'Eej an je voadre gepeisd?', stoat r up n plakoate
mè n groate boarmachine up van n 'doe het zelf' zoake
die de zundagvoarnoene oopn is
'Ier nietn da voader nie meugt' angt r by n traiteur in de vitrine
vul mé flossn langn en kortndrank in oole moatn en kleurn
'Mè n voadre die géern bloemn ziet, is r nietn mis' kuj leezn by de bloemist
en der neevnst by de multimediaspecialist:
'Viert voadre mè ne vierdubbelen cd mè sjuuste moa
t skoenste uut de klassieke muziek'
An n reisburo: 'Verrast voadre mè ne citytrip noa Barcelona of Parys'
De prys voe orzjinaliteit goa noa de velomoakre:
'Legt vandjoare ne kée tegoare en trekteert voadre up ne velo met nilletriek!'
Moa ool lange voa da w joe moestn begroavn
aj géen deugd mée van te drienkn, ge gienk ne kée
n sigarre smoarn moa sjuuste moa ut van die fyntjes woarn
en ge zy noais liefebbre van reizn gewist,
ge miste géen boekn, joene velo stoend in t kot, koejroste,
ge wos nie an bloemn en u ze klassieke muziek
speeldn up de radio, zei je: 'tis were kerkemuziek',
en ge veranderde van post
En a we materioal moetn geevn voe te werkn,
gienk vroagn wuk da der skilde,
utr n twuk up uuzne lever lag
Da we kée beldn,
t wos ool daj wilde
moa doavoarn is t nu wok te loate
En k wille der nie an peizn
moa t is vandoage géen avance
t is voaderdag
Geen opmerkingen:
Een reactie posten