NEESTE KEE

Oal sedert n éeste kée da k mé myne koozne
lans de Combi liepe, woare k betoverd
Boovn de deure zat r n vinsterke, da noa binn oopngeklapt stoend
Loatr bléek da da de rookofzuuginstalloasje wos

Bob Marleys ‘Natural Mystic’ woei
in n rookerige wolke noa my deur da gat
K gienge nog ny véel uut, en ka nog noais muziek
van Bob Marley in ne café hoard,
k loate voarn up ne zoaterdagoavnd
T makte da k oales da myne koozn gezeid a
over diene café up slag vergeetn woare

We passeerdn ier geregeld u w uutgiengn,
u we gedoan an mé bieljartn in de Londres en
w oenderboane woarn noa n Divas (woa da t n boas ne kée
n t shirt van n joenk meiske, zyn lief peise k, omoage dei;
ze droei mé eur oogn binst dat r twée andoenluk witte tetjes
voan dag sproengn, d éeste da k van dichte zoage)
moa voe zyne kop ny da t n ier noa binn gienk goan
T wos n vuul kot woa da ze vochtn,
en woa da t wemelde van de hippies en de wieties
Loatr zoe blykn da t n oenderd procent gelyk a,
je wos zels nog t een en t ander vergeetn

Ge moe weetn van woa da k komme:
Zarrn, tussn Stoan en Werkn
K zyn doa noa skoale gewist, en doa weundn myn moatn
In Zarrn aj n poar dagluchtcafées en de Riva
In Zarrn wos t r ny véle te doen

Up zoaterdagoavnd zoate k by ne boerezeune -
myne beste moat die twée joar oeder wos -
van t hof ténn n slag tegenover tuuznd
in zyne slapkoamer te luustern noa de ploatn van z n broere
The Sound, J.J. Cale, Neil Young...
binst da w stréekbiern proefdn
Poasbier... Oerbier... N dulle teeve...
Biekan héel de wéreld gienk oopn in diene koamre

Kort achter myn geboarte zyn myn oeders veruusd;
in n vloage van romantiek éen z in Zarrn n uus gekocht
Van d éne geméente noa d andre
Myn moeder éet r éegluk noais géern geweund
ze kende d r nymand en ze koste ny weg
U me voadre zessndertig wos éet zyne néestn noto gekocht
Je dromde van ne witn Mercedes, moa je kocht ne witte Ford Escort
Doarachtre giengn w oale zundagachternoene noa de mémés
en de pépés lans moeder en lans voaders kant
Ze weunden neevnst mekoar

Lik voe r oaleman wos t wok voe myn n oeders
ne héle zoektocht, en achter véel joarn zyn z uut mekoar gegoan
Wieder veruusdn mé moeder mée noa Roesloare
weg van da boeregat

Moa zels toen da w in Roesloare weundn
wos t nog oalsan ne verre stad,
oaléne n bitje klinder nu, en k miste myne moat
K werkte in ne spinnery, en voe de réste zoate k in myne koamre
noa muuziek te luustern, of te leezn in ne boek
Héel myn weekends zoate k ik doa
Soms koste k n twuk oorn in de verte, n twuk die ny
by de muziek paste en toen dak t geluud n bitje stilder zette,
bléek ut myn moeder te zyn die noa boovn riep:
Of da k wére héeln n oavnd t uus gienge zittn

Ier woare k vrimde en k wiste nog ny woa noartoe
en ténn de reeke begoste k mee te goan
mé myne koozne die eevn oed wos lik ik
en ier oal héel z n leevn weunde
We kwoam goed oovréen oal woarn we styf verskillnd
Je kwam my oaln mé de velo en uuzne néeste post
wos de Vagant woa da w Pale-Ale s droenkn,
n bier dat zels ton oal lange uut de mode wos
Ze droaidn doar oalsan kutmuziek, méest uutn top dertig
woa da k oal héel de weke moestn noa ortn up t werk
Vandoa giengn we noa n Bistro:
ABC, Duran Duran, Spandau Ballet, Ultravox, OMD enzovoars,
oal dien n ofgezoagde dei da j nu héle doagn up Joe Fm oart,
of MNM, of Nostalgie; ge zoed oalichte vergeetn
da ze vandoage nog nieuwe muziek moakn
Middn in nacht passeerde ‘Jukebox Baby' van Alain Vega,
k goa die vint doavoarn héel myn leevn dankboar bluuvn,
en up ne kée viele k byna van myne stoel toen da ze
'Girlfriend In A Coma' droein van The Smiths,
k peizn nog ookn dat n misse wos
Loatr die n oavnd zoe k, achter n poar whiskey's
up oal da bier, neevnst de wc pot in kooma voaln

Moa da wos uutzoenderluk,
kée voa kée oalden w uuze velos up en réedn sliengernd
noa t begun van t Géetepark woa da w d er oal ryn of sproengn
en z in de gravee lietn voaln binst da we de doenkerte in waggelden
U kée da w uut skiensel van de stroatluchtn woarn
liepn w elk oal ne kant van da weegeltje tussn de struukn
en stoakn ne vienger in uus kele toet da t r oal uut lag,
pisten doarachter nog ne kée uut oale geweld teegn ne boam
en réen ton noa ruus voe r uuzne koater uut te sloapn

Moa nu wos myne koozne ziek -
t moest oal erg zyn dat n doavoarn tuus bléef -
en k a géen goeste voe oalene in die upgefokte
soaie cafees te goan zittn mé nymand voe teegn te zéevern
en woa da k ozoa oal ny up myn gemak woare
Moa oalist da myn moeder da weeroal géestig
begoste te vienn da k n kée n weekend tuus bléeve
kittelde myn gat de zundagoavnd zodoanig
da k olyk nog n stapke gienge zettn
Ka ommédekée n idee gekreegn
woa da k nog noartoe koste

K stoake de deure oopn
In n Bistro of in de Vagant droaidn ton oal de koppn
voe te zien wuk da t r nu wére up de wéegskoale lag
moar ier wos t r nowluks bewégienge,
t wos moa Obelix die z ne kop up efte
en up slag wére nere lei
Ge koste ier binn komm, noa n toog loopn, en were
noa buutn goan, géne mins die joe gezien a
Véel volk zat r ny, moa ja, woa wel? t wos zundagoavnd
N toog wos ne groate rechtoek die teegn ne meur stoend
en woa da j an de drie kantn die over woarn koste zittn
D r achter aj ne gank mé ne trap noa boovn
mé beneen n deure die noa binn oopn stoend gedroaid
De meur die oal de kant van t roam zat
wos beklid mé rekkn woarup dat t r gloazn stoenn
en teegn n andern meur stoend n discobar

Achter n toog liep t r ne vint mé twée groate ringn
in ze rechteroare en tatoewoazjn up z n oarms,
in dien n tyd wos da nog n zeldzoamheid
J a lank oar in ne stéert en ne ferme board
Zoender da k n twuk gezeid a,
zette ne ne Palm voa me neuze;
‘Verkéerd geskoenkn’ zei t ne, ‘of meug je géen Palm?’

K a da nog noais gedroenkn moa mét t skuum
up me lippe knikte k oastig van ja
Roendom roend zoatn d r minsn moa t minst oal de kant
woa dat n dj muziek stoend te droain,
en die héekn an t babbeln wos mé n twien en
over en t were liep mé n ploate voe uutleg te geevn
D r stoenn twée pick-ups, van die Technics
woa da dj s ton oal by zwéerdn, en up twée skroagn lag t r
n binnedeure en doarup de bakkn mé ploatn
K erkende ‘Deja Vu’ van Crosby, Stills, Nash & Young
‘Paris 1919’ van John Cale, ‘New Boots And Panties’ van Ian Dury
‘Rock n Roll Animal’ van Lou Reed, en ‘LA Woman’ van de Doors
Myn erte klopte toet in myn kele van t verskot;
ne café woa da z echte muziek droein!
Den dj gienk zoa up in z n lesse geevn dat n ny koste wachtn
toet dat n nummer tenn wos en verlei geweune de n oarme
up de ploate voe noa n ander fragment te luustern
Nu en ton danste de noalde doa by over de groevn
en kwam ter n lank skerp geluud uut de boxn
juste lik of da n twie oalekére héeln n oavnd in twéen skeurde
en woavan da j helegans in innevlées kwam

Ommédekée a de barman d r genoeg van,
en oal vloekn en tiern liep n noa dj, gaf m mé de buutekant
van z n and ne lap teegn z n oarn, en je riep:
‘Ge meug joene boel ier toope skartn en gée verdomme
twée minuutn voe te moakn da j weg zyt!’
Wit lik n lyk stak de joengne oal zyn tuug in zyn tasse
en liep noa de deure, zyne moat boegeerde ny
en bléef wok achter dat n weg wos, up zyn gemak an n toog zittn
De barman wos nog ookn an t vloekn, nu méer in zyn eign
lik ne dunder die gepasseerd is,
moa die nog n bitje rommelt in de verte,
‘en ge moet ier godverdomme oales zelve doen!’
K bestelde nog ne Palm

Toen da de barman voa my stoend
koste k ommédekée myne moend ny oenn,
‘Ut goed is, wille k ik wel n bitje muziek droain...’
moa méer koste k ny zeggn wan je béet byna myn neuze of,
‘Pas up é veugle, ge meug ne kée probeern
moa uj begunt te moasn kryg je ne skip
oender je gat, rechte noa de deure!’
K liepe noa de muziekinstalloasje en k leije mé knikknde knien
t éeste ploatje up da k in de Combi zoe droain,
'Kimberly' van Patti Smith

Nu en ton kwam ne n Palmke by my zettn
K zoage em gereegeld oversyts kykn mé spléetoogskes -
nantoek up zyn skoere - binst dat n an zyne board trok
en ten lange latste kwam n zeggn da k mochte stoppn
dat n gienk sluutn
‘En vriedag, eej vriedag tyd voe te droain?
Achter skoale lop dat ier oalsan vul
en kée nog ginne dj gevoenn...’

K moeste d r géen secoende over peizn, en zot content
réek noar uus, oal an t regleern wuk da k
die n oavnd oalemoale gienge droain
K a myn plekske gevoenn

Kée noais mée mé myne koozne uut gewist