zaterdag 2 november 2013

KOETJESBLUES

Zy je glukkig koetje, in joe weëtje,
joen kort ofgeetn peloezeke, 
zy je gerust achter joene stekkerdroad?
Eej geen koed ’s nachts, 
ut doenker is of rint of smoort 
en zy je noois benauld kleen koetje…

Gebeure’t da je dromt 
en da je zucht in joene sloap,
of da je triestig zyt, en da'j nie wit voe wuk?
Dat er van die dikke koetjestroan
in joen oogskes stoan,
en ’t is nie van de lucht die piekt
of van de koede wiend?

Joen koak’n goan up en nere, weg en were,
juste lik joene steert
woamee da j’ol de vliegn wegsloat
en je kiekt lik of da ‘j ol olles wit
moa da ’t joe nie kan skiln…
Hey koetje, skoan koetje, ge zie zo stille,
an wuk peis je binst da j’ool da ges up it?

Verstoa je joe an ol die velo’s
en die oto’s die passeren
en an ol die vliegers in de lucht
binst da je mé ‘j ne steert omhoge
tussen de koeietoarten pist;
is’t er een twuk da je nog soe wiln,
een kot, ne moat, nen twin oarrink
of misschiens ne nieuwn stekkerdroad?

1 opmerking:

Anoniem zei

Alweer genoten van je kort-verhaal! Halsreikend uitkijkend naar je volgend hersenspinsel. …. " doe zo verder….;-)