KORTE BEENTJES

Moedre: 'Zeg joengne, kom ne kée mee, noa die kastjes. Zie j die potjes? Van éentje zoenn z of meugn!'
Ik: 'Euh… Oe wil je zeggn madam?'
Dochtre: 'Ewel, dat die potjes der of meugn! Eej géne toernavies?'
Ik: 'En woarom moetn die potjes derof?'
Dochtre: 'Omda myn ma n tilleviesie kastje noadig ee, en uj die potjes van da éne nachtkastje ofdoet, kuj t up dat ander zettn en ton lopt da skoane deure lik of dat t éen kasse is, verstoajt?'
Moedre: 'Joat joengne, da goa ton likn kasse uut één stik zyn, en ideoal van oogte voe myne tilleviesje up te zettn! Moe ne kée kykn oe skoane dat t is! Ne kée siereern en t goa lik nieuwe zyn!'
Ik: 'Kweete nie of da k die potjes doa zoender te skendn of goan krygn wi!'
Dochtre: 'Moa dat n besan nie, t is moa ooloendern! Ge kut da toch nie zien!'
Ik: 'Wachte, k goa ne kée n bitje aloam goan oaln!'
Moedre: 'Ge zy froai!'

Ik: 'K goa ne kée proamn mé diene béetle!'
Dochtre: 'Ja en ge moe nie skuw zyn!'
Moedre: 'Ja joengne, pak moa j ne noamre, moet der nie mee inzittn, sloat ter moar up, t is ooloendern, t goat niemand zien!'
Ik: 'Oeie!'
Dochtre: 'T besan nie, t besan nie, sloa moa!'
Ik: 'Kyk, z een teran geskootn mè noagels, moa t zit nog lym tussn wok! T is wel n serieuze brokke uut!'
Moedre: 'Allez, doe moa voart, da s ool éen die of is!'
Dochtre: 'Ja sloa moa! Moe nie skuuw zijn! Ziej t, da s zyn der ool twée! T goa van lanst of beetre! Wuk n skoan kastje, en t goa goe passn by j nen dressoir! Da j da d ier nu vient! Uj gy géen sjanse ee!'

Moedre: 'Wè ja, en t skoenste van ool, t is néeste kée da komme! En t is géen geld née, véertien euro! Geweune nog ne kée siereern… Voila sig, kyk ne kée doa, de poatn zyn der ool of! Ge kunt t byna nie mée zien da ze deran hangn een! Alléz, ge meug da nu ne kée up mekoar zettn! En t kastje met de potjes ooloendre… Ja...'
Dochtre: 'Eeke t nie gezeid! Tis perfect!'
Moedre: 'Moa moe ne kée kykn, moa moe ne kée kykn!'
Ik: 'K moete toegeevn dat t goe gelukt is! Goaj t vanéeste kée meepakkn, of kom je der loatr achter?'
Dochtre: 'En ge zy gy nie wel zeekre?! Tefete is t weg! M oan t vaneigns nu meepakkn!'
Ik: 'K goa uus duveltje goan oaln, ke kunne t ton noa van voarn briengn!'
Moedre: 'T is wel joengne! Ge zy froai!'

Ik: 'Lat moa stoan wi, k ben ier mè mne duuvle!'
Dochtre: 'Haja, we peisdn, we goan ool n bitje noazn!'
Moedre: 'T is toopn da da in joene noto goa kunn!'
Dochtre: 'Ja da zoe nog ne skoann zyn!'
Ik: 'Twée zukke kléene nachtkastjes, da goa wel goan!'
Dochtre: 'Moaja, tis da myne vint nie mee is voe de zetels plat te leggn, ja, je kent èm die noto beetre!'
Ik: 'Moet der nie mee inzittn, k goa kik wel ne kée kykn!'
Moedre: 'Goa moa deure, k goa binstien betoaln!'

Dochtre: 'Ze zittn der ool in wi! T wos der voarn gemakt!'
Moedre: 'Moa gow zeg, wukn chance! En tis néeste kée da k komme noar ier! En kée wel zukkn kastje gevoenn zeekre! Ge zeij t gy nog, miskien een z ier éentje!'
Dochtre: 'En t stoend up uus te wachtn!'
Ik: 'Nu, ge zy gyder gesapeerd sig! En vroag moa da voadre elpt wi, uj tuus uutlad!'
Dochtre: 'Ja oolesies, zeg! Je mag wok n twuk doen!'
Moedre: 'Joengne, ge zy gy nog n bitje bedankt wi! En k goa zeekre nog were komm, ge goa my ier nog zien!'
Ik: 'Alliz, k oare da géern!'
Moedre: 'Tuus nog ne kée goe siereern en kunne der vanoavnd myne tilleviesje upzettn, wie a der da gepeisd!'
Ik: 'Salluu ee!'
Dochtre: 'Ja joene zeetle stoa nu wel hélegans vooruut, goa j der nog tussn kunn?'
Moedre: 'Kée k ik moa korte béentjes wi!'
Dochtre: 'Alléz, trek moa je deure toe!'