BESSNJENEEVRE

Twos de verjoardag
van n doad van Ian Curtis
en in t Joc in Iepre
giengn ze héel noavnd
muziek van Joy Division droain
We verzoamelden in de Combi
binst da w twyfelden u we wel giengn goan,
en we bleevn nog n ende angn
moa tenn de reke -
uus tandvlées begost oal tope te trekkn -
vertrokkn we mé twée oto s
En treurn da we dein!
Oal is t da w de muziek -
en surtoet wie dat r achter zat -
moa lange achter dat n em uphangn at,
an léern kenn
T wos n bitje lik mé John Lennon

N dag dat n doad wos
ak wok voe n éeste kée van em hoord;
buutn wos t doenker
moa oales lichte up van de sneeuw
en k zoate in de zetel te kiekn noa t niews -
en ze woarschuwdn ny voe gevoelige kiekers -
en ton zat n doa, an ne witte piano
in z n geweune kléers mé da brilleke,
t wos verschrikkeluk slicht beeld
en je zoeng ‘Imagine’;
k woare dertiene
en t wos lik ne klets teegn me koake,
en za n em doageskootn
en k ka ny éens geweetn dat n leefde!

K voagde de troann uut myn oogn,
ozoa da nymand t koste zien
en ka d r subiet spyt van,
want eegluk wilde k dat ze t ollemoale zoagn,
de grotste rampe uut myn leevn
wos vandoage gebeurd
en nymand die da an my koste zien!

Soit, we zoatn doa ne héel n oavnd dinne te doen
en te lange latstn giengn ze sluutn,
moa uut compasje wildn ze nog éen drankske geevn,
en we kochtn elk n floske wyn
en we kwamm d r lik héel deure:
k weete nog da k twoasn speelde up ne piano
ollist da k géen piano kunne speeln
en k weete nog da k n twoasn danste up ne n toafel -

en kwamme wakkre
en k zoate in n doenkern in myne koamre
up de groend, mé miene rugge teegn de kléerkasse
en neevnst my stoend Wim
mé wie da k n uus déelde,
t wos warme an myn andn,
en d r viel kloarte binn vanuut de gank,
‘goat ut’ vroeg Wim
en k kéeke noa myn andn die plakten
en oales wos road en k zeie ‘bloed…’
‘Moa ba nint’ zei Wim
moa je kloenk ny overtuugd
en je vroeg: ‘eej bessnjeneevre gedroenkn?’,
en k peisde en k peisde moa k woare t zeekre!
Doabie, k kriege de skiete van bessnjeneevre
en ‘nink’, zeie k, ‘nink!’

en ton loage k in myn bedde
en myn nooft wos vanbinn ontploft
en a t géen zukkn zéer gedoan
ka d r teegn gesleegn!
En k kéeke roend mie,
noa myn kussn,
oender de loakns,
noa de groend by me kléerkasse,
tussn myn viengers
Moa nieverst n twuk roars te zien…
Miskien
ak t gedromd -
moa vanboovn dei t te veel zéer
voe nu vele te peizn
en k stoene up,
en k kroape in bad
en k loage n ende te weekn
en k voelde my nog slichter,
k kroope d eruut en droogde my of
en k trokke me kléerkasse oopn

N zeure geure kwam noa buutn
en t is ny omdat road wos
dat t bloed wos
up myn imdn
up myn broeks
up myn oendergoed
moa k woare oendertussn wok oal zeekre
dat t géen bessnjeneevre wos