NOEK

K a nog ne langn n oavnd in verskiet moa k moest éest n twuk eetn, en achter da k kommisjn gedoan a in n Ookay stoake k de boane over noa n eetabliesement da ‘Noek’ noemde. Vrée goe gevoenn die noame, en oalesies voe n spel t middn de reke!
K woare moe en versleetn en myn coroazje wos up moa de deure gieng oopn, k oarde ‘The River’ van Bruce Springsteen, en t wos lik of dat r n twien myn oorn én myn erte masseerde.

T dei verskrikkeluk veel deugd, en k zeie teegn n boas die doa zjuuste stoend binst da k myn veste of dei: ‘T is ier goe muziek wei!’ Je kéek ne kée overzyts, je droei em en je liep weg. Ja, da wos miskien n bitje overdreevn van my, nog moa sjuuste binn in n plekke woa da j nog noais gewist zyt, moa ge zy téer é uj moe zyt, en k zette my an n toafeltje. T wos wok n goe muziekinstalloatje; t stoend redeluk luwe en toch stoorde t ny en koste k de minsn nog toet ier oarn klappn mè mekoar. K kéke noa de koarte en k a were sjanse! Dus k bestelde k de suggestie: wiltloafrollekes in espe.
‘Mè frietn of puree’ vroeg t ne. ‘Mè puree’ zeie k, en k wiste up slag da die vroage géen goe voortéekn wos. En ton oorde k da t de radio wos die speelde.

Moa t bléef goe muziek: ZZ Top, Roxy Music, Billy Joel... Oenn dei moa oalemoale oenverslytboare skyvn. An de meur wos t er n groa skerm da gesgroene kleurde, moa t wos gelukkeluk géne voetboalmatch.

Ke kunn éegluk ny zeggn woarom - an n toog stoend d er n bende pientelekkers die profiteerdn van de pientn an ne n euro (boovn toog oeng t er n annonce dat t 'happy hour' wos van te zessn toet te zeevn), t wos nogoal rustiek moa gemoderniseerd mè kitcherige kleurn, d r stoen ne biljart en n boas wos duudluk ne zelfstandign die n café oopn ield moa verre van ne caféboas - en toch wos t ier lik gezellig.

N zydeure gieng oopn en n madam mè n vriendluk oanzichte kwam mè n talore en ne pot. In de talore loagn twée sjikons in espe te brobbeln en de pot wos gevuld mè puree. Dat r géen kostje wos up de koassaulse, toe doa: ze wos goe van smoake. Moa dat de puree uut n pakske kwam - dat is toch n serieus minpunt. Puree vint, t is t simpelste da j kun moakn! Patattn stampn, n bitje beutre, n eitje, n skeute (soya)melk, peepr, zoet en noatmuuskoate en t is voe d r joe doad an t eetn! Moa diene bucht ier...

Nu, t wos goe muziek.

Grace Jones gieng nog ne kée deur ‘Pull Up To The Bumper’ moa t stak géen secoende teegn. D r wos diskuusje in n bendeke an n toog en d r stoend éen rechte, j oalde ne gsm uut zyn broekbeuze (niet te geloovn dat n d er in koste, zukn affaire!) en j ield n teegn n box. Achter n poar secoenn liep n were noa n toog me zyne fletskreen uutgestookn noa de bende die doa zat.
‘Ziet da t ny sjuuste wos né, wuk da j zei!’
‘Jamoa, wuk da j gy zei wos toch wok nie sjuuste!’

K zoate t eetn mè me gedachtn verre weg in t verleen - umme nog joenk woarn en oaleman Grace Jones kende en we doavoarn géen zukn spel noadig an. Zukn stemme! Zukn lyf! En de fuivn da we gedroaid éen mè die muziek! Sunny en ik mè héel uuze puppekasse... Funk en soul en reggae en disco... toet dat n boel ontplofte! - ut n boas ommédekée vroeg ut n bitje smakte. De minsn an n toafle neevnst my woarn weggegoan (ka t noais hoord of gezien) en nu stoend n neevnst my mè twee vuule gloazn in zyn andn.

‘t zyn vrée goe sjikons’ zeie k.
‘T is oal vès wei’ zei t ne.
‘Jamoa, k smoake t wei!’
Je lachte ne kée en je liep were noa z ne toog.
K a oengre en k oate t olyk oalemoale up, de versettjes puree dopte k in de koassaulse, en ton vroege k de reekninge. K koste r were teegn.

‘She walked up to me and she asked me to dance.
I asked her name and in a dark brown voice she said, "Lola"...’

Moa vint toch, zukne skoan ofsluutre van The Kinks... T wos lik nie normoal! Voe dadde en Bruce Springsteen oalene zoe k ier oal were komm!

K deie my gréed voe voars te goan, moa k informéerde toch éest nog ne kée an n toog noa wukne zendre da we luusterden. Je dei teekn mè z ne duum, lik of da t n lifte, noa reks voe r em, noa lienks voe my en k kéeke were noa da gesgroen skerm da gelukkeluk géne voetbolmatch wos. En k loaze de letters nog ne kée da k oal n poar kéern geleezn an zoender da k t besefte.
En t stoend doa, zwort up wit, in wit up groen:

JOE FM

https://www.youtube.com/watch?v=utVR3EgQkHs