in oed roas geskilderd en ton zwoare boalkn an t plafond, in t ... beige. Van da typisch cafémeubilair, doenkerbruun en oenverslytboar.
En toch... Der angt ier lik n twodde in de lucht. Nu, mè diene tilleviesje wos der n déel charme weg, moa t wos nateurluk n uutzoenderluk moment. En dankzij Tom woarn we were hélegans mee. K kéke nog ne kée roend, en k zoage ommédekée dat r by iederne toafle n prieze zat, en n ansluutienge voe n tillefon.

De klapdeure vloag oopn en je wos doa, mè de sjikongs en de krokettn, ja ne n anddoek up zyn skoere en je zette oales voa myn neuze: ‘Uj n mes moe éen voe j krokettn te skelln, moe moa roepn é!’ en je wos biekan were weg, moa k zeie: ‘Zeg Tom, zyn da tillefonansluutiengn by oal de toafels?’
Je zette ne stap achteruut en je droei em, en t wos lik dat n toesproake gienk oedn. ‘Wel, blykboar wos dat ier twientig joar geleen wok oal n restaurant, en ton stoend er ier up iederne toafle, en dat is biechte woareid, up ie-der-ne toafle ne tillefon, zoadoanig dat de minsn kostn belln noa de keukne us ze n twuk moestn éen. Kuj t joe voarnstelln?’ je pakte n anddoek van ze skoere, leit n der were up, zei ‘smoakeluk’ en ton wos t n weg, deur de klapdeure.

T wos de beste koassaulce da k ier oal géetn a. T bruun kostje wos wel n bitje oal de bléke kant, moa de sjiekons woarn wok moa n héel kléen bitje angebrand. K kéke nu en ton ne kée noa t skerm, moa deur de toateringe in t café koste k der nie vele van verstoan, buutn da z em in zyn béen geskootn an en dat n gepakt wos. Achter 126 doagn, sedert Parys. Zyne foto over héel t skerm. Zyne noame in t groate der boovn. Moestn we nu bly zyn, of moestn we scréem? T wos lik of dat r n skoaduwe over n dag gevoaln wos.

126 doagn da we die noame geleezn éen. Da we die foto gezien éen. Up oal de postn up n tilleviesje, in oal de boekskes en de gazetten. En duust kéern hoard in de radio binst t nieuws. Oe mak je n vedette van n twien? Oe mak je van n joenge gast die t noordn, t zuudn, t oostn en t westn kwyt is, n rolmodel? Ja moetn n nummer uutbriengn als Terrorist MC, ja ne hit.
K snée nog n skelle van myne sjikong, en k droaide m ne kée goed deur de koassaulce.

K gienge nog efkes an toog zittn, k vroege nog ne kaffie en k rekende of. En bistien kéeke k noa de beeldn van z n arrestoasje, en oe da z em wegbrochtn up ne brancard.
‘Radde kée wuk dat r morrn were up de voarkant van oal de gazettn goa stoan’ zei Tom binst dat n t wisselgeld were gaf.

NAT

T is lik of da j in j ne broek gepist ee. Nat toet an je gat. Een veske floske woater oopn doen binst da j ryd... Kej dadde, van die flossn mineroalwoater? Doa bespoarn ze nie up. Dat is vul toet an t dopke. De minstn druk binst da j dat oopn doet en hup, héel joene spriet is gezet. Die kommisje da j nog moeste doen goan moetn wachtn. Moa ge moe wel tankn, gee t oal uutgesteld. En spytig genoeg ry joen cammienitte nie up woatr.

 

T éeste naftestation da j teegn komt is een kléene, oederwetske affaire lanst n groate boane, ge zyt ier nog noais gewist. Twée poempn; ge ryd deure toet an de fotste, binst da j kykt of dat er wok ne derme mè diesel by angt. Ge stapt uut. Joen deure lat je oopn stoan. Gee gedoan mè werkn, en oales mag n bitje troager nu. En passant kyk je ne kée noa binn. T is lik n wienkeltje, en t ziet r nog oopn uut. Van ieruut gezien is t of dat héel vul stoat, en der zittn colas en Red Buls in de frigo. Ge ziet oe dat r ne vint lanst lopt, ne vint die noa buutn komt. Oa néén peis je. Een poempe mè bedieninge…

 

‘Goe noavnd!’ roep ne en je komt neevnst joe stoan. Ne n oedere, oengeschoorn mins, en zyn kléern zyn lik veel te wyd oal is t dat n verre van moager stoat. ‘Mè de koarte?’ Ge knikt. Binst dat n binn kykt in de cabine lop je n bitje van twinsn noa de betoaloatomoat. Verdomme, ga j n deure beeter toegesmeetn… Zoet n t zien dat r n natte plekke in de zetel is? ‘Diesel?’ vroagt ne. ‘Ja’ zeg je - ge kunt oalyk nie voars zwiegn. ‘Wel, ge meug ter ton oalesies géen nafte in doen!’ zegt ne, en je lacht. Ge goa moa nie zeggn da nafte oal tjunders oales is woa da ne noto up ryd. Nafte is doa synoniem voe brandstoffe. Moa gee doarover oal ne kée n discussje gét, dus goaj zwygn.

 

Ne klapt t klepke oopn, pakt de sleutels uut je n andn en droait n dop d erof. Ton stik n tuut van derme in t gat, en je vergrendelt de kroane zodoanig dat t spel van ton voars uut zyn eign marcheert. ‘Oevele moet t r in?’ vroagt ne. ‘Doet n moa vul’ zeg je binst da j der heelsan up let da j n bitje van twinsn stoat. ‘Héel noaste weke goe were’ zeg ne.

 

Ge kykt noa de bordn en ge ziet dat n diesel were gediesd is, oftewel zyn z ier diere. Omédekée voel je dat n noa joe stoat te kykn. Zoet n t gezien éen da héel je kruus gezet is? Je droait em were noa de cammienitte. Ge hoart de nafte, nuja, de diesel loopn. We stoan n nendeke neevnst mekoar, t is stille. 'N poempe mè bedienienge’ zegt n ommédekée, ‘woa vienn je da nog!’ ‘Ja’ zeg je, ‘k a da wok nie verwacht’… ‘Haja’ lacht ne, ‘niemand wei, u ze ier voen n éeste kée komm!’

 

Ge zy nie an ne poempe mè bedienienge, en oalesies vandoage nie. Ge wit gy wel da die minsn da goe méenn, moa géet wok ook n bitje t gevoel da ze joene noto overpakkn. N soarte inbreuke up joen privacy. Want da boeltje doa van binn, da s wie da j gy zyt. En wuk is ter géestiger dan je leevn ne kée t oenderbreekn omda j moe tankn? Oales stille leggn deur overmacht, de wéreld up pauze zettn. Efkes in retraite goan… Ge beseffe t moa uj d erover peist. En ton komt r doa twien em mee bemoein…

 

‘Moa gy zyt toch nen autist’ zeg ze uj t eur vertelt.

 

‘Zy j ne sneukeloare?’ Ge zwygt van t verskot. ‘Ja, kweete t, t zyn oal sneukeloars, moa wuk eej liefst, spekkn of sjieklittn?’ ‘Sjieklittn’ zeg je, ge wit wok nie voe wuk, ge zy nie echt an zoetigheid. Je lopt noa binn en je kéert sebiet were, stikt zyn and oendersteboovn uut, g oed joen and deroender en oopn, en ton lat n twée zakskes voaln woarin dat r oalekére twée sjieklittn zittn. Lange geleen daj da nog gezien é! Ge wos verzekers nog kléene!

 

De poempe sloat of. ‘Ee voila sig’ zegt ne binst dat n tuut der uut trekt, en an zyne oeder angt. ‘Ge kunn were weg’, en je lopt oal were noa z ne wienkle. ‘Allez, mersie ée’ roep je nog, binst da j upgelucht were in joen cammienitte up joene natte zetel goa goan zittn. Je stikt zyn n and up moa je kykt nie bachn em, en je lopt zyn wienkeltje binn. Ge ziet n lanst zyne frigo vul mè cola en Red Bull passeern. Ton stik je joen cammienitte in gank, de radio begunt te speeln, t zyn sjuuste The Smiths mè ‘Panic In The Streets Of London’. 

 

En ge duwt de kilometriek up nul.

PAK MY MEE

T is nu oal méer dan drie joar da k in Kringloopland werke
K zoate in de winkel van Bevern-Leie, van Aovelgem en van Kortryk
Kee der minsn van over héel de wéreld léern kenn
Die der kwoamn werkn, die der kochtn of under tuug binn brochtn

Kee van oales zien passeern, frigoos, teevees, n typmachine van Olivetti
Marbels, pekkels, of voe in n akwaarjum: ne skoane kei
Kristalln wyngloazn, sigarredoozn, n vinkekoaie, ne canapee
n spel koartn, Jommekes, vier up n rij, n puppe voer up te bloazn

Pak my mee, lat my in joen leevn
Pak my mee, we goan tegoare skoane diengn beleevn
Pak my mee, pak my mee

Zy j veruusd, of wil je joe goekoop, moa mè smoake installeern?
Pakt joene tyd, en wit da j héel de wéreld elpt deur te recycleern
Ge vient der zeldn wuk da j zoekt moa g éet oalsan twodde mee
Ne cd van Freddy Breck of Bob Dylan up lp én gesigneerd!

Nietn is ier roar, ge vient der oales uutn minskeleevn
Nen boek van Hugo Claus mè in t middn ne vergeeln liefdesbrief
Sepia postzegelfotoos van ne trouw lange geleen
Kaffiekann of pottn en pann, of, achter n kassa... n nieuw lief!

Pak my mee, oal is t moa voe weg te geevn
Pak my mee, t kost nie vele en g mak n twie bly
Pak my mee, pak my mee

Doe j de groate kuus en eej n kasse of een poar stoeln
Belt en w goan komm: ier elp je nie éen, moa vele goe doeln
Zit j up de zoldre en zie j t nie mée zittn - bring moa binn!
Moa let up, soms eej ier méer gekocht dan da j ee binngebrocht!

N oede noaidooze mè t noaigerief der nog in
Ne poanne broek, n kléedje of n poar skoenn, nog noais gedreegn
Moe da nie nieuwe koopn, k peis da w ier nog ne kakstoel éen
Ow, wachte madam, een moment, w oan em éest leegn

Pak my mee, lat my in joen leevn
Pak my mee, we goan tegoare skoane diengn beleevn
Pak my mee, pak my mee

T is nu oal méer dan drie joar da k in Kringloopland werke
K zoate in de winkel van Bevern-Leie, van Aovelgem en van Kortryk
Veel over de wéreld geléerd, en de minsn beter léern kenn
Minsn die kwoamn werkn, die ier kochtn of under tuug binn brochtn

En we kloagn wel ne kée moa éegluk is t tof, ge vient ier oales dus kom moar of
T is héel de weke oopn moa springt i j ne noto of komt te loope
Noa de Kringloopwinkel, of skoenste is weg, oast joe, oast joe!
Want miskien da tene da j oal zoalange zoekt ier nu stoa te blienkn

Pak my mee, oal is t moa voe weg te geevn
Pak my mee, t kost nie vele en g mak n twie bly
Pak my mee, pak my mee,
Pak my mee, pak my mee