Ze woarn goddeluk,
d oanzichtn van de minsn die binn kwoamn,
moa k moete ny klappn,
k geloofde zelve myn oogn ny
toen da k de deure oopn stoake
Sirre a zyn grysde skorte an, pottezwort
zyne bril vul skreevn en geplakt
en lik oalsan diene n oede zwortn n oed up zyne kop
Je rée mé ne bakwoagn vul stéenbrokkn
deur de café, slalomde tussn de barstoeln,
pakte z nen droai roend n biljart
en je kéerde em uut in de garoage;
t wos lik of da t de groate grysde wolke die upstéeg
em achtervolgde binst dat n weg réed
Je wos bezig mé ne meur in te smytn
K moeste droain dien n oavnd
en k a de muuziek nog luwer gezet dan anders
moa zels mé de Pixies of Sonic Youth
kost je de sloagn van de moakre
oenmeugluks overstemn
Uj d r ny mée teegn koste,
en ge liep noa buutn voe t stof uut je loengn t hoestn,
zag je in t schiensel van de stroatluchtn
oe da de stofwolke zelve
wok probeerde weg te groakn
en olle kére ut de deure oopn gieng
kwam r n déel mee die em lik n viruus
mé de zuuvere buutnlucht miengelde
T wos zoaterdagoavnd
en olleman kwam binn, elk up zyn maniere;
de punkers mé under oanekamn
woa da j joe zéer an koste doen,
lange keetns en zworte leern vestn mé pinn;
de wieties mé under dreads
mé van die gebreide mutsn
in reggeakleurn over getrokkn
en die héekn ‘ozoa’ zeggn, en ‘witjewel’;
de rockers in jeansvestn met under kroage rechte,
die stoan te sjiekn en te sjeikn an toog,
de straigt-edgers mé van die boais
toet an under knien en veels te lange mouwn
En oal die ander soartn die doa zoatn
moa woa da k nu ny up kunne komn
En ga t on wok nog oal de tjoaloars
die ollene an n toog iengn,
of in éen van die toet up n droad
versleetn zetels zoatn of loagn
Moa binst da t n oavnd passeerde
begostn z oal up mekoar te trekkn
Voe te begunn grochtn z n bitje mé ne kée zochte:
wos t van nu en ton noa buutn te goan
of binn ne pit te smoarn in n duuk
(uplettn da Sirre da ny zag wei!),
wos t van te zuupn,
of lik de gastn mé under uutgerokkn boais
van woater te drienkn -
ort, k weete nog oalsan ny
wuk da da wos die doa in de lucht ienk
of toet, van die n oavnd weete k t wel:
n dikke loage stof van koolk en stéens
Moa t wos lik of da nymand em da antrok,
en t wos ne n oavnd lik ne n andern in de Combi
Koppeltjes zoatn te vrijn an t toog,
de para s woarn an t biljarn,
en d r nog ny uut of da ze nu boel giengn moakn of ny,
de straigt edgers zoatn in kléermoakerszit up t podium,
de rockers zoagdn achter ‘mr cab driver’
uut die nieuwe ploate van ne zeekre Lenny Kravitz,
en teegn dat t spel endigde
en we noa buutn moestn omda t ier gienk sluutn
woarn w oalemoal eevn grysde
En Sirre dei voars,
héel da weekend, en de doagn d erachtre;
je wos nu bezig mé t plak van de meurn te kappn,
en ne weke loatre wos t lik ne nandre café
woa da j binn kwoam, en moete k t nog zeggn?
T wos verdomme de skoenste café da w kendn,
we woarn d r n bitje stille van
en uus adoroatje voa Sirre
wére n stik groddre
