van Bangladesh Airlines woarn meegevloogn,
van Brussel noa Barcelona nota bene,
en da s oalemoale roend uus mé under oogn toe
teegn Allah bezig woarn,
‘U we nu nere stortn’ zeie k, ‘ton zyn we wieder
d éenigste ier die mé ne kortn broek noa n eemle’,
ge gaf my mé ne djok mé j n elletuute -
up ne vliegre woare gy oalsan veel serieuzre
T interieur a n t wuk weg van uuzne living, lange geleen
in myne n oederlukn t uus:
versleetn meubels en rustiek behang,
de knusse geborgnheid van de joarn tjeevntig
woadeure da k - curieus genoeg -
n bitje méer up myn gemak zoate
Nieverst n twuk oovre de skuddienge
en bokkienge up die vliegre,
en da uuze koffers ton ny mée woarn
(Da we ze noais mée giengn wére zien
kostn we nog ny weetn)
En dat uus ootél overboekt wos, eej da nu nog geweetn!
Moa noa da t skynt gebeurt da dikknst
Achter n héel ende in diene taxi mé ne smérig
in z n spegeltje kieknde ex-Joegoesloaf
woadeure da t éegluk n bitje up n ontvoerienge gléek,
kwoam we in éenigste ootél van de kéetn
woa da z airco addn (en da ny in t centrum lag)
Moa wiender peinsdn da we de wiend die we voeldn
éegluk te dankn an da gat t middn de ruute
Nieverst n twuk over die vichtparty up de Ramblas;
twée oans die de jukte uut mekoars vuustn
joagdn deur kort doffe kloppn up te vangn
mé bloeroa skarrekoppn
Binst die wandelinge stoptn we an n wienkeltje
en zoenn uut pure gewente n postkoarte noar uuszelvn
(we zyn doamée gestopt; we zenn nu n mailtje)
Snoavens oatn we in t restorang van t ootél,
we woarn versleetn van te tjooln
en zoagn t ny mée zittn voe nog verre te loopn,
en zoatn ton elkevrans toet sneukns tieluk up de pot
En toen da t geld uut uus kluuze weg wos,
vrée roar, da wos doa nog noais gebeurd zei n z an t lokét,
a we d r genoeg van - drie doagn Barcelona,
da s echt te lange - uuze reize wos tenn
en we wilden oalene nog noa r uus
We zei n dat r n twie van trap gevoaln wos
en z ne nekke gebrookn a binst da t uus wos ofgebrand
en mochtn ne vliegre vroegre pakkn en we bedankten God,
en voe de zekerheid wok Allah
binst da we wére vloogn -
uuzne gordle goe vastegemakt -
mé Bangladesh Airlines
(Da diene vliegre up da moment bekend stoend
voe de langst vliegnde vliegre ter wéreld
en twée weekn loatr voe veiligheidsreedn
voe oalsan an de groend zoe stoan,
(zoagn we n véertn doagn loatr in n rupportoage)
da kostn we ton nog ny weetn)
Néen, nietn doa r oovre
Geweune moa n oendergoande zunne,
wéerkatst in woatr en mé n poar bergn in de verte
en oalachtre ‘GROETN!’ en doaroendre uuze noamn,
up da kartje da ne moand loatr in de busse zat
Geen opmerkingen:
Een reactie posten