WACHTZOALE

K woare deur de smoar geloopn,
(je weunt moa r n poar uuzn voddre)
en k zoate nu in de wachtzoale:
k an n afsproake gemakt via t digitoal loket
moa je wos in retard en t zoatn d r nog n poar voarn
en n vrouwe, mé ne tierende kléen up eurne skoat
die z ne tuut ollekére uutspoag,
kéek noar eurne gebeur en fluusterde:
‘meneer n dokteur gerakt r ny deure’

T lokoaltje grochte vul en ruutn bedoamden
en minsn zoatn t oestn en te snottern,
en verre boovn uus, in de raddio,
woarn ze lik vrée serieus an t babbeln
moa t stoend te stille voe te weetn woarover da t goenk;
miskien moetn ze voe zieke minsn de radio stilder zettn
moa miskien zoekuk t te verre en moe ne dokteur
Sabam betoaln per decibel

De kléen mé z ne tuuter,
z n gezwolln oogskes en die indelukse snottekéese,
wos gestopt mé bléetn en verzekers oal vergeetn
woarom dat t n zat te snikkn
binst da t n speelde mé blokkn in ne n oek,
k oorde ommedekée n roare tuutinge
en k kéeke noa d andere minsn,
moa t wos duudeluk ollene
in mien oorn te doen

Ollemoale zoatn ze verveeld,
in gedachtn verzoenkn, oal oaf in sloape
en ne noedere vint, zyn oar slekkevet
en ollesies nog éne doenkerbruun tand in z ne moend,
bloaderde in n boekske, ollekere lekknd an z ne viengre
voa dat n t blad ommedroaide en k vroege my of
oelange da bakteerjn overleevn
up n oekske papier

Een madam in ne velne frak dei de deure
van de wachtzoale oopn en we zoagn oe da ze verskoat,
z a van die puutoogn die begostn up te zwelln
en k peisde echt da ze d eruut giengn spriengn,
of erger nog, ontploffn, moa ze skudde mé eur ooft
en oal eur oenderkinn kletsten teegn mekoar
en ze gienk achteruut lik of dat r ier éen of n andern
duustere kracht an t werk wos die belette
da ze binn koste komm moa t kan nateurluk wok
da ze ne vampier wos en da d r ier
n twie look a geetn

Swat, k kéeke ne kée roend
wie da d r nog ollemoale voarn wos:
die moedre mé eurne kléen,
diene vint die an ze viengers lekte
n meiske mé n groen kleedje die d r slim uutzag mé eurne bril
binst da ze in ne dikkn boek zat te leezn,
en ne n upgeskootn gast oender n mutse mé ne truuzle
die betooverd wos deur zyne gsm

Dus k peisde da t beter wos
van nog n bitje up mien tann te bytn
en k deie myn oogn toe en k bleeve zittn,
ke kunn t oast ny skattn oe lange,
moa ton gebeurde d r n miroakel:
k oorde oe da t n dokteur
in de gank kwam oal babbeln,
en oe da t de buutndeure oopn gienk
en were toe

K voele my olsan gegeneerd
ut n de deure oopn doet:
in z ne ribflueeln broek en lamswulln boaj
binst dat n in de rapte roendkiekt noa wie dat r zit
mé de blik van n twie die van ny mée verskiet,
en die géen tyd vermoast mé goe n dag te knikkn,
olsan zjuste moa mé z n werk bezig is;
diene gefoocustn blik van ne vint die up ne dag
miskien joe leevn moe reddn,
en gie zit doa, lets face it,
oo fong mé n flutse van niet

Da meiske mé eur groen kléedje
sproeng rechte en gieng mee
en ton zoate k doa were tussn oesters en snotteraers,
moa mé n bitje méer coroazje;
t gienk voaruut, t troage moa t zat skuuf in,
en mé n bitje sjanse wos de voorign
n moeiluk gevool en gieng t nu
veel zidder goan

K gienge rechter zittn,
en k kéeke noa de deure
en k orte uk nytn oorde in de gank,
k zoage deur de stoars oe da de zunne
voa n dag gekomm wos, en ton oe da ze
versneen in geliekige streepn
up de vloer van de wachtzoale viel
en k an oal leute in m n binnste
uk d eran peisde da k byna buutn woare
(oal is t da k eegluk wel wiste
dat da ier nog n héel ende gienk deurn)

AKSIEDENT

Ge koste de zwoailuchtn oal van verre zien want t begoste te duustern. Mé n slich voargevoel (moa k moete toegeevn da k wok n bitje curieus woare) rée k de brugge in Ooigem up. T smuukte en olles pienkelde en sketterde. Ne flik in sienjalisoatiekléern dei téekn mé n oranje soosiese da k moeste vertroagn. Overoal parkeerdn minsn under ne noto en kwoamn dichter voe te kiekn wuk dat r goande wos. D éne o zoa - in underne boai - d andere mé n rinneveste an of oender ne paraplu, moa oolemoale mé dezelstn blik: n deen van minsn die benoauld zyn voe wuk da ze subiet goan zien. K passeerde n poar pompierotoos, en de mugge kwam mé veel blagoai angevloogn. En ton zoage k ut: in de goote lagt r n groate witte zwoane vrée oengelukkeluk klapwieknd up eurne rugge. Verzekers te léege over de brugge gevloogn en hoaperd an e noto. Mé eur pootn trappelde ze in de lucht, mé die indelukse vlerkn sloeg ze weg en were up de maccadam, en ze stak eurne kop mé die lange nekke zoo verre meugluk noa vanvoorn moa t wos oal gén avance, ze grochte ny rechte. T wos wréed voe te zien oe da zukne sierlukke veugle doa nu lag. Moa t ergste wos toch die benoauldheid in die oogn.
D er zat n twie lienks en d er zat n twie reks, elk mé ne pielucht, die eur mé under vry and probeerdn te kalmeern. K zoage twée ambelanciers die oastig kwamm ofgeloopn mé ne brancard. Eést peisde k van te stoppn - moa voe wuk? - en ton... woare k gepasseerd en k begoste voarzichtjes wére up te trekkn.

OE DA ZE RIENKELT

Uj sneukens nog moe zyt en ze toe doet
Uj snoavens wéerol moe zyt en z oopn doet
U j moet en j ne broek noa benéen doet
U j gedoan é, jne broek up trekt en were toe doet

Uj ze vast oed en kiekt noa da licht geboogn leer
noa die patine van de sleete, en oe da de gespe blienkt
Uj ze vanuut ne vuuln broek in ne vessn broek skuuft
Uj ne broek of doet en wisselt voe j ne piezjammabroek

Up eur gemak, binst da j oal dromt mé j n oogn oopn
Uj ze biekan ny oopn kriegt, gejoagd, en mét n erteklop
Uj t tiekketje of snyt en ze voé n éeste kée an doet
Uj ze uut joene broek skuuft en in de vuulbak smyt

ZOMBIE

We loopn dag en nacht t middn de stroate
mé uus oortjes in, knikknd up de de moate
en oal skuufeln de veugels under skoenste ploate
t doet t r ny toe, uus oorn zittn toe
De wéreld lig oopn en bloat voar uus neuze,
moa méen ollene contact mé da spel in uus beuze
dat uus méer kost dan da w moandluks verdoen
an teetn en an drank, an kléern en an skoen
en we droagn van die broeks mé de spriet an uus knien
vrée oengemakluk voe mé de vélo te ryn

Ke kunne ny réeknn moa k kunne wel telln
en ut t goa mé n berichtje, k goa ny rap belln
want dat is myn talent: k koste oal smssn
van voa da k rechte in de pot leerde pissn

We kiekn noa beneen binst da w fezeln en lachn,
binst da ze neevst uus vervéeld zittn te wachtn
moa da kan uus ny skéeln, zoa lange da ze ny sloan
en de minsn an n anderkant uus kunn verstoan
En ze moetn ny zoagn, ze moetn zelfs ny zeggn
da z ier zoa goed zoatn en nu moetn verleggn
omda m wieder ier nu zittn en olles verstoorn
mé oal da kaboal uut da spel an uus oorn
We trainn uus in t kykn mé de blik van ne vis,
lik n twie die uut de woaking déd weggeloopn is

Ke kunne ny réeknn moa k kunne wel telln
en ut t goa mé n berichtje, k goa ny rap belln
want dat is myn talent: k koste oal smssn
van voa da k rechte in de pot leerde pissn

U z eur zit te verveeln en de koarte wil leggn
lachn we mé memé en luustern ny u ze zeggn
da wieder t zelste doen deur spellekes te speeln
oender uus oorverwarmers an oenderd ter eure
weg van de wéreld lans d achterdeure
Ort, méen ze toegedoan en nymand rakt d r deure
gebeurs, controleurs, zelfs de famielje é géen keure
en moestn we toch zoender da spel noa buutn goan
wùk zoen wieder verskietn van de groate nateure!
We kunn gerust ne ké offline zyn...

voe n eure

SNEEUW

Ke kunne nie sloapn
Der is géen moane te zien
en toch is t lik kloar in de koamre
Gie slapt lik ne stéen:
vertrokkn noa ne wéreld
lichtjoarn van ier
Ké n tekstje in myn ooft
eevn lastig vaste te pakkn
lik die pluumkes van sneeuw

Olles verandert moa
de sneeuw bluuft gelyk

Witte vlokkn die dansn
voa mien neuze
K bloaze up mien andn
moa ze kriegn ny warme
en ke kére wéere in tyd:
ne késoavnd, gesnéeuwd
Noenkel en tante
ryn voar uus deure
mé under géete in n dyk

Olles verandert moa
de sneeuw bluuft gelyk

Olles vool stille
en ge peist an vroegre
Ge zoe berichtjes willn zenn
noa minsn van lange geleen
ge zie ze deur under ruute stoan kiekn
en ge krieg goeste
voe brievn terleezn
moa ge zet joe nere
en ge begunt te skrievn

ERFENISSE

K léerde diene dag olles
over de soortn moortle
voe te voegen, te chappn,
te metsn en voe fundoasje

Je dei z n klakke of, t zwéet
liep lans z n sloapn en je zuchte
dat n te doen a mé de mins
die da ier were of moes breekn

T wos n oenvergeetluk moment
Moa noois gepeisd
da k ik deen woare
mé wie dat n ton compasje at

RUUMTESKIP

We zyn dus ol uus eign ruumteskip
zoender kompas dwoaln we deur t heelal
chauffeurs, o fong uus n eign patron
niemand éet n twuk te zeggn an uus
zolang da we de nafte kunn betoaln
en ny olle stappe in panne stoan

We moetn zorgn dat usne moteur bluuft droain
da we de frings in d ooge oen, d oolje verversen
da we d r in de wienter antygel in doen
voarkommn da de plongs uut sloan
binst da w ookn up uuzne kievief bluufn
voe uutgedoofde sterrn en verdwoalde moann

Da we up tyd en stoend de bann upbloazn,
d r loatn noa kykn van ut r n luchtje brandt
moakn dat n ny teverre over zyn toern goat
da w olle joare noa de skowinge goan
en zorgn voe n eign landingsplekke
woa da j uut de wiend en uut de rinne stoat

Biologisch afbrikboare construuksies
van gebéente, vlees en bloed mé n vel deroend
en up t éeste zicht zyn we miskien gelyk
moa d r loopn géen twée dezelste roend
géeneen van ol de programeurs vanboovn
in die controlekoamers werkt identiek

En ut t moteurke droait likn biezoetje
stiegn w up en ut uus aanstoat,
entern we n ander skip, voe n eeste kée
of uut vervelinge, of voe te kiekn u we t nog kunn
of miskien wordn w deur n ander skip geënterd
en ton vliegn we n nende roend mé twéen

Toet da w t moe zyn en were skéen
uus karre droain en vodder voarn
of w angn vaste toet da t up is
toet da éen van de twée wel los moe loatn
woarachter n andern were uplost in n heelal
vul uutgedoofde sterrn en verdwoalde moann

KE DE BLUES EN KWETE NIE VOE WUK

Ké de blues en kwete nie voe wuk

Miskien omdat t buutn rint
en da de lucht zoa doenker zit
Miskien omda k nog niemand
éen gezien of hoord vandoage
Miskien omda k noa t nieuws gekeekn é
en ton noa t weerbericht

Ké de blues en kwete nie voe wuk

Miskien omda k up joe gepeisd é
k weet ny woarom, ge kwam
geweun in mien gedachtn
en t wos lik da j doa tuus wos
Oe roar da we mekoar
uut t ooge zyn verloorn

Ké de blues en kwete nie voe wuk

Oe zoe t nu mé joe zyn?
En mé joen droomn en ol joe goestn
en ol die dingn da j nog gieng doen
Ol die plann da j at en oal
die poer die in joe zat,
geliek wuk daj gie dei t wos buus

Ké de blues en kwete nie voe wuk

Moa k goa je ny komm zoekn, oe jammer
da t wok is, en oe geern dak wok
zoe willn, we zyn nu ander minsn
mé ander goestn en ander winsn
en t is nu an verduustern binst
da t oal zoa doenker zit

Ké de blues en kwete nie voe wuk

Miskien omdat buutn rint
en da de lucht zoa doenker zit
Miskien omda k nog niemand éen
gezien of hoord vandoage
Miskien omda k noa t nieuws gekeekn é
en ton noa t weerbericht

STILLE STOAN

Oovége de weke, middn in nacht
up d otostroate en gée ny te kiezn:
de verwarmienge an of je ruutn bedoamn
De ruutewissers vliegn mé snakkn weg en were,
olles pienkelt en schettert, stom van t verskot,
ge zoe byna peizn da iederéen slapt

En ier zy j gy, God wit woa da j zit
Ge gapt en ge nypt in t vel van j ne n oarme
De boane da j oflegt in vuuf minuutn tyd
geplakt in j ne zetel, up otomatiek:
t is géen avance da j geuln trekt in t woatr
moa n tring passeert nu en gie zit r up

In j ne shuttle, betoald en verzekerd
vés gebloazn bandn en ne n oofvulln tank
en de faars an, diepe oender noogn n eemle
Moa lettr plekkn woa da j stille kunn stoan
an juste géen oenderddertig per eure,
lik n otostroate, middn in nacht

SOEPE

Kelly erriveert up oedejoarsoavnd in New York

woa da s ontdekt da ze kan poaldansn.

Rudy, eurne n ex, zit toevallig in t publiek.

Jan is vies, moa je wit ny goe voe wuk.

Marc en Bert goan noa d oern voe n verzetje.

Tom z n sleutels liggn binn, je stoa voa z n deure in de rinne.

Elizabeth is teegn noek van ne roenn toafle geloopn.

En Mario is up zoek noa zyn peetre,

moa je zit by ze meetre die dement is.

En de katte duwt mé eur gat teegn myn neuze

en noend is oal héekn an t blaffn in nof

en gie lig te sloapn

Jan kiekt of zyn trouwkostuume nog past, ze spant n bitje 

moa t voal mée, en ton doet n zyn wienterveste, 

z n mutse, z n sjarpe en z n anschoenn an.

Marc en Bert moetn fringn voe n eevrzwyn 

die up zyn duuznde gemakkn de boane overstikt, 

goan é poar keern overkop, en sléern up under kappe in dyk.

Tom doet n toer van n blok voe oalachtre binn te groakn,

gelukkluk doet n zyn achterdeure noois up slot.

En Mario zuupt dreupels achter de stoasje.

En de katte joagt up de kassiene achtr n loate vliege

en noend zit oender t saarzeke an mien teenn te lekkn

en gie lig te sloapn.

Kelly ziet ommedekée Rudy in oal da volk

da noa r eur stoat te kiekn en d r spriengn troann in eur oogn

moa ze doe geweune voars, ze stikt zelfs nog n tandje bie.

Elizabeth verskiet eur n bulte by n docteur die zegt

da s oal acht moandn verre is en ze lopt weg oal tiern en tuutn.

Oal klutternd komm Mario wakkre up n bankske t middn t stad. 

Jan é geetn bie n Chinees en drienkt ne n Irisch koffie.

Tom z n achterdeure is olyk geslootn, en t giet woatre.

Je doet oal zyn kleern of en je lat m in t keldergat zakkn.

En de katte kiekt noan achterkant van n téleviesje

en noend ligt mé eur oogn toe te bytn up eur stokske

en gie lig te sloapn.

Rudy krieg n skie en Elizabeth ne twéelieng.

Mario kom tuus en zeg teegn zyn vrouwe da tn kiest

voe z n lief, en je volt doad. N artoaderbreuke.

Marc en Bert komm neevnst mekoar wakkre in de klinieke, 

olletwee geblutst en gebuuld en mé n been in de ploastre.

Tom zit vaste in t keldergat, je grakt noch weg noch were.

Een danseresse is doagestookn, zéen eur gevoen in t wc.

De vrouwe van Mario probeert een verband te vienn

en ze bokt up ne brief an eurzelvn van u ze nog kleene wos.

En de katte lig bie joe up joen saarze

en noend lig te sloapn up miene skoat

en gie lig te sloapn. En ik begunne te goapn...

PRIVE UPTREEDN

'Vint, gie bespeelt die snoare goed...',

z orte mé eur oogn toe.

'En wien is da?' K Verlore mie in ne solo.

'Joe... Coc...ker?' Z a lik oasme tekort.

'Joe Cocker?!' K verstoen d er nietn van

moa k feselde in eur oare:

'T wos Dick Dale'.

'Surf!...', piepte ze mè ne snak.

Verschootn van eur muzikoale kennisse

goave k nog een tandje bie, toe da ze riep:

'Wie zeidje doa? Dick Dale?'

Ze kreeg de sloppe lach.

'Joe Cocker speelt juste moa luchtgitoare,

en zelfs da doet n moar oalf', 

k koste t ny loatn van zeggn.

M éen t uptreedn moetn stille leggn.

MAO

Mao éen w eur genoemd

K kwam eur verleen joare teegn uk va me werk noar uus rée

Ze zat t middn de boane up de rienk;

k koste nie anders dan stoppn

K liepe d er noa toe en ze zat mé n poar sproengn in dyk

K kroape were in miene noto, en zjuste lik 

of da k wille anzettn, wos ze doa wére

K zyn utgestapt en ké eur meegepakt,

anders zat d r doa n dag d erup wére

zukkn plekke vul oar up n tarmac

Z ée heel miene noto deurzocht, lik ne drugsoend 

Ze zat in mien nekke, bachn de zetels, 

up miene skoat, oender mien pedoaln

K a kompasje mé da béestje,

in éne kée weg van olles da t kende,

moa z ée gén sekoende gekermt

K kwoame d r mee tuus en mien vriendinne zei 

da k géne skoendre kadoo a kunn meebringn 

voor eurne verjoardag

Ze noemn da sjanse

Nu, we zochtn ne noame

We vertrokkn by miauw, over mauw, en we 

kwoamn ten lange latste uut bie Mao 

In t begun miekn we d r dikknst

n kluchtje van: Mao, t zyn toengn! 

Nie da ze doavoar uut de struukn kwam, 

z ét geen vis, ee j da nu nog geweetn? 

Moa n speelveugle da da is, en ne nacroboat:

ze spriengt van up de groend toet i j ne nekke

moa ny olleman is doa eevn mee gediend

Sins da s ier weunt, vinn w olle weke 

up ze minst n oave muuze in uus, 

en zien we géen veugels mée in uuzne nof

De slimste zyn weggebleevn, de domste ées upgeetn

Soms bring ze ne vis mee uut de pit van de gebeurs:

t is voe ollemoale geliek, da is eur communistisch kantje

Ze kan d r nie an doen, t is oe da z is

Ze komt en ze goat lik da t eur past, 

ze slapt in de zochtstn zetel en ge meug ze streeln, 

moa ge doe best je n anschoen an

En uj t ny mée verwacht kom z uut eur eign 

en wil ze spriengn up joene skoat

Z is vrée gewoarig, is t ny gepast ton zet ze t an

en z iej ze kwyt voe n poar eurn

Moa t mag ny rinn, anders kom ze wére binn

héel uut n oak en skuddnd mé eur poatn

Andoenluk oe da z in doenkern an de ruute kan zittn wachtn, 

neevenst uus in de zetel noa ne filme zit te kykn

of up eur langde in eur mande ligt te miauwn in eurne sloap

Mao, ne beetre noame ee we ny gevoen

NETJE

Kwoare up boane mé miene netzak

m n stuutedooze en n pulle kaffie

t wos néestn dag, k begost in de vroegn

en k moest an de kléedkoamre wachtn

de chef gieng mie doa komm oaln

De deure viel achter mie in t slot

en de machienn kloenkn luwer en luwer

Een voe r éen kwoam ze binn, bléek

en liepn deure, kéekn zelfs nie oversiets

binst da ze klaptn van t wéere

van t nieuws of van t voetbol

en ze deijn underne n overal an

en under netje up under ooft

Oal die stoere vintn twos wel komiek

Binst da k doa stoene te droain

bie die vrimde minsn in oal da leevn 

woadeure da t lastig is voe te peizn

wuk da de dingn ten lange latste 

wel n bitje vergemakkelukt 

ge zoe biekan geloovn

da s ze d ervoorn gedoan éen

Ja, t is zelfs oast te verstoan 

dat r zyn die doa héel under 

leevn éen gevrocht

Binst da k doa stoene te droain

probeerde k d er ny an te peizn 

oe da t buutn wos, doa bach n die deure:

nog ny hélegans kloar en lichtjes gesmoard 

moa zo fris en zo oopn en zo stille -

‘KOMMOAMEE’ riep de chef; 

k an n voe n néeste kée ny zien komm, 

'GEMEUGTRSUBIETANBEGUNN',

je liep oaltyd gejoagd woadeure da j achter

m moest loopn en je klapte zoa rap 

da k m noois tevulln éen verstoan

'MOAWOANEESTACHTERNENOVERAL

ENNSKOANNETJEVOERINJOENOAR'

NE SKOANE DAG

k moeste peizn an dien n dag

da we ne klabband an 

lans d otostroade

(t wos voe r olletwée 

néeste kée 

da we plat stoenn)

d otoos vloogn lans t uus oorn 

en de wiend snakte an uuze kleern 

en trok an uus oar

en we woarn tenn n oasme 

en verre oal uuze coroazje kwyt

u w t reservewiel voen

moa teegn da we wére vertrokkn 

zoagn we t wéeroal helegans zittn 

(we woarn vrée fleksiebel in dien tyd)

woarachter da we indeluks misréen

(we leefdn nog in n éeuwe

woarin da w peisdn 

da Orwell’s ‘Nineteen Eighty-Four’

saajns fiksjen wos)

t wier uuze ergste ruuzje toe ton toe...

nie diene platte band of da verdwoaln

moa da we doarachter zwéegn

uurn-an-ne-stik...

indeluks triestig kwoame k doavan

doa moest e k nu an peizn

an diene dag

da wos ne skoane dag

FYKSIE & PRODUUKSIE

Wére gewerkt an de loopnde band

en wére mien meters hoald

De chef wos vrée kontent

je glimlachte en je gaf mie n and

Moa wok oal doe t n da ollekere 

ge komt da noois gewend

SLOAPN

Ge stréelt noend die in de zetel ligt en ge droait de stoovn uut

chekt t goazevier en ton goa j noa boovn

Ge kiek nog rap ne kée noa buutn, trekt de gordienn toe 

en t dekbedde over je n ooft voa da j de lucht uut doet

Soms eej van die doagn da j d r nie teegn kunt

gee nie genoeg gesloapn moa t is je neign skuld

Ze zeggn: n kermesse is n géeselinge wéerd

Moa ge moe t r uut, kost je d orloge were droain...

Uj slapt kuj reizn in n tyd, en t olle nachende uutklappn 

mé diene mins da j wos moa ny mée zyt

Wan by da j nu Obama zyt of Prince, de Fonz of Helmut Lotti

boekn schrieft muziek makt uuzn zet papier plakt striekt

danst of inne fabrieke werkt tis voe iederéen geliek

uj nie kunn sloapn goa j t ier nie lange trekkn

En ollemoale droomm we - soms zyn uuze droomn privé

en soms droomn we van t selste, zyn we tenn u w oentwoakn

of is t lik of da we nietn éen gedromd

Komn wakkre ool lachn of in troann moa we weetn nie mée voe wuk

Uj slapt kuj reizn in n tyd, en t olle nachende uutklappn 

mé diene mins da j wos moa ny mée zyt

WUK ZEG JE

Ze zeggn: de zée zit vul mé vis

Oe wréed uj wit

dat de groend ier vul mé tettingn zit

En uk kleene woare reek ne kée

in miene kortn broek mé miene velo in n dyk

kwoare genitteld van kop toet teen

Ge peist miskien: ‘t is ne vrimdn

en daj meer van ier zyt dan ik

omda j ier geboorn zyt

Moa r ik weun ier van voa

da j moedre t zag zittn mé je voadre

Gée twée soortn minsn:

dedee die under omme droain

en noa binnn goan

en dedee die bluuvn stoan

voe te zwoain

Ort, zelfs god kan ne slichtn dag éen

van achtsn dag miekn toch wok

ne twiddn moandag?

Wuk zeg je?

Zie j n bitje doaf miskien?

Wuk zeg je?

Verstoa je gie géen Vlams miskien?

Wuk zeg je?

Eej je gie gesmoard miskien?

Oloe? Oloe? Oloe?

Olles gebeurt up t internet

moa mé de verkiezingn

stoan d r plakkoatn lans de boane

ol die skoane lachnde koppn

ze stoan doa nie slicht

tussen de koein en de skoapn

Ge meugge t mie nie kwoaluk pakkn

moa k kunne t nie elpn

n twien moet t zeggn

alliz, éet r nu echt nog noois n twien gezeid

da j ne noasme stienkt, zelfs uj zwiegt

of eej geweun n selectief geheugn?

Wuk zeg je?

Zie j n pieln leeg miskien?

Wuk zeg je?

Eek n twuk gezeid miskien?

Wuk zeg je?

Zy j nie van olier miskien?

Oloe? Oloe? Oloe? Oloe?

Mohow... Mohow...

SKIETER

Uk vroage da ze goa t uplettn

lacht ze en zeg ze ‘gie skieter

ge zoe n twie besmettn

mé joen benooldheid!’

Moa r uj e ier buutn komt

kom j in d oopn ruumte

en zy j dus n ruumteskip

en us ze eur neeroaln

of us ze geweune moa verskiet

en weg vliegt n emel in

ton zie k eur noois mée were

Want k beseffe vrée goed

oe da k t getroffn éen

da ze ny van oenderd joar geléen

of oenderd kielometers vodder is

en oeveel chanse ku j éen?

Dus zoe j géne skieter zyn?

GELUKKELUK

Gelukkeluk is miene leevr nog goed


en voel em nie dikkns zittn binst n dag


en ook ol doe m n oar soms zéér


ke kruupn méestal uut m n bedde mé ne lach

Want achter n glas vul vitamiene C


roend tjooln in t stad mé n poote druuvn


ne groote spaghettie in resto San Marco


en te zwéern da k nuchter goa bluuvn

Zitte k teegn te zessn weerol an n aperitief


te loate te warme te koed of te oed


t is toch géen avance van joe te verzettn


gelukkeluk is miene leevr nog goed

HALLOWIEN

T wos vandjoare miene toer

voe r eur noa t kerkof t escorteern

We woarn ne n dag te tieluk

en t rook r noa zéepe en blikwoatre:

ze woarn bezig mé de groate kuus

‘Tis woaterkoed’ zei ze,

en k krége rilliengn us ze de boovnkant

van eur and teegn mien koake stak

Ier en doa stoenn der plakoatn

mét n uutleg da ze plekke moestn moakn

woadeure da eur voadre en eur moedre

achter ool die joarn oliek nog

uut mekoar giengn goan

Wok n broere en n zustre

moestn were noa boovn

K keke noa ovoalne, gëemaileerde fotoos

van joenge minsn da k juste moa kende

van in ne n album

en van up ne koadre in de gank

T kwam doenker

moa twoa nog moa achternoene

en t begoste te woain

‘T goa mollejoengn rinnn’ zei ze

binst da ze de kol van eur veste

teegn eur kele trok

We makten toern roend zworte plassn

en liepn gejoagd tussn skéefgezakte groavn

zoender noamn

Ne noedn treurwilg ield zyn wortels

boovn de groend

Toen da k eur wére noar uus rée

liet ze me stoppn bie n bakkr

Dikke druppels klabbéderden up de kappe

‘Stik mie moa r in brande’ zei ze

en ze pakte n ferme beete uut ne éclair