SKOENSTE ANDN

Myn voader a de skoenste andn

Groat moa wok nie te groat
mè van die lange fyne viengers
moa wok nie te fyn
lichteluk behoard en deuroaderd
Kloek moa elegant

Gif moa n endje! zei t ne en ge wos preus
dat n joe n and vast a oenderboane
en ne klets teegn joen oarn is noais echt géestig
moa t skilde ut van één van zyn andn kwam

K weete nog dat n loatre ne kée kloagde
da zn andn toope trokkn van te werkn

Moa dat n ozoa gienk ofliggn -
mè die andn in mekoar gakt lik n twien die bad -
èm die zukn léeg gedacht a van de kerke!

(In de klinieke wost n benoald
en je pakte myn and vaste...
Ka t moetn weetn, ka ze
noais mée losgeloatn)

‘Ja, we kostn nie anders’
zei de begroafenisoenderneemre
‘We kréegn ze nie plat’