PORMONNEE

Tis rumoerig in de gazettewienkle. De minsn stoan mè n postkoarte in under andn, of n tydskrift, of nen boek, oolemolle in under dikke kléers, sommigte mè n mutse up of n poar andskoenn oender ne n oksle. Ze kykn roend van boovn under moendmasker, d éne zyn up zoek noa nog n twodde en d andere moakn zére plekke, de benoaldigheid stoat in under oogn te leezn.

K stoa te kykn noa n overskot van de gazettn, ge moet ier chanse een uj an ne standaard of ne morgn wil groakn, byzoenderluk ut ool ne kée achter n achtn is, k loate voarn achter n neegn; k weete t, k zyn loate an.

N noedere madam komm binn ool babbeln teegn nieman moar éegluk teegn ooleman.

'… en k peisde ke kunne k ik ze moa doa vergeetn zyn né, wan kee ze doaves nog gebruukt voe te betoaln…'

'Aja, zy j n twuk kwyt miskien?', zegt r n twien in t deuregat.

'Myne pormonnee! Allez, oe ist meugluk? K stoene doa te blienkn in n Karfoer en da doe zoa dinne ee…'

Chantal eet hoart dat r n twuk goande is en ze kykt up: 'Tis voej ne portmonnee zekers? Je ligt ier. K woare joene nummre an t upzoekn, k gienge sebiet belln…'

'A, moa k zyn bly wi! K peisde ool da k èm ier vergeetn woare.'

'Nint, n twien eetn gevoenn up n dam n bitje voddre, en ier ton binn gebrocht.'

'Moh! Tis géen woa zeekre!' Ze lopt nu n bitje zidre noa de wienkeltoog.

'Joat, kyk, kée n sjuuste oopn gedoan voe te kykn van wie dat n wos. Jis nog nat.'

'Ja, k ée were die veste an ee, woamee da k zoa moete uplettn! Ziej t, die beuze ier lat deure, en k weete t pertank, moa ja, dat is verstroaid zyn zekers? Goh!' Ze doet eurne portmonnee oopn en kykt zére ut r nog ool in zit.

'Moa kyk, tis nietn gebeurd, en g eet n were!' Chantal lacht twéesn deur eur masker da noa binn klapt u z oasme pakt. D oedere madam ee eurne portemonnee nu in eur goe beuze gestookn en lopt ool noa de deure.'

'Bedankt ee!', roept Chantal nog ne kée, uut pure gewente moa z oare t nie, want z is were an t babbeln teegn nieman en ooleman: 'Oe da j oolyk zoe voarn ee. En k meuge nu nog ne kée were noa de Karfoer wok. K zyn were ool héel over myn toern, en t is nog moa nuchend...'